<Зәбур 86

[1] Хӧдано, гӧһ бьдә у щаба мьн бьдә, чьмки әз мә'рьм у бәләнгаз ьм.

[2] Ә'мьре мьн хwәй кә, чьмки әзи амьн ьм, хӧламе Хwә хьлаз кә Хӧдано, кӧ Тәда гӧман ьм.

[3] Мьн wәрә р'ә'ме Хwәйо, кӧ т'әмамийа р'оже гази Тә дькьм.

[4] Дьле хӧламе Хwә ша кә, Хӧдано, кӧ гӧмана мьн ль сәр Тә йә.

[5] Чьмки Тӧ Хӧдано, qәнщ у афу кьр и, һьндава һ'әмуйада хwәйе һ'ӧба мәзьн и, к'ижан кӧ гази Тә дькьн.

[6] Бьбьһе Хӧдано, дӧайе мьн у дина Хwә бьдә лавайед мьн.

[7] Охьрме гьранда, Тә дькьм гази, Тӧ бона мьн дьби һәwари.

[8] Хӧдано, нава хwәдейада йәки мина Тә т'ӧнә, нә жи мина кьред Тә, кьр һәнә.

[9] Һ'әму мьләт Тә хӧльqандьн, әwе бен бәр Тә та бьн, Хӧдано у р'умәте бьдьнә наве Тә .

[10] Чьмки Тӧ мәзьн и к'әрәмәткьр и, Тӧ йи т'әне Хwәде.

[11] Хӧдан р'ийа Хwә мьн һин кә, кӧ әз р'астийа Тәда һәр'ьм, бькә кӧ дьле мьн жь наве Тә хоф бькә.

[12] Бь т'әмамийа дьле хwә әзе шькьрийе бьдьмә Тә, Хӧдан Хwәдейе мьн у һ'әта-һ'әтайе р'умәте бьдьмә наве Тә.

[13] Чьмки һ'ӧба Тә мәзьн ә һьндава мьнда, Тә әз хьлаз кьрьм жь к'урайа дийаре мьрийа.

[14] Хӧдано, к'ӧбар-бабах р'абунә бәр мьн, к'омәкә зордара пәй мьн к'әтийә у Тә надьнә ль бәр ч'ә'вед хwә.

[15] Ле Тӧ Хӧдан, Хwәдейе р'ә'ме у дьлшәwатийе, хwәйе сәбьр-ськ'ане, һ'ӧб у амьнийеда хьнейо.

[16] Дина Хwә бьдә мьн у мьн wәрә р'ә'ме, qәwата Хwә бьдә qуле Хwә, хьлаз кә кӧр'е щарийа Хwә.

[17] Нишанәкә qәнщийе бона мьн бькә, кӧ пәйк'әти бьбиньн у шәрми бьн, чьмки Тӧ һати Хӧдан һәwара мьн у әз барьстан кьрьм.