<Зәбур 72

[1] Хwәде, п'адше һин кә кӧ ч'ә'в бьдә диwана Тә, р'астийа Хwә жи кӧр'е п'адше.

[2] Бьра бь р'астийе диwана щьмә'та Тә бькә, бәләнгазед Тә жи бь һәqийе.

[3] Бьра ч'ийа хер-бәрәк'әтийе щьмә'тер'а биньн, бьра гьр жи wанр'а р'астийе.

[4] Бьра пьшта һәqийа бәләнгазед мьләт бьгьрә, бьра зар'ед к'әсиба хьлаз кә ле зӧлмк'ара һурдәхwәши кә.

[5] Бьра п'адша бьжи һ'әта кӧ тә'в п'әнщ дьдә, ӧса жи һ'әта кӧ һив шәwq дьдә .

[6] Бьра жорда бе мина барана сәр мерга дьруйи, мина тә'вийа кӧ ә'рде ав дьдә.

[7] Бьра р'ожед wида р'асти гӧл дә у ә'дьлайи гәләк бә, һ'әта кӧ һив бәтавәбә.

[8] Бьра һ'ӧкӧм кә жь бә'ре һ'әта бә'ре у жь ч'әме Фьрате һ'әта сәре дьне.

[9] Бьра бьнәлийед чоле бәр wи дәвәр'уйа бен һ'әму дьжмьнед wи т'озе балесьн.

[10] Бьра п'адшайед Т'аршише у гьрава хәрщ бьдьне, п'адшед Шьбайе у Сьвайе хәлата биньн.

[11] Бьра һ'әму п'адша ль бәр wи та бьн, һ'әму мьләт жи хӧламтийа wи бькьн.

[12] Чьмки әw йе к'әсиб хьлаз дькә, кӧ гази дьке у йе бәләнгаз кӧ к'омәкдаре wи т'ӧнә йә.

[13] Дьле wи ль бет'аqәт у к'әсиба дьшәwьтә у нәфса бәләнгаза хьлаз дькә.

[14] Жь зерандьне у зордарийе wан хьлаз дькә у хуна wан бәр ч'ә'ве wи хwәйиqимәт ә.

[15] Бьра әw хwәш бә у зер'е Шьбайе жер'а бе дайин, бона wи һәр т'ьм дӧа бен кьрьн, һәр р'ож бона wи хwәши бе хwәстьн.

[16] Бьра гәньме wәлет бьбә бьр'-бә'р, дәрәмәтед wи сәре ч'ийа бьһ'әжьн, бәре wе жи мина даред Лӧбнане бә у бажарван жи һәв зедә бьн, мина шинаийа ә'рде.

[17] Бьра наве wи һ'әта-һ'әтайе бьминә, һ'әта кӧ тә'в һәбә, наве wи һәбә. Бьра бь wи дӧа бе сәр мәрьва, һ'әму мьләт хwәзийа хwә wи биньн.

[18] Шькьр жь Хӧдан Хwәдер'а, Хwәдейе Исраеле, кӧ т'әне Әw ә к'әрәмәткьр!

[19] Һәр т'ьм пәсьне наве Wийи хwәйир'умәт бьдьн. Бьра т'әмамийа дьне р'умәта Wива т'ьжи бә. Амин у амин.

[20] Дӧайед Даwьде кӧр'е Йеша сәр һәвда һатьн.