Зәбур 35
[1] Йа Хӧдан, мьqабьли мьqабьлед мьн бә, шәр'кьред мьнр'а шәр' бькә.
[2] Һьлдә зьрьһ' у мәрт'але, р'абә wәрә һәwаре!
[3] Р'ьм у шур бавеж, пешийа пәйк'әтийед мьн бьгьрә, бежә нәфса мьн: «Әз хьлазкьре тә мә».
[4] Бьра пәйк'әтийед мьн шәрми бьн, бьбьн р'обәт, бьра вәгәр'ьн бьбьн сосрәт, әwед кӧ дьхwазьн хьрабийе мьн бькьн.
[5] Бьра бьбьнә мина пач'а ль бәр бе, мьлйак'әте Хӧдан бәри wан дә.
[6] Бьра р'ийа wана тә'ри у шьмшат бә, мьлйак'әте Хӧдан пәйк'әтийе wан бә.
[7] Бе сәбәб т'ор' бона мьн авитьнә ль сәр ч'ә'ле кӧ бе сәбәб к'олан бона нәфса мьн.
[8] Бьра ньшкева хәзәб ль сәр wанда бе, т'ор'а wанә вәшарти wан бьгьрә, бьра әw qәдә-бәла бе сәре wан.
[9] Һьнге әзе пе Хӧдан әшq бьм, бь азадкьрьна Wи әзе ша бьм.
[10] Һ'әму һәстуйед мьне бежьн: «Хӧдан! К'и мина Тә хьлаз дькә, йе сьст жь дәсте зордаре wи, фәqир у бәләнгаз жь т'аланкьре wи».
[11] Шә'дед дәрәw р'адьбьн, тьштед әз һаш пе т'ӧнә мә дькьнә стуйе мьн.
[12] Жь бәр qәнщийева хьраби мьн кьрьн, әз нәфседа сеwи һьштьм.
[13] Ле мьн нәхwәшийа wанда к'ӧрх хwә дькьр, нәфса хwә жи бь р'ожийа дьда щәфе. Дә бьра әw дӧайе мьн ль мьн вәгәр'ә .
[14] Әз т'әви wан ӧса бум, чаwа т'әви пьсмам у бьре хwә, мина йәки бона дийа хwә шине бькә, әз бь к'әдәре ньмьз дьбум.
[15] Ле гава әз к'әтьм, әwана щьвийан ль мьн к'әнийан, qачах щьвийан мьqабьли мьн, ле мьн ньзаньбу чьма әз дьзерандьм, нәдьсәкьнин.
[16] Беар ль мьн к'әнийан, данә һелана дьранед хwә ль мьн ч'ьр'ькандьн.
[17] Хwәйе мьн! Һ'әта к'әнге Те дина хwә бьдейи? Нәфса мьн хьлаз кә жь дәрбед wан, ә'мьре мьн жи жь щәwрькед шера.
[18] Һьнге щьвата мәзьнда, әзе пәсьне Тә бьдьм, нава мьхӧлqәта мәзьнда Тә бьмбарәк кьм.
[19] Бьра дьле хwә мьн ша нәкьн, йед бе сәбәб бунә дьжмьн, бьра бь ч'ә'ва һәвр'а нәкьн, йед щийе ами-т'ам дьжәньнә мьн .
[20] Әw сәр ә'дьлайе хәбәр надьн, ле мьqабьли мәрьвед дьнейә мьлаһим, шеwьред һ'ьләк'ар дьфькьрьн.
[21] Дәве хwә сәр мьн мәзьн вәдькьн у дьбежьн: «Ва йә! Ва йә! Ч'ә'ве мә дитьн».
[22] Йа Хӧдан, Тә дит! Хwә кәр' нәкә! Хwәйе мьн! Тӧ жь мьн дур нәк'әвә.
[23] Һена мьнда Тӧ һ'ьшйар бә, ль сәр мьнда бьньһер'ә, Хwәйе мьн у Хwәдейе мьн.
[24] Анәгори р'астийа Хwә, һәqийе ль мьн бькә, Хӧдан Хwәдейе мьн, кӧ әw ль сәр мьн нәк'әньн.
[25] Бьра дьле хwәда нәбежьн: «Мәрәме дьле мә бу!» у бьра нәбежьн «Мә әw даqӧртанд!»
[26] Бьра шәрми бьн у һ'әму бьбьнә р'обәт, йед кӧ дьле хwә мьн ша дькьн. Бьра шәрмийе у сосрәтийе ль хwә wәргьрьн, йед кӧ сәр мьнр'а хwә бьльнд дьгьрьн.
[27] Бьра әшq у ша бьн, йед кӧ р'успитийа мьн дьхwазьн у т'ьме бьра бежьн: «Хwәде мәзьн ә, кӧ хер-хwәшийа ә'вде Хwә дьхwазә!»
[28] Зьмане мьне һәqийа Тә сальх кә у т'әмамийа р'оже пәсьне Тә бьдә.