<Зәбур 39

[1] Мьн гот: «Әзе мьqати р'ийа хwә бьм, кӧ бь зьмане хwә гӧна нәкьм, гәмәке бавежьмә әз дәве хwә, һ'әта кӧ нәп'ак ль бәр мьн ә».

[2] Мьн хwә кәр' кьр у дәнг нәкьр, бона qәнщийе жи qәт тьшт нәгот, һьнге еш ль мьн т'әвиһәв бу.

[3] Дьл нав мьнда qьлqьли, алаве да qафе мьн, һьнге дәрәвәбум у мьн гот:

[4] «Бежә Хӧдан Тӧ ахьрийа мьн, чьqас ьн әw р'ожед мьн у р'еwитийа мьн чәнд р'ож ьн».

[5] Ва пе бьһӧста Тә р'ож данә мьн у ә'мьре мьн ль бәр Тә нә т'ӧ тьшт ә. Р'аст һәр мәрьве дьне к'әтийә, әw т'ам wәкә һӧлмәке йә. (Сәла)

[6] Р'аст мина сийе мәрьв те-дьчә. Р'аст бадиһәwа һ'әщә-һ'әщ дькә, әw т'оп дькә ле ньзанә әwе бьбә р'ьсqе к'е.

[7] Иди ньһа әз һивийа чь бьм, Хwәйо? Гӧмана мьн ль сәр Тә йә.

[8] Мьн жь һ'әму нәһәqийед мьн хьлаз кә, мьн нәкә нава дәв-дьране бефә'ма.

[9] Әз хwә кәр' дькьм, дәве хwә вәнакьм, чьмки Тә кьр, әва йәка.

[10] Дәрба Хwә Тӧ жь мьн дур хә, әз жь бәр к'ӧлма Тә бәтавәдьбьм.

[11] Бона ширәте, нәһәqийа мерьв ль бәр бевьла дәрдьхи, мина бьзузе Тӧ һәбука wи дьһьзһьзини у жийин т'ам wәкә һӧлмәке йә. (Сәла)

[12] Йа Хӧдан, Тӧ бьбьһе дӧайе мьн у гӧһ бьдә һеwарза мьн, Тӧ пьшт нәдә һесьред мьн, әз ль бәр Тә чаwа р'еwи, мина пешийед хwә мевани.

[13] Мьр'узе Хwә жь мьн дагәр'инә, кӧ әз диса бәшәрхwәш бьм һ'әта кӧ нәчумә, п'уч' нәбумә.