<Зәбур 139

[1] Хӧдан! Тә әз ә'нәнә кьрьм у нас кьрьм.

[2] Тӧ зани р'абун у р'уньштьна мьн, дурва Тәва ә'йан ә фькьред мьн.

[3] Тӧ дьбини гәр' у п'алдана мьн у Тәва ә'йан ә һ'әму р'ийед мьн.

[4] Һәла һе хәбәр нә сәр заре мьн ә, Хӧдан, фькьр иди Тәва ә'йан ә.

[5] Тӧ пеш у пьшва хwәй дьки мьн, дәсте Тә си йә ль сәр сәре мьн.

[6] Әв занәбун жь һ'ьше мьн дәр ә, нькарьм бьгьһижьме, гәләки к'ур ә.

[7] Әзе жь Р'ӧһ'е Тә к'ӧда һәр'ьм, йан жь бәр Тә к'ӧда бьр'әвьм?

[8] Һәгәр р'абьмә ә'змен, Тӧ ль wьр и, бәржер һәр'ьмә дийаре мьрийа, диса wьр и.

[9] Һәгәр п'әнще р'ойе баске мьн бьн, бьфьр'ьмә хьлазийа бә'ре, wьр бьминьм,

[10] wьр жи дәсте Тәйе р'ебәрийа мьн бькә, дәсте Тәйи р'асте wе мьн хwәй кә.

[11] Һәгәр бежьм: «Тә'ристане мьн вәшерә, р'онайийа дора мьн жи шәв бә»,

[12] диса шәв бона Тә нә тә'ри йә, шәв мина р'оже р'онайи йә, бона Тә шәв у р'ож wәкә һәв ә.

[13] Навдьле мьн Тә чекьрьнә, зьке дийа мьнда щәбьрандьмә.

[14] Пәсьн у шькьрийе дьдьмә Тә, кӧ әз ә'щебмайи чекьри мә. Әв кьрьнед Тә һ'ӧжмәк'ар ьн, мьнва әв йәк т'ам зәлал ьн.

[15] Һәстуйед мьн жь Тә вәшарти нәман, гава щийе вәшарти һатьмә хӧльqандьн у бәт'ьнеда һатьмә щәбьрандьн.

[16] Тә әз дитьм һе нә һатьбум мәйандьн. Һ'әму р'ожед к'ьфшкьрийә бона мьн, к'ьтеба Тәда һатьбунә ньвисандьн, бәри wан р'ожед кӧ әwә һе т'ӧнәбун.

[17] Хwәдейо, фькьред Тә сәре мьнда р'унанин у чьqаси мәзьн ә р'әqәма wан!

[18] Һәгәр әз бькьм бьжмерьм wан, wе жь qуме зә'фтьр бә һ'әсабе wан. Әз кӧ жьмаре сәр һәвда биньм, әзе т'әв Тә диса һ'ӧщәтеда бьм .

[19] Хwәзи Тә qьр'а нәп'ака банийа, Хwәдейо! Жь мьн дур к'әвьн, һәй мәрьвед хунхӧрно!

[20] Әw һ'ьләк'ари һьндава Тәда хәбәр дьдьн, нәйаред Тә щийе бадиһәwа наве Тә дьдьн.

[21] Хӧдан, әз ча нәжәньмә йед дьжәньнә Тә? Ча зьвер нәбьм, жь р'абәред һьмбәри Тә?

[22] Әз wан бәр ч'ә'ве хwә лап давежьм, әз wан хwәр'а дьжмьн һ'әсаб дькьм.

[23] Мьн ә'нәнә кә, Хӧдано, дьле мьн заньбә, мьн бьщер'ьбинә у фькьред мьн бьзаньбә.

[24] Дина хwә бьде, ха әз нә р'ийа хьрабда мә, р'ийа һ'әта-һ'әтайеда р'ебәрийа мьн бькә.