<Зәбур 45

[1] Жь дьле мьн хәбәра qәнщ бьлq вәдьдә, һьлбәстед мьн әшqи П'адше нә, зьмане мьн мина qәләма ньвиск'аре че йә. s

[2] Тӧ жь һ'әму инсанәти бәдәwтьр и, жь левед Тә гӧл у нур дьбарә, ләма Хwәде һ'әта-һ'әтайе дӧа ль Тә кьрийә.

[3] Шуре Хwә ль пьшта Хwә гьредә, Ә'гито, бь р'әwш у р'умәта Хwә.

[4] Бь qәдьре Хwә пешда һәр'ә, бона р'асти, мьлуктийе у һәqийе, сийаро, бьра дәсте Тәйи р'асте р'ебәрийа Тә бәр бь кьред һ'ӧжмәк'ар бькә.

[5] Тиред Тә туж ьн, әw дьк'әвьнә дьлед дьжмьнед П'адше, мьләте бьк'әвьнә бьне п'ийед Тә.

[6] Т'әхте Тә Хwәдейо , т'әхте һ'әта-һ'әтайе йә, шьва п'адшатийа Тә шьва һәqийе йә.

[7] Тӧ һәqийе һ'ьз дьки у дьжәни нәһәqийе, ләма жи Хwәде, Хwәдейе Тә Тӧ бь р'уне шабуне жь һәвалед Тә зедәтьр к'ьфшкьри .

[8] Жь һ'әму к'ьнще Тә бина зьмьр, уд у дарчине дәрте, жь там-ташед һәстуйед филинда, пе дәнгед саза Тә ша дькьн.

[9] Qизед п'адшайа нава ханьм-хатунед Тәда нә, ханьмп'адша нав зер'е Офирда ль мьле Тәйи р'асте сәкьни йә.

[10] Бьбьһе qизьк, дина хwә бьде у гӧһе хwә вәкә, тӧ бир бькә мьләте хwә у мала баве хwә

[11] у бьра П'адша машоqе бәдәwийа тәда бә, чьмки Әw ә хwәйе тә, тӧ бәр Wи та бә.

[12] Бьнәлийед Суре бь дийарийа у дәwләмәндед щьмә'те жи бь хьзна wе һ'әйра диндара тәда бьн.

[13] Дәргистийа П'адше әw һьндӧр'ва хас у хәwан ә, к'ьнще wе бь т'еле зер' һунанди йә.

[14] Хәмьла нәqьшандива wе дьбьнә ль бәр П'адше, бәрбук пәй wе т'әв дьчьнә ль бәр Wи.

[15] Әw тенә бьрьне бь әшq у шайи у дьк'әвьнә qәсьра П'адше.

[16] Дәwса кал-бавед Тәйе әwләдед Тә бьн, Те wан бьки сәрwер сәр т'әмамийа ә'рде.

[17] Әзе наве Тә qӧр'нә-qӧр'нә бьдьмә биранин, ләма мьләте пәсьне Тә бьдьн һ'әта-һ'әтайе .