<Зәбур 5

[1] Йа Хӧдан! Тӧ гӧһ бьдә готьнед мьн, бьра Тәва ә'йан бә заринийа мьн.

[2] Дина Хwә бьдә һеwарза мьн, йа П'адше мьн у Хwәдейе мьн! Чьмки һәwара хwә Тә датиньм.

[3] Хӧдано! Бәрбанге Тӧ дьбьһейи дәнге мьн, бәрбанге әзе бемә бәр Тә, һивийа Тә бьм.

[4] Тӧ йи Хwәдейе кӧ нәһәqийа нахwазә, хьрабе ль щәм Тә нәһеwьрә.

[5] Бабахе бәр ч'ә'ве Тә нәсәкьнә кӧ дьжәни йед хwә беолитийе гьртьнә.

[6] Тӧ дәрәwина ӧнда дьки, жь йед qәт'ьл у qәлп ащьз и Хӧдан.

[7] Ле әзе сайа һ'ӧба Тәйә п'ьр', бьк'әвьмә нава Хана Тә у бәр П'арьстгәһа Тәйә пироз, бь хофа Тә әзе та бьм.

[8] Хӧдано! Бь р'астийа Хwә, Тӧ р'ебәрийе мьн бькә у ә'йнати дьжмьнед мьнр'а, Тӧ бәр мьн р'аст кә р'ийа Хwә.

[9] Чьмки заре wанда р'асти т'ӧнә, дьле wанда хьрабкьрьн ә, гәwрийа wанә т'ьрба вәкьри йә, зьмане wанда һ'ьләк'ари йә .

[10] Хwәдейо! Диwана wан Тӧ бькә, бьра әw бьк'әвьн пе шеwьред хwә. Бона гәләк нәqәнщийед wан, Тӧ wан бавеж жь бәр Хwә, чьмки р'абунә һьмбәри Тә.

[11] Ле һ'әмуйед хwә спартьнә Тә бьра ша бьн, һ'әта-һ'әтайе әшqа бьстьрен, бьн сийа дәсте Тәда бьн, йед наве Тә һ'ьз дькьн, бьра пе Тә бәшәрхwәш бьн.

[12] Чьмки дӧа Тӧ йе р'аст дьки, Хӧдано, бь херхwазийе дора wи дьгьри, чаwа мина диwара .