<Зәбур 40

[1] Әз бь сәбьре һивийа Хӧдан мам, Wи сәр мьнда ньһер'и у заринийа мьн бьһист,

[2] жь wерана ч'ә'ле әз дәрхьстьм, жь wе ч'ьм-ч'ьма шьлә-һ'әр'и, ньгед мьн данинә ль сәр qәйе у гавед мьн qәдим кьрьн.

[3] Стьранәкә ну кьрә дәве мьн, зәбурәкә әшqи Хwәдейе мә. Гәләке бьбиньн у wе хоф кьн у хwә бьдьнә бьн сийа Хӧдан.

[4] Хwәзи ль wи мәрьви, кӧ хwә спартийә Хӧдан, дина хwә надә йе к'ӧбар у йед хwә данә п'утед дәрәw.

[5] Гәләк ьн кьрьнед Тә, йа Хӧдан, Хwәдейе мьн, әw к'әрәмәт у фькьред Тәйә ль сәр мә, т'ӧ һәйин т'ӧнә мина Тә. Мьне әw сальх кьрана у бькьра дәнги, ле беһ'әсаб ьн, найенә готьн.

[6] Qӧрбан у дийари Тә бәгәм нәкьр, Тә гӧһе мьн вәкьр, т'әвайишәwат у дийарийа паqьжбуне Тә нәхwәстьн.

[7] Һьнге мьн гот: «Ва мә әз һатьм, к'ьтеба гӧломаткда бона мьн ньвисар ә.

[8] Әз дьхwазьм хwәстьна Тә бьqәдиньм, йа Хwәде у ва йә һинкьрьна Тә дьле мьнда йә» .

[9] Мьн нава щьвина гьранда мьзгини да һәqийа азадкьрьна Тә ә'лам кьр. Ва йә мьн левед хwә нәдан сәр һәв, йа Хӧдан, Тӧ зани!

[10] Мьн һәqийа Тә дьле хwәда вәнәшарт, амьнийа Тә у хьлазкьрьна Тә мьн сальх кьр, дьловани у р'астийа Тә мьн жь щьвина гьран вәнәшарт.

[11] Р'ә'ма Хwә, йа Хӧдан, жь мьн дур нәхә, бьра дьловани у амьнийа Тә һәр гав мьн хwәй кьн.

[12] Хьрабийа беһ'әсаб дора мьн гьрт, нәһәqийед мьн хwә мьнр'а гиһандьн, әw жь п'ор'е сәре мьн зә'фтьр ьн, р'ийа хwә жи нькарьм бьбиньм, дьл жи мьнва иди нәмайә.

[13] Бькә р'ьсqат , Хӧдано, мьн хьлаз кә, йа Хӧдан, зу бькә һәwара мьн wәрә.

[14] Бьра шәрми бьн у һәвр'а т'әвайи бьбьнә р'обәт, йед кӧ пәй мьн к'әтьнә у мьрьна мьн дьхwазьн. Дә бьра шәрми бьн, пашда бьр'әвьн, йед кӧ хьрабийа мьн дьхwазьн.

[15] Бьра шәрмийа хwәда әw сущдар бьн, йед кӧ һуйи мьн дькьн.

[16] Һ'әмуйед кӧ ль Тә дьгәр'ьн, бьра пе Тә әшq у ша бьн у йед хьлазкьрьна Тә һ'ьз дькьн, «Хӧдан мәзьн ә!» т'ьме бежьн

[17] әзи шкәстийи бәләнгаз ьм, ле бәле бона мьн Хӧдан хәм дькә. Алик'ар у хьлазкьре мьн Тӧ йи! Хwәдейе мьн дәрәнги нәк'әвә.