Зәбур 37
[1] Бина хwә хьраба тәнг нәкә, һ'әвсудийе беола нәкә.
[2] Чьмки әwе зутьре мина гиһе бьч'ьлмьсьн у мина гиһайе шин wе һ'ьшк бьн.
[3] Гӧмана хwә бьдә сәр Хӧдан у qәнщийе бькә, wәлетда бьжи у амьнийа хwә хwәй кә.
[4] Бьра Хӧдан шабуна тә бә, Әwе хwәстьнед дьле тә бьдә тә.
[5] Р'ийа хwә бьдә дәсте Хӧдан, гӧмана хwә бьдә сәр Wи у Әwе бинә сери.
[6] Wе мина р'ойе р'успитийа тә дәрхә у пьрса һәqийа тә жи мина нивро.
[7] Ль бәр Хӧдан бәрбьһер бә у һивийа Wи бә, бина хwә wи мәрьви тәнг нәкә кӧ жер'а ль һәв те у wи мәрьве кӧ дьгьһижә мәрәме хьраб.
[8] Һерс нәк'әвә, нәqьлqьлә, бинтәнг нәбә кӧ хьрабийе бьки.
[9] Чьмки к'ок ль хьраба wе бе, ле йед ль Хӧдан сәбьр дькьн, әwе ль ә'рде wар бьн.
[10] Бәле һьнәки шунда нәп'аке бәтавәбә, те ль щийе wи бьгәр'и у wи нәбини.
[11] Ле бәле мьлуке ә'рде wар бьн, хер-хwәшийева wе хьне бьн у ша бьн .
[12] Нәп'ак бона йе р'аст хьраб дьшеwьрә у дьрана сәр wи дьч'ьр'ькинә.
[13] Хwәйи сәр wи дьк'әнә чьмки ахьрийа wи дьбинә.
[14] Гӧнәк'ар шур дьк'ьшиньн, кәванед хwә саз дькьн, кӧ йе фәqир у бәләнгаз жорда биньн, йед р'ийа р'астда дьчьн, wан бькӧжьн.
[15] Шуред wане бьк'әвьнә дьле wан, кәванед wане һурдәхwәши бьн.
[16] Һәбука р'астайә һьндьк, жь һәбука нәп'акайә п'ьр' четьр ә.
[17] Чьмки qоланед нәп'ака wе бьшкен, ле стуна р'аста Хӧдан ә.
[18] Хӧдан хәме һ'але беләк'а дьк'ьшинә wартийа wане һ'әта-һ'әтайе бьминә.
[19] Охьрмед гьранда wе шәрми нәбьн у р'ожед хәлайеда wе т'ер бьн.
[20] Ле нәп'аке ӧнда бьн у дьжмьнед Хӧдан мина гӧл-сосьнед чоле, нава дуда wе бәтавәбьн.
[21] Нәп'ак дәйн һьлдьдә у надә, ле йе р'аст дәствәкьри йә у дьдә.
[22] Хwәде дӧа к'ижана бькә, әwе ә'рде wар бьн у ньфьр'а к'ижана бькә, әwе ӧнда бьн.
[23] Хӧдан гавед wи мәрьви дьшьдинә р'ийа к'ижани әw бәгәм дькә.
[24] Һәгәр әw бьльк'ӧмә, wе нәк'әвә, чьмки Хӧдане дәсте wи бьгьрә.
[25] Әз зар' бумә у ньһа жи мәзьн бумә, мьн нәдитийә йе р'аст wеда авити, йан жи зар'ед wи кӧ нен п'арс кьн.
[26] Әw һәр т'ьм мәр'д ә у дәйн дьдә, дӧа жи сәр зӧр'әта wи йә.
[27] Жь хьрабийе хwә дур бьгьрә, qәнщийе бькә, те бьмини һ'әта-һ'әте.
[28] Чьмки Хӧдан һәqийе һ'ьз дькә у пьшт надә амьнед Хwә. Әwе һ'әта-һ'әтайе бенә хwәйкьрьне, ле зӧр'әта нәп'ака wе ӧнда бә.
[29] Р'асте ль ә'рде wар бьн у һәр-һәйе wе сәр бьжин.
[30] Жь дәве р'аста гӧл-нур дьбарьн у зьмане wи һәqийе дьбежә.
[31] Һинкьрьна Хwәде wи дьле wида йә, гавед хwәда әw нальк'ӧмә.
[32] Нәп'ак пәй йе р'аст к'әтийә, дькә кӧ чаwа wи бькӧжә.
[33] Ле Хӧдан wи надә дәсте нәп'ак у гава wи бинә бәр диwане, наһелә кӧ wи гӧнәк'ар кә.
[34] Хӧдан сәбьр кә у хwә р'ийа wи бьгьрә, Әwе тә бьльнд кә кӧ ә'рде wар би. Те бьбини ӧндабуна нәп'ака.
[35] Мьн дит нәп'акәк стьру дәрхьсти, мина дара шинә ч'ьqьлава п'әр'вәдайи .
[36] Ле әw дәрбаз бу, к'а әw нәма, әз ле гәр'ийам у мьн әw нәдит.
[37] Йе беләк'ә бьньһер'ә у дина хwә бьдә әwед р'аст, чьмки ахьрийа мәрьве һа wе хер бә.
[38] Ле к'ока нәһәqа wе һәвр'а бе, ахьрийа нәп'ака ӧндабун бә.
[39] Хьлазбуна р'аста жь Хӧдан ә, охьрме гьранда Әw пьштоване wан ә.
[40] Хӧдане алик'арийе wан бькә, wан хьлаз кә, жь нәп'ака wан азад кә у хьлаз кә, чьмки wан хwә дайә бьн сийа Wи .