<Зәбур 44

[1] Хwәдейо, мә бь гӧһед хwә бьһистьн, кал-бавед мә мәр'а готьн, бона wан кьред Тәйә р'ожед wанда, нава wан р'ожед бәреда кьри.

[2] Тә бь дәсте Хwә п'утп'арьст р'аqәтандьн у кал-бавед мә щи-wар кьрьн, qәдә-бәла ани сәре wан мьләта у пешед мә дәрхьстьнә фьреqәтийе.

[3] Нә кӧ пе шуре хwә әw ә'рде wар бун, йан зәндед wан әw хьлаз кьрьн, ле дәсте Тәйи р'асте, зәнда Тә у нур-нәдәра Тә, чьмки Тә әw бәгәм кьрьн.

[4] Тӧ йи П'адше мьн, йа Хwәде! Тӧ сәрк'әтьне Аqубр'а ль һәв бинә.

[5] Пе Тә әм нәйаред хwә ә'рде дьхьн, йед кӧ бәр мә р'адьбьн, әм пе наве Тә wан п'епәс дькьн.

[6] Чьмки кәване хwәда әз нә гӧман ьм у нә жи шуре мьне мьн хьлаз кә.

[7] Ле Тә әм жь нәйара хьлаз кьрьн у пәйк'әтийед мә данә шәрме.

[8] Һәр р'ож әм пе Хwәде дьфьр'ьн һ'әта-һ'әтайе пәсьне наве Тә дьдьн. (Сәла)

[9] Тә әм кьрьнә сосрәт wеда авити, т'әви ордийед мә дәрнак'әви.

[10] Тә әм жь бәр дьжмьн данә р'әве, пәйк'әтийа жи әм т'алан кьрьн.

[11] Тә әм чаwа пәз данә хwарьн, нав мьләтада әм бәла кьрьн.

[12] Тә щьмә'та хwә беqимәт фьрот у баһе wе Тә бьльнд нәкьр.

[13] Тә әм бәр щинара кьрьнә р'обәт у ль бәр йед дор-бәред мә нав у нуч'ьк.

[14] Нав хәлqеда Тә әм кьрьнә дәв-дьрана, нава мьләтада жи бунә мина пек'әнийа.

[15] Т'әмамийа р'оже сосрәтийеда мә, шәрма р'уйе мьн мьн дьньхемә,

[16] р'уйе дәнге бӧхданбеж у к'ьфьра, ӧса жи р'уйе һ'әйфһьлдайе дьжмьнда.

[17] Әв һ'әму һатьнә сәре мә, ле мә Тӧ бир нәкьри у пәймана Тә нәт'әр'ьбанд.

[18] Дьле мә пашда вәнәгәр'ийан у гавед мә жь р'ийа Тә дәрнәк'әтьн.

[19] Ле Тә әм щийе мьшк у мә'ра һ'ьнщьр'андьн у бь сийа мьрьне әм ньхамтьн.

[20] Һәгәр мә наве Хwәдейе хwә бир бькьра, йан дәсте хwә дьрежи хwәдеки хәриб кьра,

[21] Хwәде wе сәр ве йәкеда нәньһер'ийа? Чьмки Әw сьр'ед дьлада занә.

[22] Ле бона Тә әм һәр р'ож бәр мьрьне нә, мина пәзед сәржекьрьне һ'әсаб дьбьн .

[23] Р'абә Хwәйо, чьма р'аза йи? Һ'ьшйар бә мә т'әхсир нәкә һ'әта-һ'әте.

[24] Чьма р'уйе Хwә жь мә вәдьшери, зәлули у дәрд-кӧлед мә бир дьки.

[25] Әм ӧса дәвәр'уйа чунә ә'рде, һ'әта зьке мә ә'рдева qәмьти.

[26] Р'абә али мә бькә у мә хьлаз кә, бона хатьре һ'ӧба Хwәйә амьн.