<Зәбур 90

[1] Йа Хӧдан, Тӧ сьт'аргәһа мә йи qӧр'нә-qӧр'нә.

[2] Бәри буйина ч'ийа, бәри ә'фьрандьна ә'рде у т'опа дьне, жь һәр-һәйе һ'әта-һ'әтайе, Тӧ Хwәде йи.

[3] Тӧ мерьв ль хwәлийе вәдьгәр'ини у дьбежи: «Вәгәр'ьн, әwләдед мәрьвайе».

[4] Һ'әзар сал бәр ч'ә'ве Тә мина р'ожа дӧһӧ йә, кӧ дьбьһӧрә, әw мина бәдиләкә шәве йә .

[5] Тӧ wан р'ода бәр'дьди, әw дьбьн мина хәwна шәва, мина гиһайе кӧ сьбәһе зу шин дьбә.

[6] Әw сьбәһе зу гӧл дьдә у шин дьбә, еваре дьч'ьлмьсә у һ'ьшк дьбә.

[7] Бәле жь дәст һерса Тә әм дьһ'әльн-дьмашьн у жь алава к'әла Тә әм т'әвиһәв дьбьн.

[8] Тә нәһәqийед мә данинә ль бәр Хwә, гӧнед мәйә вәшарти бәр нура диндара Хwә.

[9] Һ'әму р'ожед мә бь һерса Тә дьбьһӧрьн, салед мә жи мина к'әсәрәке дәрбаз дьбьн.

[10] Р'ожед ә'мьре мә һ'әфте сал ьн, һәгәр бь сьһ'әт-qәwат һ'әйште сал бьн, диса р'умәта wан зә'мәт у к'әдәр ә, әw зу дьбьһӧрьн, әм жи дьфьр'ьн дьчьн.

[11] К'и һаш жь qәwата һерса Тә һәйә? Хәзәба Тә wәкә жь Тә хофкьрьне йә.

[12] Мә ӧса һин кә әм р'ожед хwә бьжмьрьн, wәки әм дьләки сәрwахт дәст биньн.

[13] Ль мә вәгәр'ә, Хӧдан! Һ'әта к'әнге? Ль qулед Хwә wәрә р'ә'ме.

[14] Сьбәһе зу бь һ'ӧба Хwә мә т'ер кә, кӧ әм әшq бьн нава һ'әму р'ожед хwәда.

[15] Мә wәкә wан р'ожа ша кә, чьqасида Тә дьле мә ешандьн, wәкә wан сала, чьqасида тәнгаси дит.

[16] Бьра кьред Тә ә'вдед тәва ә'йан бьн у р'умәта Тә әwләдед wанва.

[17] Дә бьра Хӧдан Хwәдейе мә, ль мә хwәш бә, шьхӧле дәсте мә нава мәда qәwин кә, бәле, шьхӧле дәсте мә qәдим кә.