<Зәбур 9

[1] Әзе бь т'әмамийа дьле хwә шькьрийе бьдьмә Тә, Хӧдан, һ'әму к'әрәмәтед Тә бькьм дәнги.

[2] Әзе пе Тә ша бьм у гӧл дьм әшqи наве Тә әзе бьстьрем, Йе Һәри Жорьн.

[3] Гава нәйаред мьн пашда вәдьгәр'ьн, әw дьк'әвьн у бәр ч'ә'ве Тә ӧнда дьбьн.

[4] Чьмки Тә сәр диwан у һәqийа мьнда ньһер'и, Тӧ сәр к'ӧрсийе, чаwа һ'акьме сәр р'астийе р'уньшти.

[5] Тә п'утп'арьст дәнгбьр'и кьрьн, к'ок ль нәп'ака Тә ани, навед wана һ'әта-һ'әтайе да һьлдан.

[6] Нәйар иди т'ӧнә нә, әwә һәр т'ьм хьрабә нә, Тә бажаред wан wеран кьрьн, биранина хwәва әw ӧнда бун.

[7] Ле Хӧдане һ'әта-һ'әтайе п'адшатийе бькә, Әwи к'ӧрсийа Хwә бона диwане һазьр кьрийә.

[8] Әwе диwана дьне бь һәqийе бькә, сәр мьләтада бь р'астийе бьньһер'ә.

[9] Хӧдане qәсьра дәро-дәра бә, ӧса жи qәсьра йед тәнгасийада.

[10] Әwед нас дькьн наве Тә, гӧмана хwә дьдьн сәр Тә, әwед кӧ ль Тә дьгәр'ьн, Тӧ жи пьшт нади wан Хӧдан.

[11] Бьстьрен әшqи Хӧдане ль Сийоне, бәла кьн кьред Wи нава мьләта.

[12] Һ'әйфһьлдайи хуна р'ети бир тинә, заринийа дәро-дәра бир накә.

[13] Мьн wәрә р'ә'ме, Хӧдано, дина Хwә бьдә wан тәнгасийед мьн, к'ижан дәсте пәйк'әтийада мьн к'ьшандьн, Тӧ кӧ жь бәр дәрге мьрьне мьн һьлдьди,

[14] wәки т'әмамийа р'умәта Тә бькьм дәнги, ль бәр дәргәһед бажаре Сийоне, бь дәнге бьльнд ша бьм бь хьлазкьрьна Тә.

[15] П'утп'арьст к'әтьнә ч'ә'ла хwәйә к'олайи, ньгед wан хwәха к'әтә т'әла wанә вәшарти.

[16] Хӧдан бь диwанкьрьне Хwә да наскьрьне, нәп'ак бь кьред дәсте хwә дьк'әвә т'ор'е. (Һьггайон Сәла)

[17] Дә бьра нәп'ак вәгәр'ьнә дийаре мьрийа, һ'әму әw мьләтед кӧ Хwәде бир кьрьнә.

[18] Чьмки фәqире һ'әта хьлазийе нәйе биркьрьне, гӧмана дәро-дәра һ'әта-һ'әтайе ӧнда нәбә.

[19] Р'абә Хӧдано, бьра инсан qәwат нәгьрә, бьра диwана п'утп'арьста ль бәр Тә бьбә.

[20] Хӧдано, Тӧ тьрсе бькә ль сәр wан, бьра п'утп'арьст заньбьн, кӧ әw мәри нә. (Сәла)