<Зәбур 144

[1] Шькьр жь Хӧданр'а, qәйайе мьн, кӧ дәсте мьн һини шер' дькә, т'ьлийед мьн жи ч'әкр'а.

[2] Херхwазе мьн у кәла мьн, сьт'ара мьн у хьлазкьре мьн, мәрт'ала мьн, кӧ хwә дьсперьмә Wи, Щьмә'т кӧ гӧһ дьдә мьн, әw Тӧ дьки.

[3] Хӧдано! Инсан чи йә Тӧ дина Хwә дьдейи, бәни-адәм кӧ Тӧ бона wи хәм дьки?

[4] Инсан мина һӧлм-гӧлме йә, р'ожед wи мина сийе дәрбаз буйә.

[5] Хӧдано! Ә'зманед Хwә бьтәwинә, пәйа бә, ч'ийа к'әвә, кӧ әw ду кьн.

[6] Бь бьруске бьрq бьдә, wан бәла-бәлайи кә, тиред Хwә бьшинә, wан шашо-п'ашо кә.

[7] Жорда дәсте Хwә дьреж кә, мьн азад кә у хьлаз кә, жь дәст хәриба у гәләк ава,

[8] жь дәве к'е дәрәw дәрте, дәсте сәр дьле wан, йе дәрәwийе йә.

[9] Йа Хwәде, әзе стьранәкә ну Тәр'а бьстьрем, сәр сазе дәһәт'ели, мьqама Тәр'а ле хьм.

[10] Йе азадийе дьдә п'адше у qуле хwә Даwьд хьлаз дькә.

[11] Жь шуре хьраб мьн азад кә, жь дәсте хәриба хьлаз кә, жь дәве к'ижана бәтали дәрте, дәсте wани р'асте, дәсте дәрәwийе йә.

[12] Бьра хортед мә, щаһьлтийа хwәда р'ьнд шин бьн мина дара, qизед мә бьбьнә мина стунед ә'нишке кӧ qәсьрада тенә нәqьшандьне.

[13] Бьра ә'мбаред мә дагьрти бьн, бь һәр хӧрәкива т'ьжи бьн у пәзед мә мергед мәда бь һ'әзара, бе һ'әсаб ль һәв зедә бьн,

[14] дәwаред мә жи к'окә хӧрт бьн. Бьра тәрк ле нәк'әвьн, бәр нәвежьн, qар'ә-qар' жи ль к'учед мә нәк'әвьн.

[15] Хwәзи ль wи мьләти, кӧ ви һ'алида йә. Хwәзи ль wи мьләти, кӧ Хӧдане wан Хwәде йә.