<Зәбур 116

[1] Әз Хӧдан һ'ьз дькьм, Әwи дәнге заринийа мьн бьһист.

[2] Әwи гӧһе Хwә да сәр мьн, әзе т'әмамийа р'ожед хwә гази Wи кьм.

[3] Хӧмама мьрьне сәр мьнда гьрт, дәрд-кӧлед гор'ьстен әз дитьм, тә'ли тәнги сәр мьнда һат.

[4] Һьнге мьн гази наве Хӧдан кьр: «Хӧдано! Ә'мьре мьн хьлаз кә».

[5] Хӧдан херхwаз у амьн ә, Хwәдейе мә дьлшәwат ә.

[6] Хӧдан йед садә хwәй дькә, гава әз к'әтьм, әз хьлаз кьрьм.

[7] Нәфса мьн wәрә сәр р'ьһ'әтийа хwә, чьмки Хӧдан тәр'а qәнщи кьр.

[8] Тә нәфса мьн жь мьрьне хьлаз кьр, ч'ә'ве мьн жи жь һесьра паqьж кьр, ньге мьн жи льк'ӧмандьне Тә хwәй кьр.

[9] Әзе бьгәр'ьм ль бәр Хӧдан wаре зендийада.

[10] Гава әз һ'але гьранда бум, мьн диса баwарийа хwә ӧнда нәкьр .

[11] Мьн шашийа хwәда гот: «Һәр мәрьв дәрәw ә».

[12] Әз чь бьдьмә Хӧдан, бона т'әмамийа qәнщийа Wийә сәр мьн?

[13] К'аса азадийе һьлдьм бьр'ежьм у гази наве Хӧдан кьм.

[14] Ад-qьраред мьн бәр Хӧдан кьри, әзе ль бәр щьмә'та Wи биньм сери.

[15] Мьрьна амьна бәр ч'ә'ве Хӧдан бьһа йә.

[16] Хӧдано! Әз ә'вде Тә мә, әз ә'вде Тә мә у кӧр'е щарийа Тә мә, Тә qәйдед мьн вәкьрьн.

[17] Әзе дийарийа р'азидарийе Тәр'а бьдьм у гази наве Хӧдан кьм.

[18] Ад-qьраред мьн бәр Хӧдан кьри, әзе ль бәр щьмә'та Wи биньм сери,

[19] һ'әwшед Хана Хӧданда, нава тәда, Оршәлиме! Һалелуйа!