<Зәбур 119

[1] Хwәзи ль йед р'едайә беләк'ә, кӧ һинкьрьна Хӧданда дьжин.

[2] Хwәзи ль йед т'әмийед Wи хwәй дькьн у бь т'әмамийа дьле хwә ль Wи дьгәр'ьн.

[3] Әwана нәһәqийе накьн, ле р'ийед Wида дьмәшьн.

[4] Тә ә'мьр кьр кӧ qанунед Тә бь гӧһдари бенә qәдандьн.

[5] Хwәзи р'ийед мьн р'аст буна, мьн qанунед Тә хwәйкьрана.

[6] Әзе һьнге т'ӧ щар шәрми нәбьм, гава ч'ә'в бьдьм һ'әму ә'мьред Тә.

[7] Бь дьле р'аст әзе пәсьне Тә бьдьм, гава qьраред Тәйә һәq әз һин бьм.

[8] Әзе хwәй кьм qанунед Тә. Тӧ лап дәст жь мьн нәк'ьшинә. БЕТ'

[9] Щаһьл чаwа дькарә р'ийа хwә паqьж хwәй кә? Гава пе хәбәра Тә мьqатийе ль хwә бькә.

[10] Әз бь дьл у щан Тә дьгәр'ьм. Нәһелә кӧ әз жь ә'мьред Тә бьхальфьм.

[11] Созе Тә дьле хwәда хwәй дькьм, wәки ль бәр Тә әз гӧнә нәкьм.

[12] Хӧдано! Тӧ хwәйипәсьн и, Qанунед Хwә Те мьн һин ки.

[13] Әз һ'әму qьраред дәве Тә дькьмә дәнги бь заре хwә

[14] Әз ша дьбьм р'ийа т'әмийед Тәда, чаwа нава һәр хер у хьзнеда.

[15] К'ур дьфькьрьм сәр qанунед Тә, дина хwә дьдьмә р'е-дьрбед Тә.

[16] Бь qанунед Тә әз ша дьбьм, хәбәра Тә т'ӧ щар бир накьм. ГИМЕЛ

[17] Бькә qәнщи хӧламе Хwәр'а, кӧ әз бьжим хәбәра Тәр'а.

[18] Ль мьн вәкә Тӧ ван ч'ә'ва, wан к'әрәмәтед һинкьрьна Хwәр'а.

[19] Әз р'еwи мә ль сәр ә'рде, ә'мьред Хwә нәкә пьшт п'әр'де.

[20] Әз һ'әлийамә у машийамә, һәр гав дәмана qьраред Тә мә.

[21] Тӧ к'ӧбаред ньфьр'кьри һьлтейи, йед кӧ жь ә'мьред Тә хальфинә.

[22] Нав-нучькед wан жь сәр мьн һьлдә, чьмки әз хwәй дькьм wан т'әмийед Тә.

[23] Сәрwер р'удьнин мьqабьли мьн дькьн хәйбә, Ле qуле Тә сәр qанунед Тә к'ур дьфькьрә.

[24] Т'әмийед Тә шабунед мьн ьн әw сә'ви-ширәтк'аред мьн ьн. ДАЛЕТ'

[25] Жийина мьн буйә ах-хwәли анәгори хәбәра Хwә Те мьн сах ки.

[26] Р'ийед хwә Тәва кьрьнә ә'йан Тә щаб да, Тӧ билан кә мьн wан qанунед Хwәда.

[27] Бәр мьн вәкә Тӧ wан р'ийа qанунед Хwә, әзе к'ур бьм ль сәр wан к'әрәмәтед Тә.

[28] Жь к'әсәре әз дьһ'әльм-дьмашьм, гор готьна Хwә бькә кӧ әз qәwин бьм.

[29] Р'ийа дәрәwийе жь мьн дур хә у һинкьрьна Хwә п'ешк'еши мьн кә.

[30] Мьн р'ийа р'астийе дани бәр хwә у qьраред Тә данә пешийа хwә.

[31] Әз бумә машоq т'әмийед Тәр'а, Хӧдан, мьн нәдә qаре шәрмер'а.

[32] Әзе бьбәзьм р'ийа ә'мьред Тәда, гава зедә ки мьн аqьлда. ҺЕ

[33] Р'ийа qанунед Хwә мьн һин кә, Хӧдан, һ'әта әз хwәш бьм әзе хwәй кьм wан.

[34] Мьн сәрwахт кә, һинкьрьна Тә әз хwәй кьм у бь т'әмамийа дьле хwә wе бьqәдиньм.

[35] Мьн бькә wе шьвәр'ийа ә'мьред Хwә, кӧ wанда дәман у һ'әйран ьм әз бь хwә.

[36] Дьле мьн qайл кә т'әмийед Хwәр'а, нә кӧ һәбукева бем гьредане.

[37] Ч'ә'ве мьн хwәй кә жь бош-бәталийе у р'ийа Хwәда Тӧ мьн бьдә жийане.

[38] Qәдим кә созе Хwә бона qуле Хwә, бона wи ә'вде кӧ жь Тә хоф дькә.

[39] Жь wе qара же дьтьрсьм сәр мьн һьлдә, чьмки qәнщ ьн qәйд-qьраред Тә.

[40] Әзи һ'әйра qәйд-qанунед Тә мә, р'ӧһ' бьдә бәр мьн бь р'астийа Хwә. ВАВ

[41] Хӧдан, һ'ӧба Тә бьра мьн бьгьрә, хьлазкьрьна Тә жи wәкә созе Тә.

[42] Һьнге щаба п'ек'әнийед хwә әзе бьдьм, чьмки хәбәра Тәда әз гӧман ьм.

[43] Хәбәра р'астийе жь дәве мьн кем нәкә, чьмки нәфса мьн qьраред Тәда гӧман ә.

[44] Һинкьрьна Тә әзе хwәй кьм жь һәр-һәйе у һәр т'ьм.

[45] Фьреqәтийеда әзе һәр'ьм, чьмки qанунед Тә әз дьгәр'ьм.

[46] Пеш п'адшева т'әмийед Тә әзе бежьм, т'ӧ щар әзе qәт вәнәк'ьшьм.

[47] Ә'мьред Тәр'а әзе ша бьм, к'ижана кӧ әз һ'ьз дькьм.

[48] Дәсте хwә дьрежи ә'мьред Тәйә һ'ьзкьри дькьм у ль сәр qанунед Тә к'ур дьфькьрьм. ЗАЙН

[49] Бир бинә созе Тә да qуле хwә, Тә кьр кӧ wе бькьмә гӧмана хwә.

[50] Тәнгийеда әw ә бина бәр мьн, чьмки созе Тәйә сахийа мьн.

[51] Гәләки дьк'әньн сәр мьн к'ӧбар, ле жь һинкьрьна Тә әз начьм бәрwар.

[52] Хӧдано, qьраред Тәйә һәр-т'ьм әз бир тиньм барьстан дьбьм.

[53] Бой нәп'ака агьр дьдә сәре мьн, кӧ дьбиньм һинкьрьна Тә дьһельн.

[54] Qанунед Тә мьнр'а бунә стьрани, Ль wи wаре мьни фьрари.

[55] Шәве наве Тә әз бир тиньм, Хӧдано, һинкьрьна Тә хwәй дькьм.

[56] Әw п'әшк к'әтә п'ара мьн, чьмки qанунед Тә хwәй дькьм. Һ'ЕТ'

[57] Мьлк'е п'ара мьн, Хӧдан ә, созе мьн хәбәра Тә кьрьн ә.

[58] Бь дьл дькьм ван р'әща йә, бькә р'ә'ме гор соза йә.

[59] Әз фькьрим сәр р'ийед хwә т'әмийед Тәда кьр гавед хwә.

[60] Дьләзиньм, дәрәнги нахьм, кӧ ә'мьред Тә бьqәдиньм.

[61] Т'ор'е нәп'ака дор мьн гьртьн, ле һинкьрьна Тә бир нәкьр мьн.

[62] Ниве шәве әз р'адьбьм, бой qьраред Тәйә р'аст пәсьн дьдьм.

[63] Әз һогьре хофк'ешед Тә мә, кӧ хwәй дькьн qанунед Тә.

[64] Т'ьжи йә дьнйа һ'ӧба Тәва Хӧдан мьнва вәкә qанунед Хwә. ТЕТ'

[65] Тә qәнщи кьр ль qуле Хwә, Хӧдан wәкә готьна Хwә.

[66] Занәбун, сәрwахтийа qәнщ мьн һин кә, чьмки баwәрийа мьн сәр ә'мьред Тә йә.

[67] Һ'әта сәр бәла хwә әз вәнәбум дьхальфим, ле ньһа хәбәра Тә әз хwәй дькьм.

[68] Тӧ qәнщ и у qәнщи жь Тә дьбарә, qанунед Хwә Тӧ мьн һин кә.

[69] К'ӧбар шәр'а мьн дькьн гьли, ле әз ширәтед Тә хwә дькьм хwәйи.

[70] Мәжуйе wан мина дон qәр'ьми йә, ле һинкьрьна Тә мьнр'а әшq у шайи йә.

[71] Qәнщ бу кӧ сәр бәла хwә вәбум у qанунед Тә әз сәр вәбум.

[72] Мьнр'а һинкьрьна жь дәве Тә жь һ'әзар зер' у зиви четьр ә. s ЙОД

[73] Дәстед Тә әз хӧльqандьм у чекьрьм, мьн сәрwахт кә кӧ ә'мьред Тә әз һин бьм.

[74] Хофк'ешед Тәйе мьн бьбиньн у ша бьн, бона wе йәке кӧ созе Тәйә гӧмана мьн.

[75] Заньм Хӧдан, qьраред Тә бь р'астийе нә, wәкә амьнийа Хwә бәр бевьла мьн дәрхьстьнә.

[76] Бьра амьнийа Тә бьбә мьнр'а барьстани, wәкә wи созе qуле Хwәр'а Тә дайи.

[77] Р'ә'ма Тә бьра сәр мьнда бе әз бьжим, чьмки һинкьрьна Тәр'а хwәш бәнгьзим.

[78] Бьра к'ӧбаред бӧхдана мьн дькьн шәрми бьн, ле qанунед Тәда ньн к'ур фькьред мьн.

[79] Бьра вәгәр'ьн сәр мьнда бен хофк'ешед Тә у әw кәсед кӧ нас дькьн wан т'әмийед Тә.

[80] Дьле мьн бьра qанунед Тәда беләк'ә бә, кӧ нәфса мьн wе йәкеда шәрми нәбә. К'АФ

[81] Әз дьһ'әльм жь дәст һ'әйра азадийа Тә, мьн гӧман данийә ль сәр wе хәбәра Тә.

[82] К'әрби хәбәра Тә к'орда чунә ч'ә'ве мьн у дьбежьм: «К'әнге Те бьки барьстанийа мьн?»

[83] Әз бум мина ә'йаре нав дуда, ле qанунед Тә мьн бәр'нәда.

[84] Qуле Тәйе чьqаси һивийа Тә бә? Диwана пәйк'әтийа wе к'әнге жь Тә бә?

[85] К'ӧбара бона мьн ч'ә'л к'олайә, кӧ нә ль гора һинкьрьна Тә йә.

[86] Һ'әму ә'мьред Тә амьни нә, һәwар! Әw щийе ами-т'ам пәй мьн к'әти нә!

[87] Һьндьк мабу әз сәр дьне нәһьштама ле мьн qәйдә-qанунед Тә йәк бәр'нәда.

[88] Wәкә һ'ӧба Хwә мьн нуйәжийин кә, әзе жи хwәй кьм т'әмийед дәве Тә. ЛАМЕД

[89] Хӧдано, хәбәра Тә һ'әта-һ'әтайе йә, әw ә'зменда qәwин-qәдим ә.

[90] Амьнийа Тә qӧр'нә-qӧр'нә дьминә, Тә дьнйа ава кьр, әw qәwин сәкьнийә.

[91] Wәкә qьрара Тә әw һ'әта иро сәкьнинә, чьмки әw һ'әму жи хьзмәтк'аред Тә нә.

[92] Һәгәр һинкьрьна Тә шабуна мьн нибуйа, әзе зува мә'рьмийа хwәда ӧнда бума.

[93] Һ'әта сах ьм әз бир накьм qанунед Тә, чьмки бь wан Тӧ мьн дьди жийанә.

[94] Әз п'ара Тә мә, мьн хьлаз кә, чьмки дьгәр'ьм әз qанунед Тә.

[95] Нәп'ак һивийе нә мьн ӧнда кьн, ле т'әмийед Тәда әз к'ур дьбьм.

[96] Мьн дит кӧ ахьрийа һәр тьшти һәйә, ле бәле ә'мьре Тә беахьри йә. МЕМ

[97] Һинкьрьна Тә чьqаси әз һ'ьз дькьм! Т'әмамийа р'оже әз сәр wе дьфькьрьм.

[98] Ә'мьред Тә мьн жь нәйара сәрwахттьр дькьн, чьмки һәр т'ьм әw т'әви мьн ьн.

[99] Әз жь һ'әму дәрсдаред хwә билантьр бумә, чьмки фькьред мьн сәр т'әмийед Тә нә.

[100] Жь каләмера аqьлтьр бумә, чьмки хwәй дькьм qәйдә-qанунед Тә.

[101] Әз ньгед хwә жь р'ийа хьраб дур дьхьм, wәки хәбәра Тә әз бьqәдиньм.

[102] Әз жь qьраред Тә дур нак'әвьм, чьмки Тӧ йи дәрсдаре мьн.

[103] Хәбәра Тә чьqас ширьн ә гәwрийа мьнда, әw жь һьнгьв зедәтьр ә дәве мьнда.

[104] Бь qанунед Тә занәбуне әз дәст тиньм, ләма кӧ әз һәр р'ийа дәрәw дьжәньм. НУН

[105] Хәбәра Тә ч'ьра гавед мьн ә у р'онайа шьвәр'ийед мьн ә.

[106] Мьн сонд хwарийә, әзе биньм сери, кӧ qьраред Тәйә р'аст биньмә щи.

[107] Хӧдан мьн гәләк тәнгаси к'ьшандьн, wәкә хәбәра Хwә р'ӧһ' бьдә бәр мьн.

[108] П'ешк'ешед бь дьл жь дәве мьн qәбул кә у qьраред Хwә Тӧ ль мьн һин кә.

[109] Әз һәр гав бәр һешийа мьрьне мә, ле һинкьрьна Тә мьн бир нәкьрийә.

[110] Нәп'ака бона мьн т'әләк данинә, ле әз жь qәйдә-qанунед Тә нәхальфимә.

[111] Т'әмийед Тә wаре мьни һ'әта-һ'әтайе йә, чьмки әwә дьле мьнда wәкә шайийе йә.

[112] Мьн qьрар кьр, qанунед Тә хwәй кьм, жь һәр-һәйе һ'әта хьлазийе. САМЕХ

[113] Йед дӧдьли р'әш ьн бәр ч'ә'ве мьн ле һинкьрьна Тә йә һ'ӧба дьле мьн.

[114] Тӧ йи сьт'ар, мәрт'ала мьн, хәбәра Тә йә гӧмана мьн.

[115] Һәй хьрабно, жь мьн дур к'әвьн, кӧ ә'мьред Хwәдейе мьн бен хwәйкьрьн.

[116] Гор созе Хwә стун бә мьнр'а, әзе бьжим, нәкә кӧ әз гӧманеда шәрми бьм.

[117] Пьштоване мьн бә, әзе хwәйкьри бьм у һәр т'ьм qанунед Тәда әзе агадар бьм.

[118] Тӧ йед жь qанунед Тә дьхальфьн давежи, чьмки һ'ьләк'арийа wанда һәйә бош-бәтали.

[119] Нәп'акед дьне бона Тә һ'әму мина бисо нә, ләма т'әмийед Тә, әw бона мьн һ'ӧба дьла нә.

[120] Жь саwа Тә әз сәр һәвда дьләрьзьм, жь qьраред Тә әз дьтьрсьм. Ә'ЙН

[121] Мьн һәqи у р'асти кьрьн, мьн нәдә дәсте зордаред мьн.

[122] Созе ачьхьйе бьдә qуле Хwә, кӧ йе к'ӧбар әw нькарьбә зордар бә.

[123] Ч'ә'ве мьн qәр'ьмин һивийа азадийа Тә мә, һивийа хәбәра р'астийа Тә мә.

[124] Qуле хwәр'а wәкә һ'ӧба Хwә бькә у qанунед Хwә Тӧ мьн һин кә.

[125] Әз хӧламе Тә мә, аqьл бьдә мьн, кӧ т'әмийед Тә мьнва бен нас кьрьн.

[126] Иди wәхте кьрьна Хӧдан ә, чьмки һинкьрьна Тә т'әр'ьбандьнә.

[127] Ле бәле әw һ'ьзкьрьна ә'мьред Тә, мьнр'а жь зер' у жь зер'е хальс четьр ә.

[128] Ләма əз р'аст хwә ль һ'әму qанунед Тә дьгьрьм, ле жь һ'әму р'ийед дәрәw әз дьә'ньрьм . П'Е

[129] Т'әмийед Тә һ'әйрә һ'ӧжмәк'ар ьн, ләма әз хwә wанр'а дькьм һ'әйран.

[130] Ә'йанбуна хәбәра Тә р'онайи дькә, әw мәрьвед садә сәрwахт дькә.

[131] Дәве хwә вәдькьм к'әсәр те мьн, ә'мьред Тә нә бина бәр мьн.

[132] Дина Хwә бьдә мьн, мьн wәрә р'ә'ме, wәкә ә'дәте Хwә, бой машоqед наве Хwә.

[133] Хәбәред Хwәда Тӧ гавед мьн бьшьдинә, һ'ӧкӧме хьрабийе бьра ль сәр мьн нәминә.

[134] Мьн хьлаз кә жь зордара, әзе бьqәдиньм qәйдә-qануна.

[135] Сьфәте Хwә гӧл дә сәр qуле Хwә, мьн һин бькә qәйд-qанунед Хwә.

[136] Ч'әмед ава жь ч'ә'вед мьн дьк'ьшьн, чьмки мәрьв һинкьрьна Тә хwәй накьн. ТСАДЕ

[137] Тӧ сәр р'астийе йи, Йа Хӧдан у qьраред Тә р'астә-р'аст ьн.

[138] Т'әмийед Тәйә Тә т'әми кьрьнә, әw р'аст ьн у сәре р'астийе гьртьнә.

[139] Хирәта мьн мьн дьһ'әлинә, чьмки нәйар готьна Тә бир найинә.

[140] Созе Тә гәләки амьн ә у хӧламе Тә wи һ'ьз дькә.

[141] Әз йәки ньмьзи беqәдьр ьм, ле qанунед Тә әз бир накьм.

[142] Һәqийа Тә һәqийа һәр-һәйи йә у һинкьрьна Тә р'асти йә.

[143] Дәрд у кӧл һатьн сәре мьн, ле ә'мьред Тә нә, шабуна мьн.

[144] Һәqийа т'әмийед Тә һ'әта-һ'әтайе йә, Бона кӧ әз бьжим, мьн сәрwахт кә. QОФ

[145] Хӧдан, әз бь дьл у щан гази дькьм, мьн бьбьһе кӧ qанунед Тә бьqәдиньм.

[146] Мьн хьлаз кә һәwар дькьм, әзе т'әмийед Тә бьqәдиньм.

[147] Бәрбанге р'адьбьм дькьм гази, мьн гӧмана хwә хәбәра Тә ани.

[148] Бәдилед шәве ч'ә'ве хwә вәдькьм у ль сәр созе Тә к'ур дьфькьрьм.

[149] Мьн бьбьһе wәкә wе һ'ӧба Хwә, Хӧдано, wәкә ә'дәте Хwә мьн сах кә.

[150] Йед хwә нәһәqийе гьртьнә незик дьбьн, wан жь һинкьрьна Тә хwә дур гьртьн.

[151] Ле Хӧдан Хwәха незик ә, һ'әму ә'мьред Wи р'асти нә.

[152] Һе бәреда әз т'әмийед Тә һин бумә, һ'әта-һ'әтайе Тә әwана qәдим кьрьнә. Р'ЕШ

[153] Һ'але мьнда бьньһер'ә, мьн хьлаз кә, чьмки бир накьм әз һинкьрьна Тә.

[154] Пьшта һәqийа мьн бьгьрә, мьн азад кә, wәкә хәбәра Хwә Тӧ мьн сах кә.

[155] Жь йе нәп'ак хьлазбун дур ә, чьмки qанунед Тә әw нагәр'ә.

[156] Йа Хӧдан, р'ә'ма дьле Тә гәләк ә, wәкә һәqийа Хwә мьн сах хwәй кә.

[157] Гәләк ьн нәйар у п'әйк'әтийед мьн, ле т'әмийед Тә хwә дур нәхьст мьн.

[158] Зьвер дьбьм кӧ дьбиньм р'ек'әтийа wан нькарьбу хәбәра Тә щи банийа.

[159] Бьньһер'ә чьqас әз һ'ьз дькьм qанунед Тә, бькә ль гора wе һ'ӧба Хwә, мьн хwәй кә.

[160] Хәбәред Тә т'әмамийа хwәва р'асти нә, һ'әму qьраред Тәйә һәq, һ'әта-һ'әтайи нә. ШИН

[161] Сәрwер щийе ами-т'ам пәй мьн к'әти нә, ле дьле мьн хәбәред Тәва хофи йә.

[162] Созе Тәр'а әз гӧл дьдьм, чаwа сәр хьзне әз вәбьбьм.

[163] Дьжәньмә дәрәwийе, же зьвер ьм, ле һинкьрьна Тәр'а әз һ'әйран ьм.

[164] Р'оже һ'әфт щара пәсьне Тә дьдьм, бона qьраред Тә кӧ р'аст дьбиньм,

[165] Әwед хwәйе һинкьрьна Тә нә, жь р'е нак'әвьн, ә'дьлайеда нә.

[166] Әз хьлазкьрьна Тәда гӧман ьм, Хӧдано, ә'мьред Тә әз дьqәдиньм.

[167] Әз т'әмийед Тә хwәй дькьм у гәләки wан һ'ьз дькьм.

[168] Әз хwәй дькьм т'әми у qанунед Тә, чьмки һ'әму р'ийед мьн бәр ч'ә'ве Тә нә. Т'АВ

[169] Хӧдан, бьра һеwарза мьн бе щәм Тә, wәкә хәбәра Хwә Тӧ мьн сәрwахт кә.

[170] Бьра р'әщайе мьн бе бәр Тә, wәкә хәбәра Хwә мьн хьлаз кә.

[171] Жь дәве мьн дәр тен шькьрдари, чьмки qанунед Хwә Тӧ мьн һин дьки.

[172] Бьра зьмане мьн хәбәра Тә бькә дәнги, чьмки һ'әму ә'мьред Тә әw ьн р'асти.

[173] Бьра дәсте Тә ль мьн пьштован бә, чьмки мьн бьжартьн qәйдә-qанунед Тә.

[174] Хӧдано, әз һ'әйра хьлазкьрьна Тә мә, шабуна мьн жи һинкьрьна Тә йә.

[175] Бьра әз сах бьм, пәсьне Тә бьдьм бьра qьраред Тә алик'аре мьн бьн.

[176] Мина пәза ӧндабуйи әз хальфим, qуле Хwә бьгәр'ә, әз ә'мьред Тә бир накьм .