[1] Р'аһеле дина хwә дайе кӧ әw Аqубр'а зар'а найнә, һ'әвсуди хушка хwә кьр у готә Аqуб: «К'а зар'а бьдә мьн, йан на әзе щандьм».
[2] Һерса Аqуб ль Р'аһеле р'абу у готе: «Чьма стәхӧла әз дәwса Хwәде дьгьрьм, кӧ бәре зька жь сәр тә бьр'ийә?»
[3] Әwе гот: «Ва йә щарийа мьн Билһа, һәр'ә щәм wе, бьра әw ль сәр чоке мьн бьwәльдә, кӧ зар'е мьн жь wе һәбьн».
[4] У wе щарийа хwә Билһа чаwа жьн да wи. Аqуб сәре хwә wер'а дани.
[5] Билһа пе ма у Аqубр'а кӧр'әк ани.
[6] Һьнге Р'аһеле гот: «Хwәде ль сәр һәqи у нәһәqиеда ньһер'и, дәнге мьн жи бьһист у кӧр'әк да мьн». Ләма наве wи дани Дан .
[7] Щарийа Р'аһеле Билһа диса пе ма кӧр'е дӧда Аqубр'а ани.
[8] Р'аһеле гот: «Әз хушка хwәр'а к'әтьмә һ'ӧщәте у мьн зора wе бьр». У Наве wи дани Нәфтәли .
[9] Леайе гава дит кӧ жь зар'а һатә бьр'ине, щарийа хwә Зилпа чаwа жьн гьрт да Аqуб.
[10] Щарийа Леайе Зилпайе Аqубр'а кӧр'әк ани.
[11] Леайе гот: «Әз бәхтәwар ьм!» У наве wи дани Гад .
[12] Щарийа Леайе Зилпайе кӧр'е дӧда Аqубр'а ани.
[13] Леайе гот: «Әз хwәзьли мә! К'ӧлфәте хwәзийа хwә ль мьн биньн». У Наве wи дани Ашер .
[14] Р'ожед нандьруне Р'убен чу нава зәвийа, әwи гьзеред бәйани дитьн у ани да дийа хwә Леайе. Һьнге Р'аһеле готә Леайе: «К'әрәма хwә, һьнәк жь wан гьзеред бәйанийә кӧр'е хwә бьдә мьн жи».
[15] Ле Леайе гот: «Тә мере мьн жь мьн стандийә бәс нинә, гьзеред кӧр'е мьнә бәйани жи дьхwази?» Р'аһеле готе: «Бьра ишәв әw т'әви тә р'азе, жь бәр гьзеред кӧр'е тәйә бәйанива».
[16] Еваре Аqуб жь к'әwшен дьһат, Леа пешийа wида чу у готе: «Тӧ гәрәке т'әви мьн р'азейи, чьмки мьн тӧ бь гьзеред кӧр'е хwәйә бәйани к'ьрекьри йи». У әw wе шәве т'әви wе р'аза.
[17] Хwәде дәнге Леайе бьһист у Леа пе ма кӧр'е пенща Аqубр'а ани.
[18] Һьнге Леайе гот: «Хwәде һәqе мьн да мьн, чьмки мьн щарийа хwә да мере хwә». У наве wи дани Исахар .
[19] Леа диса пе ма у Аqубр'а кӧр'е шәша ани.
[20] Һьнге Леайе гот: «Хwәде п'ешк'ешәкә баш да мьн, мере мьне иди щәм мьн бьминә, чьмки мьн wир'а шәш кӧр' анинә». У наве wи дани Зәбулон .
[21] Хьлазийе qизәк ани у наве wе дани Дина.
[22] Хwәде Р'аһел бир ани у Хwәде дәнге wе бьһист бәт'ьне wе вәкьр.
[23] Әw пе ма кӧр'әк ани у гот: «Хwәде qара мьн да һьлдане».
[24] Наве wи дани Усьв у гот: «Дә бьра Хӧдан кӧр'әки дьн жи ль мьн зедә кә».
[25] Пәй ве йәкер'а, гава Р'аһеле Усьв ани, Аqуб готә Лабан: «Изьна тә һәбә, кӧ әз һәр'ьмә щи у wат'ане хwә.
[26] Жьн у зар'ед мьн бьдә мьн, бона к'ижана мьн тәр'а хӧламти кьр у әз һәр'ьм, чьмки хӧламтийа мьн тәва ә'йан ә, мьн чь хӧламти тәр'а кьрийә».
[27] Лабан готе: «Һәгәр мьн бәр ч'ә'ве тә к'әрәм дит, һиви дькьм! Мьн те дәрхьстийә кӧ Хӧдан бона хатьре тә ль сәр мьнда барандийә».
[28] У гот: «Һәqе хwә бежә әз бьдьм».
[29] Һьнге Аqуб готе: «Тӧ зани мьн чаwа тәр'а хӧламти кьрийә у һ'әйwанед тәйә ль бәр мьн чаwа бунә.
[30] Чьмки бәри һатьна мьн, мале тә һьндьк бу, ле ль һәв зедә бу, Хӧдан бь һатьна мьн ль сәр тәда баранд. Иди әзе к'әнге бона мала хwә бьхәбьтьм?»
[31] Лабан пьрси: «Әз чь бьдьмә тә?» Аqуб готе: «Тӧ тьштәки нәдә мьн. Һәгәр тӧ ве готьна мьн бьки, әзе диса кәрийе пәзе тә хwәй кьм у бьч'ериньм.
[32] Әз иро бьк'әвьмә нава т'әмамийа кәре тә, чьqас пәзе дәq-дәqи у бәләк һәнә, ӧса жи нава бәрха чьqас qәр һәнә у нава бьзьнада жи чьqаси бәләк у дәq-дәqи һәнә, әз вәqәтиньм. Бьра әвана бьбьнә һәqе мьн.
[33] Иро шунда р'астийа мьне ль бәр тә к'ьфш бә, гава тӧ бейи дина хwә бьди һәqе мьн. Һәгәр нава кәрийе ль бәр мьнда, бьзьнәк нә дәq-дәqи у нә бәләк бә у бәрх нә qәр бә, әw ль щәм мьн чаwа йед дьзийе бьн».
[34] Лабан готе: «Баш ә! Бьра wәкә готьна тә бә».
[35] Ле wе р'оже Лабан чьqас нерийед шьв-шьви у бәләк у чьqас бьзьнед дәq-дәqи у бәләк, аwа готи чьqас йед дәq-дәqийә сьпи у бәрхед qәр һәбун, вәqәтандьн данә кӧр'ед хwә,
[36] у әw р'ийа се р'ожа дури Аqуб хьстьн. Аqуб кәрийе пәзе Лабани майин хwәй кьр.
[37] Аqуб хwәр'а жь дара сьпьндаре, бәһиве у чинаре шьвдаред тәр' чекьрьн, әwи qалькед wан щи-щийа дат'әр'аштьн сьпи нәхш кьрьн, ӧса кӧ ль сәр шьвдара сьпикайи к'ьфш дьбу.
[38] Һьнге әwи шьвдаред хwәйә дат'әр'әшанди, данинә нава һ'әwзед аввәхwарьне, кӧ гава кәри бен аве вәхwьн, әw ль бәр пез бьн, дәма аввәхwарьне пәз бе фә'ла.
[39] Пәз ль бәр шьвдара дьһатьнә фә'ла у дьзан бәрхед шьв-шьви, дәq-дәqи у бәләк данин.
[40] Аqуб бәрх вәдьqәтандьн у бәре пез дьданә алийе йед шьв-шьви у qәрә кӧ нава кәре Лабанда һәбун. Аqуб кәре хwә вәqәтанд, т'әви пәзе Лабан нәкьр.
[41] У гава wәхте фә'ле пәзе к'окә-р'ьнд дьһат, Аqуб әw шьвдар даданинә нава һ'әwзе аве ль бәр ч'ә'ве пез, wәки әw ль бәр шьвдара фә'ле хwә бьстиньн.
[42] Ле ль бәр пәзе жарә-һур данәданин у йед хьрабә бь кемаси п'ара Лабан к'әтьн, йед к'окә-р'ьнд п'ара Аqуб.
[43] Ӧса әва мәрьва гәләки пешда чу. Бу хwәйе кәрийед пезә мәзьн, щарийа, хӧлама, дәва у к'әра.