<Зәбур 88

[1] Хӧдан, Хwәдейе азадийа мьн, әз шәв у р'ож ль бәр Тә дьзарьм.

[2] Бьра дӧайе мьн бьгьһижә Тә, гӧһе Хwә бьдә сәр газийа мьн.

[3] Чьмки нәфса мьн кӧл-дәрдава т'ьжи йә, ә'мьре мьн гьһиштә ль бәр дәве qәбьре.

[4] Әз т'әви йед дьк'әвьнә гор'е һатьмә һ'әсабе, бумә мина мәрийе бет'аqәт.

[5] Нава мьрийада авити мә, чаwа кӧштийед т'ьрбеда дани, кӧ иди Тӧ wан бир найни у дәст жь wан дьк'ьшини.

[6] Тә әз авитьмә ч'ә'ла һәрә к'ур, тә'ристанийе у бебьнийе.

[7] Һерса Тә ль сәр мьн гьран ә, пе һ'әму пелед Хwә мьн дьди щәфе. (Сәла)

[8] Тӧ мьн жь бәр ч'ә'ве наса давежи, Тә әз ль бәр wан кьрьмә к'ьрет, әзи гьрти мә нькарьм дәрем.

[9] Ч'ә'ве мьн шелу бунә жь мә'рьм-бәләнгазийе, т'әмамийа р'оже әз гази Тә дькьм, йа Хӧдан, әз дәстед хwә бәрбьр'и Тә дькьм.

[10] Гәло Тӧ к'әрәмәте сәр мьрийа дьки? Гәло жь гор'е р'адьбьн дьдьнә Тә шькьри? (Сәла)

[11] Гәло т'ьрбеда һ'ӧба Тә те готьн, йан р'астийа Тә wаре дерьсда?

[12] Гәло wе тә'ристанийеда к'әрәмәтед Тәйе бенә наскьрьн, йан хьлазкьрьна Тә wәлате биркьрьнеда?

[13] Ле бәле Хӧдано, әз һәwара хwә Тә датиньм, дӧайе мьн бәрбанга к'урда дьгьһижә Тә.

[14] Хӧдан Тӧ чьма дәст жь мьн дьк'ьшини? У бәре Хwә жь мьн дьгӧһези?

[15] Әз бәләнгаз ьм у зар'отийеда ль бәр һешийа мьрьне мә, саwа Тә дьк'ьшиньм у хwә ӧнда дькьм.

[16] Һерса Тә мьн дажо дьбә, хәзәба Тә мьн wеран дькә,

[17] мина аве т'әмамийа р'оже дора мьн дьгьрьн, һәвр'а т'әвайи мьн дьп'еч'ьн.

[18] Тә әз жь бәр ч'ә'ве һ'ьзкьри у херхwаза авитьм, тә'ристани жи һогьре мьн нә.