<Зәбур 30

[1] Әзе тә бьльнд кьм, Хӧдано, чьмки Тә әз хьлаз кьрьм, дьжмьн ль мьн нәдан к'әнандьн.

[2] Йа Хӧдан, Хwәдейе мьн! Мьн һәwара хwә Тә ани у Тә әз qәнщ кьрьм.

[3] Хӧдан! Жь дийаре мьрийа Тә әз дәрхьстьм, кӧ нәк'әвьмә гор'е, Тә әз сах һьштьм.

[4] Әшqи Хӧдан һун бьстьрен амьнед Wи, шькьрийе бьдьне у бир биньн пирозийа Wи.

[5] Һерса Wи, чаwа ч'ә'в бьгьри-вәки, ле ширьнайа Wи т'әмамийа ә'мьр ә, еваре шин ә у гьри йә, ле сьбәһе зу әшq у шайи йә.

[6] Әз фьрәйийа хwәда фьр'наq бум, фькьрим: «Әзе т'ӧ щар нәк'әвьм».

[7] Йа Хӧдан, Тә бь хwәшийа Хwә, мина ч'ийаки әз qәwин кьрьм. Ле гава Тә р'уйе Хwә вәшарт, һьнге р'ьщафе сәр мьнда гьрт.

[8] Хӧдан газийа хwә Тә датиньм у һәwара хwә Хwәйи тиньм.

[9] Хуна мьне чь к'аре бьдә, һәгәр әз бьк'әвьм ах-бәре сар? Гәло халийе пәсьне Тә бьдә? Йан р'астийа Тә wе сальх кә?

[10] Бьбьһе Хӧдан, мьн wәрә р'ә'ме, Хӧдан, бьдә мьн к'омәке.

[11] Тә шина мьн кьрә шайи, к'ӧрхе мьн жи жорда ани, шабунева мьн дьхәмьлини.

[12] Щанийа мьне кәр' нәминә, әwе бьстьре әшqи Тә. Хӧдан, Хwәдейе мьн, әзе т'ьме бьдьм пәсьне Тә.