[1] Усьв хwә авитә сәр р'уйе баве хwә, гьрийа у р'амуса.
[2] Усьв ә'мьр ль хӧламед хwәйә һ'әким кьрьн, кӧ баве wи зьмьр кьн , у һ'әкима Исраел зьмьр кьрьн.
[3] Нава чьл р'ожида әw һатә зьмьр кьрьне, чьмки бона ве йәке һаqас wәхт лазьм ә. мьсьрийа һ'әфте р'ожи шина wи кьрьн.
[4] Гава р'ожед шина wи дәрбаз бун, Усьв т'әви мала Фьрәwьн хәбәрда у гот: «Һәгәр мьн ль бәр ч'ә'ве wә к'әрәм дитийә, һиви дькьм аһа бежьнә Фьрәwьн:
[5] ‹Баве мьн әз дамә сонде у гот: «Ва әзе бьмьрьм, тӧ мьн wи мәзәлида дәфьн ки, к'ижан кӧ мьн хwәха бона хwә wәлате Кәнанеда к'ола йә». Ньһа изьна тә һәбә, әз һәр'ьм баве хwә дәфьн кьм у вәгәр'ьм›».
[6] Фьрәwьн гот: «Р'абә баве хwә дәфьн кә, чаwа әwи тӧ дайи сонде».
[7] Һьнге Усьв р'абу чу баве хwә дәфьн кә. Һ'әму хӧламед Фьрәwьн, р'успийед мала wи у һ'әму р'успийед Мьсьре т'әви wи һәвраз чун,
[8] ӧса жи т'әмамийа мала Усьв у бьрайед wи у нәфәред мала баве wида. Т'әне зар'ед хwә, кәри у гар'анед хwә Гошәнеда һьштьн.
[9] Т'әви wи ә'рәбә у сийари жи һәвраз чун, ӧса кӧ бунә к'омәкә мәзьн.
[10] Әw һатьнә wи алийе Урдӧне, Горен-Атаде. Ль wе дәре гәләки гьрийан, кьрьн qар'ә-qар' у һеwәрзә у бона баве хwә һ'әфт р'ожа шин кьрьн.
[11] Гава кәнанийед wи wәлатида кӧ дьман, шина Горен-Атадеда дитьн, готьн: «Әв шина гьран йа мьсьрийа йә!». Ләма жи наве wи щийе wи алийе Урдӧне данин: «Абел-Мисрайим ».
[12] Кӧр'ед Аqуб ӧса жи кьрьн, чаwа кӧ wи т'әми кьрьбу.
[13] Кӧр'а әw бьрьнә wәлате Кәнане у әw шкәфта ә'рде Махпелайә пешбәри Мамреда дәфьн кьрьн, йа кӧ Бьраһим ә'рдева, чаwа мьлк' бона гор'ьстен жь Әфроне һ'ити к'ьр'и бу.
[14] Усьв пәй дәфьнкьрьна баве хwәр'а, бь т'әви бьрайед хwә у һ'әмуйед кӧ т'әви wи бона дәфьнкьрьна баве wи һәвраз һатьбун, вәгәр'ийа Мьсьре.
[15] Бьрайед Усьв дина хwә дане кӧ баве wан мьр, нава хwәда готьн: «Бәлки Усьв бона wе хьрабийа кӧ мә сәре wи кьрийә к'ине мәр'а бажо, әw жи сәре мә бькә».
[16] Һьнге wана Усьвр'а щаб шанд у гот: «Баве тә бәри мьрьна хwә т'әми да у гот кӧ
[17] аһа бежьнә Усьв: ‹Бь к'әрәма хwә нәһәqи у гӧне бьрайед хwә, бь к'әрәма хwә бьбахшинә, кӧ һьндава тәда хьраби кьрьнә› ньһа һиви дькьм нәһәqийа хӧламед Хwәдейе баве хwә бьбахшинә». Гава wан әв йәк гот, Усьв гьрийа.
[18] Бьрайед wи жи чун хwә ль бәр дәвр'уйа авитьн у готьн: «Аwа әм хӧламед тә нә».
[19] Усьв готә wан: «Нәтьрсьн, чьма әз дәwса Хwәде дьгьрьм?
[20] Р'аст ә һун һьндава мьнда хьраб фькьрин, ле Хwәде фькьри кӧ wе бькә qәнщи, wәки мина р'ожа ироин, ә'мьре гәләк мәрийа хwәй кә.
[21] Ньһа нәтьрсьн, әзе wә у зар'ед wә нан-ав кьм». Аһа бь заре ширьн хәбәрдане, бәр дьле wанда һат.
[22] Усьв Мьсьреда ма, әw у мала бавед хwәва. Усьв сәд дәһә сала жит.
[23] Усьв ч'ьр'-ч'ьр'кед хwәйә жь Әфрайим дитьн, у зар'ед Махире Мьнашәйе жи Усьв сәр чокед хwә дитьн .
[24] Усьв готә бьрайед хwә: «Әзе бьмьрьм, ле ә'сә Хwәдейе сәр wәда бе у wә жь ви wәлати һәвраз дәрхә. Wе wә бьбә wи wәлати, бона к'ижани әwи Бьраһим, Исһаq у Аqубр'а сонд хwар».
[25] Усьв кӧр'ед Исраел да сонде у гот: «Ә'сә Хwәдейе сәр wәда бе, һәстуйед мьн жи жь вьр дәрхьн һәвраз бьбьн».
[26] Усьв сәд дәһә салийеда мьр. Әw зьмьр кьрьн у Мьсьреда әw кьрьнә qавәке.