<Зәбур 89

[1] Һ'ӧба Тә Хӧдан, әзе бьстьрем һ'әта-һ'әтайе, амьнийа Тә бь дәве хwә сальх кьм qӧр'нә-qӧр'нә.

[2] Әз ә'лам дькьм, кӧ һ'ӧба Тә т'ьме qәдими йә, ә'зменда амьнийа Тә һ'имгьрти йә.

[3] Тә гот: «Мьн т'әви бьжартийе Хwә пәйман гьреда у хӧламе Хwә Даwьдр'а сонд хwар:

[4] ‹Зӧр'әта тә Әзе һ'әта-һ'әтайе һ'имгьрти кьм у qӧр'нә-qӧр'нә т'әхте тә qәдим кьм› ». (Сәла)

[5] Йа Хӧдан, ә'зман пәсьне к'әрәмәтед Тә дьдә, щьвина мьлйак'әта жи пәсьне амьнийа Тә.

[6] Чьмки ә'зменда к'и һәйә кӧ wәкә Хӧдан бә? У нава мер-мьлйак'әтада бьбә мина Хӧдан?

[7] Хwәде гәләки хоф ә нав щьвина мьлйак'әтада у саwа Wи сәр йед дор-бәре Wи нә.

[8] Йа Хӧдан, Хwәдейе Ордийа, к'и мина Тә хwәйиqӧдрәт ә? Амьнийа Тә дора Тә гьртийә.

[9] Тӧ һ'ӧкӧми сәр һерса бә'ре дьки, гава пелед wе р'адьбьн, Тӧ wан дьсәqьр'ини.

[10] Тә Р'аһаб һера мина бәрәт'а, пе зәнда Хwәйә qәwат дьжмьн бәла кьр.

[11] Ә'зман йе Тә йә, ә'рд йе Тә йә. Тә һ'име дьнийа хер-бәрәк'әтева данийә.

[12] Бакӧр у башур Тә хӧльqандьн, Ч'ийайед Т'абор у Һәрмоне бь наве Тә ша дьбьн.

[13] Зәнда Тә зор ә, дәсте Тә qәwат ә, дәсте Тәйи р'асте бьльнд ә!

[14] Р'асти у һәqи әw бьнгәһед т'әхте Тә нә, һ'ӧб у амьни пешийа Тә дьчьн.

[15] Хwәзи ль wе щьмә'те, кӧ занә дәнг һьлдә щәжьнер'а. Хӧдано, әw бь р'онайа р'уйе Тә дьмәшьн.

[16] Т'әмамийа р'оже бь наве Тә ша дьбьн у бь азадийа Тә бьльнд дьбьн.

[17] Чьмки Тӧ р'умәта qәwата мә йи у бь хwәшийа Хwә струйе мә бьльнд дьки.

[18] Мәрт'ала мә жь Хӧдан ә, Пирозе Исраеле, П'адшайе мә.

[19] Һьнге дитьнокеда, Тә амьнед Хwәр'а гот: «Мьн али мерхасәки кьр, жь нав щьмә'те йәк бьжарт у әw дани һелана жорьн.

[20] Мьн Хӧламе Хwә Даwьд дит, р'уне Хwәйи пирозва әw р'ун кьр .

[21] Дәсте Мьне т'әви wи бә, Зәнда Мьне wи qәwат кә.

[22] Дьжмьне зоре нәдә wи, нәп'ак wе wи ньмьз нәкә.

[23] Нәйар бәр wи Әзе һур-һури кьм у ӧса жи пәйк'әтийед wи хьм.

[24] Амьни у һ'ӧба Мьне т'әви wи бьн, пе наве Мьн струйед wийе бьльнд бьн.

[25] Әзе дәсте wи дайньмә сәр бә'ра, дәсте wийи р'асте сәр ч'әма.

[26] Әwе гази Мьн кә: ‹Тӧ Баве мьн и, Хwәдейе мьн у Qәйайе азадийа мьн›.

[27] Әзе wи бькьмә ньхӧрийе жь һәр п'адшайед дьне мәстьр .

[28] Әзе т'ьме һ'ӧба Хwә бона wи хwәй кьм у пәймана Мьне һьндава wида qәwин бә.

[29] Әзе думька зӧр'әта wи qәдим кьм у думька т'әхте wи wәкә р'ожед ә'змен.

[30] Һәгәр зӧр'әта wи гӧр'а готьна Мьн нәкьн, ль гора qьраред Мьн нәмәшьн,

[31] qәйдә-qанунед Мьн беqәдьр кьн у ә'мьред Мьн нәqәдиньн,

[32] һьнге Әзе пе шьве сәрики бьдьмә нәһәqийед wан у бь дәрба жи щәза бьдьмә беолитийед wан.

[33] Ле һ'ӧба Хwә Әзе жь wи нәбьр'ьм у созе Хwә нәт'әр'ьбиньм.

[34] Пәймана Хwә Әзе нәт'әр'ьбиньм у созе жь дәве Хwә дәрхьсти, нәгӧһезьм.

[35] Щарәке Мьн пе пирозийа Хwә сонд хwарийә, т'ӧ щар Даwьдр'а хельф нәбежьм.

[36] Зӧр'әта wийе һ'әта-һ'әтайе бьминә, т'әхте wи жи wәкә р'ойе ль бәр Мьн.

[37] Мина һиве һ'әта-һ'әтайе wе qәдим бә, ә'зманда жи мина шә'дәки амьн бә». (Сәла)

[38] Ле Тә әw жь бәр Хwә авит у беһӧрмәт кьр, сәр к'ьфшкьрийе Хwә һерс к'әти,

[39] пәймана т'әв хӧламе Хwә т'әхсир кьр, т'аще wи кьрә ах у хwәли.

[40] Һ'әму суред wи хьраб кьр, кәлайед wи кьрьн хьрабә.

[41] Һәр кәсе wьрр'а дәрбаз дьбә, әwи wьра т'алан дькә, әw бу пек'әнийе щинаред хwә.

[42] Тә пәйк'әти сәр wи хьстьн, һ'әму дьжмьнед wи ша кьрьн.

[43] Тә дәве шуре wи вәгәр'анд, нава шер'да пьшт ле шкенанд.

[44] Р'әwша wи Тә же станд, т'әхт ә'рде хьст шкенанд.

[45] Р'ожед щаһьлтийа wи кьн кьрьн, әw шәрмийева Тә ньхамт. (Сәла)

[46] Һ'әта к'әнге, йа Хӧдан? Гәло Те т'ьме Хwә вәшери? Һ'әта к'әнге һерса Тәйе алав дә?

[47] Бир бинә думька ә'мьре мьн, гәло Тә һ'әму әwләдед инсен бош у бәталийер'а хӧльqандьн?

[48] К'и дькарә бьжи у нәмьрә, хwә жь дәсте гор'ьстен хьлаз кә? (Сәла)

[49] Йа Хӧдан, к'ане йә әw һ'ӧба Тәйә бәре, кӧ Тә пе амьнийа Хwә Даwьдр'а сонд хwар?

[50] Йа Хӧдан, бир бинә бер'умәтбуна хӧламед Хwә, кӧ жь һ'әму мьләтед зор сәр мьнда тен.

[51] Дьжмьнед Тә wи беһӧрмәт дькьн, йа Хӧдан, гавед к'ьфшкьрийед Тә р'обәт дькьн.

[52] Шькьр жь Хӧданр'а, һ'әта-һ'әтайе амин у амин!