<Зәбур 79

[1] Хwәде! П'утп'арьст к'әтьнә щи-wаре Тә, һ'әр'ьмандьн П'арьстгәһа Тәйә пироз, Оршәлим кьрьнә хьрабә.

[2] Щьнйазед хӧламед Тә кьрьнә хӧрәке тәйрәдед ә'змен, qальбед амьнед Тә данә р'ә'wьред ә'рде.

[3] Дора Оршәлиме хуна wан р'етьн мина аве у кәс т'ӧнә бу кӧ дәфьн кьрана wе гаве.

[4] Әм р'ур'әш бун бәр щинаред хwә, р'обәт у пек'әни ль бәр дор-бәред хwә.

[5] Һ'әта к'әнге Хӧдано, Те т'ьме һерс к'әви? Хәзәба Тәйе мина агьр алав бьдә?

[6] Һерсе ль сәр wан мьләтада бьр'ежә, йед кӧ Тә нас накьн у ль сәр wан п'адшатийа, к'ижан кӧ гази наве Тә накьн.

[7] Чьмки wана Аqуб хwарьн, һеwаргәһа Wи кьрьнә ах-хwәли.

[8] Нәһәqийед пешийед мә нәкә бира Хwә, бьра р'ә'ма Тә зутьрәке бьгьһижә мә, чьмки әм гәләки мә'рьм бунә.

[9] Бона хатьре наве Хwә али мә бькә, Хwәдейе азадийа мә. Бона р'умәта наве Хwә мә хьлаз кә у гӧнәйед мә афу кә.

[10] Чьма п'утп'арьст бежьн: «К'ане Хwәдейе wан?» Бьра һ'әйфа хуна хӧламед Тәйә р'ьжийайи, әм бьбиньн бәр ч'ә'ве хwә, нав п'утп'арьстада.

[11] Бьра заринийа wан һесира бьгьһижә Тә, бь qәwата Хwәйә зор, йед мьрьнер'а дайи хьлаз кә.

[12] Һ'әфт щар ль п'ашьла щинаред мә вәгәр'инә wе беһӧрмәтийа wан, бь к'ижане Тӧ беqәдьр кьрьн, Йа Хӧдан.

[13] Ле бәле әм щьмә'та Тә у пәзе мерга Тә, әме һ'әта-һ'әтайе шькьрийе бьдьнә Тә у qӧр'нә-qӧр'нә р'умәта Тә сальх кьн бежьн.