<Зәбур 69

[1] Мьн хьлаз кә Хwәде, ав гьһиштийә qьр'ька мьн.

[2] Әз ч'ьм-ч'ьмеда хӧрпьшимә, щийе ньге хwә бавежьм т'ӧнә, к'әтьмә к'урайа аве, пелед ава әз р'ода бьрьм.

[3] Жь һәwар-газийе әз wәстийа мә, гәwри ль мьн зьһа буйә, ч'ә'ве мьн ль р'ийа Хwәде qәр'ьмийә.

[4] Щийе ами-т'ам пәйк'әтийед мьн жь п'ор'е сәре мьн зә'фтьр ьн . Дьжмьнед мьнә дәрәwин, хwә гьртьнә кӧ мьн ӧнда кьн. Тьште кӧ мьн т'алан нәкьрийә, дькьн кӧ әз вәгәр'иньм.

[5] Хwәдейо! Беһ'ьшийа мьн Тӧ зани у гӧнәйед мьн жь Тә вәшарти ниньн.

[6] Бьра р'уйе мьнда йед Тәда гӧман шәрми нәбьн, йа Хwәйи, Хӧдане Ордийа. Бьра р'уйе мьнда йед Тә дьгәр'ьн, р'әзил нәбьн, йа Хwәдейе Исраеле.

[7] Әз бона Тә беһӧрмәтийе сәбьр дькьм у шәрм р'уйе мьн дьньхемә.

[8] Бьратийа хwәр'а әз бумә хәриб, кӧр'ед дийа хwәр'а жи бумә нәнас.

[9] Хирәта һьндава Мала Тәда агьр мьн хьст , qаред йед qара ль Тә дькьн тенә сәре мьн .

[10] Әз кӧ дьгьрим р'ожи дьгьрьм, әв йәк дьбә qара сәре мьн.

[11] Дәwса к'ьнща мьн к'ӧрх хwә кьр, wанр'а бумә мәсәла готи.

[12] Бумә готә-гота дәве щьмә'те у стьрана дәве к'ефхwәша.

[13] Ле әз һәwара хwә Тә датиньм, йа Хӧдан. Дәма хwәстьна Тә, Хwәдейо, бь һ'ӧба Хwәйә мәзьн, щаба мьн бьдә, мьн хьлаз кә, бьдә хатьре амьнийа Хwә.

[14] Мьн жь һ'әр'ийе дәрхә кӧ әз теда нәчьм, жь пәйк'әтийед хwә у авед к'ур хьлаз бьм.

[15] Бьра пелед ава мьн р'ода нәбьн у бебьни бьра мьн данәqӧртиньн, qӧни жи дәве хwә сәр мьн нәгьрьн.

[16] Мьн бьбьһе, Хӧдано, чьмки һ'ӧба Тә ширьн ә, анәгори дьлшәwатийа Хwә сәр мьнда бьньһер'ә.

[17] Бәре Хwә жь хӧламе Хwә нәгӧһезә, әз тәнгасийеда мә, мьн зу гӧһдар бә.

[18] Незики нәфса мьн бә у wе хьлаз кә, ә'йнати нәйаред мьнр'а мьн азад кә.

[19] Тӧ зани беһӧрмәтбуна мьн, шәрм у р'обәтбуна мьн, һ'әму пәйк'әтийед мьн Тәва ә'йан ьн.

[20] Беһӧрмәтийе дьле мьн шкенанд, кьрьмә хwәйе дәрд-кӧла, һивийа барьстанийе бум, ле мьн нәдит, йәк т'ӧнәбу дьл бьда бәр мьн.

[21] Дәwса хwарьне жә'р дьдан мьн, дәwса аве жи сьркә дьдан .

[22] Дә бьра сьфьра wан ль бәр wан бьбә т'әләк херхwазед wанр'а жи бьбә т'ор'.

[23] Бьра ава р'әш бе сәр ч'ә'вед wан, нәбиньн у пьшта wан һәр т'ьм бькә ль бәр wан .

[24] Хәзәба Хwә ль сәр wанда бьбаринә, агьре һерса Тә wан бьгьрә.

[25] Һеwаргәһед wан wеран бьн у конед wанда кәсәк нәминә .

[26] Чьмки Тә к'ижани хьстийә, әw пәй wи к'әтьнә, сәр еша бьриндаре Тә гьли-готьна дькьн.

[27] Нәһәqийе сәр нәһәqийа wанда зедә кә, кӧ әw нәгьһижьнә һәqийа Тә.

[28] Бьра навед wан жь к'ьтеба жийине р'әсит бьн у т'әви р'аста нәйенә ньвисаре .

[29] Ле бәле әзи шкәстийи дьле кӧл ьм, Хwәдейо, бьра азадийа Тә мьнр'а бьбә пьштован.

[30] Әзе пәсьни наве Хwәде бьстьрем, Wи бьльнд кьм, шькьрийе бьдьме.

[31] Әв йәке һе Хӧдан хwәш бе, нә кӧ га у щанәгайе хwәйиструйи хwәйисьм.

[32] Т'әнгәзаре бьбиньн у ша бьн. Һәй Хwәдеһ'әйра, дьле wәйе жи сәрхwәда бе.

[33] Чьмки Хӧдан бәләнгаза гӧһдар дьбә у пьшт надә щьмә'та Хwәйә һесиртийеда.

[34] Бьра ә'рд у ә'зман пәсьне Wи бьдьн, бә'р у һ'әмуйед кӧ навда дьминьн.

[35] Чьмки Хwәде wе Сийоне хьлаз кә, бажаред Щьһуда диса ава кә, wе ль wьр бьһеwьрьн у wеда жи щи-wар бьн.

[36] Зар'ед хӧламед Wи, wе ль wьр wар бьн у һ'ьзкьрийед наве Wи wеда бьминьн.