<Зәбур 118

[1] Шькьрийе бьдьнә Хӧдан, Әw qәнщ ә у һ'ӧба Wи һ'әта-һ'әтайе йә!

[2] Дә бьра Исраел бежә: «Һ'ӧба Wи һ'әта-һ'әтайе йә».

[3] Дә бьра мала Һарун бежә: «Һ'ӧба Wи һ'әта-һ'әтайе йә».

[4] Дә бьра хӧданхоф бежьн: «Һ'ӧба Wи һ'әта-һ'әтайе йә».

[5] Тәнгасийеда мьн гази Хӧдан кьр, Хӧдан щаб да, әз дәрхьстьмә фьрәйе.

[6] Хӧдан т'әви мьн ә, әз натьрсьм, инсане чь ль мьн бькә?

[7] Хӧдан к'омәкдаре мьн ә, әзе ахьрийа нәйаред хwә бьбиньм.

[8] Йа п'ак ә Хӧданда гӧман бьн, нә кӧ хwә бьсперьнә бәнда.

[9] Йа п'ак ә Хӧданда гӧман бьн, нә кӧ хwә бьсперьнә мир у бәга.

[10] Һ'әму мьләта сәр мьнда гьртьн, ле бь наве Хӧдан әз wан һурдәхwәши дькьм.

[11] Һәр алийава дора мьн гьртьн, ле бь наве Хӧдан әз wан һурдәхwәши дькьм.

[12] Мина моза дора мьн гьртьн, ле мина агьре стьрийа әw тәфийан, бь наве Хӧдан әз wан һурдәхwәши дькьм.

[13] Әз qәwин дә'ф дам кӧ бьк'әвьм, ле Хӧдан али мьн кьр.

[14] Хӧдан qәwат у qӧдрәта мьн ә, Әw бона мьн хьлазкьр ә.

[15] Дәнге шабун у сәрк'әтьне жь конед р'аста те: «Дәсте Хӧдани р'асте qәwате дькә.

[16] Дәсте Хӧдани р'асте бьльндкьри йә, дәсте Хӧдани р'асте qәwате дькә».

[17] Әз намьрьм, әзе бьжим, кьрьнед Хӧдан әзе сальх кьм.

[18] Хӧдан гәләки сәре мьн кьр, ле әз нәдамә дәсте мьрьне.

[19] Дәргәһед р'астийе мьнр'а вәкьн, кӧ бьк'әвьмә нав wан у шькьрийе бьдьмә Хӧдан.

[20] Әва дәргәһе Хӧдан ә, р'асте wьрр'а бьк'әвьне.

[21] Шькьр жь Тәр'а, Тә дәнге мьн бьһист у мьнр'а буйи хьлазкьр.

[22] Әw кәвьре кӧ һоста т'әхсир кьр, әw бу сәре ә'нишке.

[23] Әв йәк жь алийе Хӧданда qәwьми у ль бәр ч'ә'ве мә һ'әйр-һ'ӧжмәк'ар ә!

[24] Әва р'ожа Хӧдан хӧльqанд, wәрьн әм веда әшq у ша бьн.

[25] Һәwар Хӧдан, мә хьлаз кә! Һәwар Хӧдан, мәр'а ль һәв бинә.

[26] Бьмбарәк ә әwе кӧ бь наве Хӧдан те! Әм жь Хана Хӧдан wә бьмбарәк-пироз дькьн .

[27] Хӧдан ә Хwәде, Wи әм р'онайи кьрьн. Пе бәна qӧрбана щәжьне гьредьн, һ'әта стьруйе горигәһе бьбьн.

[28] Тӧ йи Хwәдейе мьн, әзе шькьрийе бьдьмә Тә, Тӧ йи Хwәдейе мьн, әзе Тә бьльнд кьм.

[29] Шькьрийе бьдьнә Хӧдан, Әw qәнщ ә у һ'ӧба Wи һ'әта-һ'әтайе йә! АЛЕФ