<Зәбур 109

[1] Хwәдейе шькьрдарийе дьдьм! Хwә кәр' нәкә.

[2] Чьмки дәве нәп'ак у мьхәнәта сәр мьн вәбунә, бь зьмане дәрәw хәйба мьн дькьн.

[3] Бь готьнед жәнандьне дора мьн дьгьрьн, щийе ами-т'ам qьр'ка мьн дьгьрьн.

[4] Жь бәр һ'ьзкьрьна мьнва шькийате мьн дькьн, ле әз бона wан дӧа дькьм.

[5] Жь бәр qәнщийева хьрабийе ль мьн дькьн, жь бәр һ'ьзкьрьна мьнва әw дьжәньн.

[6] Нәп'акәки сәр wир'а Тӧ к'ьфш кә, бьра шькийаткьр ль мьле wийи р'асте бьсәнә.

[7] Гава бе ль бәр диwане, бьра әw гӧнәк'ар дәре у дӧайе wи жи гӧнәкьрьн бе һ'әсабе.

[8] Бьра р'ожед wи кьн бьн у qӧльхе wи йәки дьн бьстинә .

[9] Бьра зар'ед wи сеwи бьминьн у жьна wи жи жьнәби.

[10] Дә бьра зар'ед wи дәро-дәр бьн у п'арс кьн, жь малед wанә хьрабә бәри wан дьн .

[11] Бьра хwәйе дәйн т'әмамийа һәбука wи же бьстинә у йед хәриб к'әда wи т'алан кьн.

[12] Бьра дьле кәсәки ль wи нәшәwьтә у гӧне кәсәки ль сеwийед wи нәйе.

[13] Бьра т'ур'а wи бе бьр'ине, наве wи ньсьле дьнда бе һьлдане.

[14] Бьра беолитийа кал-бавед wи ль бәр Хӧдан бе биранине у гӧнәйе дийа wи нәйе р'әситкьрьне.

[15] Бьра һәр т'ьм ль бәр ч'ә'ве Хӧдан бьн у Әw биранина wан жь дьне бьдә һьлдане.

[16] Чьмки нәкьрә бира хwә кӧ р'ә'ме бькә, ле әw пәй мәрьве бәләнгаз, к'әсиб у хwәйе дьле к'әсәр к'әт кӧ wи бькӧжә.

[17] Әwи ньфьр' һ'ьз кьр, бьра ньфьр' сәр wида бе, дӧа-дьрозгә нәхwәст, бьра әw же дур к'әвә.

[18] Ньфьр' мина к'ьнщәке ль хwә кьр, дә бьра әw ньфьр' мина аве һәр'ә нав-дьл у мина бьзьр бьк'әвә һәстуйед wи.

[19] Бьра бьбә мина к'ьнща wийә хwәкьрьне у мина бәнпьшта wийә кӧ һәр т'ьм гьре дьдә.

[20] Дә бьра әв бә һәqе шькийаткьред мьн алийе Хӧданда, кӧ бона нәфса мьн хьраб хәбәр дьдьн!

[21] Ле бәле Тӧ, Хwәйи, Хӧдан, бона хатьре наве Хwә алик'арийе ль мьн бькә ль гора qәнщи у амьнийа Хwә мьн хьлаз кә.

[22] Чьмки әз бәләнгаз у фәqир ьм, дьле хwәда бьриндар ьм.

[23] Әз мина сийа еваре дәрбаз бум чум, мина кӧлийа һатьмә даwшандьне.

[24] Жь дәст р'ожийа әз qӧдум к'әтьм у qальбе мьн жь һ'әдәме хwә һ'әлийа машийа.

[25] Әз бумә пек'әнийе шькийаткьред хwә, мьн дьбиньн сәре хwә дьһ'әжиньн .

[26] Али мьн бькә, Хӧдан, Хwәдейе мьн, мьн хьлаз кә анәгори һ'ӧба Хwәйә амьн.

[27] Бьра бьзаньбьн кӧ әва жь дәсте Тә йә у ван йәка Тӧ, Хӧдан дьки.

[28] Әвана бьра ньфьр'а бькьн, ле Те дӧа ль мьн бьки, гава әw һ'ьщуми ль сәр мьн бькьн, бьра әw шәрми бьн, ле хӧламе Тә бьра ша бә.

[29] Бьра qарада бьминьн шькийаткьред мьн у р'обәтийа wан мина к'ьнща ль сәр wан бә.

[30] Әзе гәләки бь дәве хwә шькьрийе бьдьмә Хӧдан у нава гәләкада әзе пәсьне Wи бьдьм.

[31] Чьмки Әw ль мьле к'әсибийи р'асте дьсәнә, wәки wи жь ломәк'ара хьлаз кә.