<Зәбур 68

[1] Бьра Хwәде р'абә, нәйаред Wи бәла бьн, пәйк'әтийед Wи бәр ч'ә'ве Wи бьр'әвьн!

[2] Чаwа ду бәла дьбә, ӧса Тӧ wан бәла кә, чаwа шьма ль бәр агьр дьһ'әлә, бьра нәп'ак жи ль бәр Хӧдан ӧнда бьн.

[3] Ле йед р'аст бьра ша бьн, ль бәр Хwәде бьра гәш бьн, бь шабуне бьра әшq бьн.

[4] К'ӧламе һун Хӧданр'а бежьн, әшqи наве Wи һун бьстьрен, бьльнд кьн Йе ль ә'wра сийарбуйи те, наве Wи Хӧдан ә, бәр Wи ша бьн.

[5] Баве сеwийа, тайе жьнәбийа, Хwәдейе Хана Хwәйә пирозда.

[6] Хwәде бекәса малда дьдәбьринә, р'е дьдә ль бәр һесира, ле шәр'уд wе щийе демда бьминьн.

[7] Хwәдейо! Тӧ кӧ пешийа щьмә'та Хwәва чуйи у бәр'ийева дәрбаз буйи, (Сәла)

[8] ә'рд һ'әжийа, ә'зман жь диндара Хwәде ньqьти, жь диндара Хwәдейе Синайе, Хwәдейе Исраеле.

[9] Барана хер-бәрәк'әтийе баранд, Хwәдейо. Wаре Тәйи wәстийайи, Тә qәwат дайе,

[10] кәрийе пәзе Тә ль wьр һеwьри. Тә жь qәнщийа Хwә, Хwәдейо, бәләнгазар'а т'ьвдарәк дит.

[11] Хӧдан дькә фәрмани, к'ӧлфәт дьбьнә мьзгиндаред п'ьр'ани.

[12] Дьр'әвьн п'адшед ордийа дьр'әвьн, ле кәванийед малда т'ален бәла дькьн,

[13] wан хьшьред дьлqе кәwе п'әр'е wанә зивкьри у баске wанә зер'е хальси. Чьма һьнәкә жь wә хwә пашда дьгьрьн у тәwлада хwә вәдьшерьн*?

[14] Гава Йе Һәри Зор п'адша ль wьр бәла-бәлайи кьрьн, әw щи бу мина багәра сәр ч'ийайе Салмоне.

[15] Һәй ч'ийайе Башане , ч'ийайе зор! Һәй ч'ийайе гәләк сәри, ч'ийайе Башане!

[16] Һәй ч'ийайе гәләк сәри, тӧ чьма ӧса бь һ'әвсудийе дина хwә дьдейи ль wи ч'ийайе к'ижан Хwәде бәгәм кьрийә ле бьминә? Бәле Хӧдане һ'әта-һ'әтайе ле бьминә.

[17] Ә'рәбед Хӧдан бь һ'әзар-һ'әзара нә, Хӧдан жь Синайе һатә Щийе Пироз .

[18] Әw һьлк'ьшийа чу жор, һесир т'әви Хwә бьрьн у п'ешк'еш стандьн жь мәрьва, һ'әта жь wан жи кӧ нәдьхwәстьн, Хӧдан Хwәде ль wьр бьминә .

[19] Шькьр Хӧданр'а, Хwәдейе хьлазкьре мәр'а кӧ һәр р'ож баре мә һьлдьгьрә. (Сәла)

[20] Хwәде бона мә Хwәдейе азадкьр ә, Хӧдан Хwәйи мә жь мьрьне хьлаз дькә.

[21] Бәле Хwәдейе сәред дьжмьнед Хwә бьһ'ьнщьр'инә, qафед wанә пьр'ч'ә кӧ нава беолитийеда дьминьн.

[22] Хwәйи гот: «Әзе нәйара жь Башане, жь к'урайийа бә'ре вәгәр'иньм,

[23] wәки һун ньгед хwә хунеда бьшон, зьмане сәйед wә жи хуна нәйара бьчәлпиньн».

[24] Дәрбазбуна Тә дьбиньн, Хwәдейо, дәрбазбуна Хwәдейе мьн, П'адшайе мьни чуйина Щийе Пироз.

[25] Пешийева дәнгбеж ьн, пашийева сазбәнд ьн, наведа жи qиз дәфька дьхьн.

[26] «Щьвинада пәсьне Хӧдан Хwәде бьдьн, һун һ'әмуйед кӧ жь канийа Исраел ьн!»

[27] Ль wьр пешийа wан Бенйамина бьч'ук дьчә, паше сәрwеред Щьһудайе к'ома хwәва, сәрwеред Зәбулоне, сәрwеред Нәфтәлийева.

[28] Хwәдейо, wе qәwата Хwә нишан кә, бь к'ижане Хwәдейо, Тә али мә кьр,

[29] жь П'арьстгәһа Хwәйә Оршәлиме, дәра кӧ п'адша Тәр'а дийарийа тиньн.

[30] Ль р'ә'wьре нава qамиша һьле, т'әви бохед нава гар'анед мьләта, һ'әта кӧ дәвәр'у бен у зив дийари биньн. Дә бәла-бәлайи кә wан мьләта, к'ижанед кӧ шер' дьхwазьн.

[31] Ә'сьлзадәйе жь Мьсьре бен, әтйупи wе дәсте хwә дьрежи Хwәде кьн.

[32] Гәли п'адшатийед дьнйайе, Хwәдер'а бьстьрен, әшqи Хӧдан бьстьрен. (Сәла)

[33] Wир'а кӧ ль сәр ә'зманед qәдими сийарбуйи йә. Ва йә Әw дькә дәнги, бь дәнге Хwәйи зор.

[34] Qәwата Хwәде ә'лам кьн! Р'умәта Wийә мәзьнә ль сәр Исраеле у qӧдрәта Wийә нава ә'wрада.

[35] Хwәдейо Тӧ хоф и, wи Щийе Хwәйи Пирозда. Хwәдейе Исраеле, Әw qәwате у карине дьдә щьмә'та Хwә. Пәсьне Хwәде бьдьн!