[1] Һьнге Исһаq гази Аqуб кьр, дӧа ль wи кьр, т'әми да wи у гот: «Qизед кәнани нәстини.
[2] Ле р'абә һәр'ә Паддан-Араме, мала баве дийа хwә Бәт'уел у жь wьр жь qизед хале хwә Лабан, qизе хwәр'а бьхwазә.
[3] У бьра Хwәдейе Һәри Зор тә бәрәк'әт кә, тә шин кә у ль һәв зедә кә, жь тә мьхӧлqәт пешда бен.
[4] Дә бьра әw хер-бәрәк'әта сәр Бьраһим ль сәр тә у зӧр'әта тәда бьбаринә, wәки әw wәлате кӧ тә теда хәриби дәрбаз кьрийә, бьбә мьлк'е тә, к'ижан кӧ Хwәде дабу Бьраһим».
[5] Исһаq Аqуб шанд, әw чу Паддан-Араме щәм хале хwә Лабане кӧр'е Бәт'уеле арами .
[6] Әсаw дит кӧ Исһаq дӧа Аqуб кьр у әw шандә Паддан-Араме, кӧ жь wьр хwәр'а qизе бьхwазә, дәма кӧ дӧа wи дькьр, т'әми да wи у гот: «Жь qизед кәнанийа хwәр'а нәхwази»,
[7] Аqуб жи гӧр'а де у баве хwә кьр, чу Паддан-Араме.
[8] Әсаw к'ьфш кьр, кӧ Исһаqе баве wи qизед кәнанийа бәгәм накә,
[9] һьнге Әсаw чу щәм Исмайил у qиза Исмайиле кӧр'е Бьраһим, Маһ'алата хушка Небайот хwәр'а хwәст, ани сәр жьнед хwә.
[10] Аqуб жь Бир-Шевайе дәрк'әт, чу бәр бь Һ'аране.
[11] Әw гьһиштә щики, р'о ле чу ава, әwи кәвьрәки wан дәра һьлда дани бәр сәре хwә у ль wи щийи п'алда р'аза, шәва хwә ль wьр дәрбаз кьр.
[12] Әwи хәwнәк дит, дина хwә дайе wе п'епәлингәк сәр ә'рде данийә у сәре wе гьһиштийә ә'змен. У ва йә мьлйак'әтед Хwәде сәр wер'а һьлдьк'ьшийан у пәйа дьбун.
[13] У аwа Хӧдан сәр wир'а сәкьнибу у дьгот: «Әз Хӧдан Хwәдейе кал-баве тә Бьраһим у Хwәдейе Исһаq ьм. Әзе wи ә'рде кӧ тә ль сәр п'алдайә бьдьмә тә у зӧр'әта тә.
[14] Зӧр'әта тәйе wәкә т'оза ә'рде зедә бә, wе бәрбь р'оһьлат у р'оавайе, бакӧр у башуре бәла бә. Бь тә у зӧр'әта тә wе дӧа ль һ'әму бәрәкед дьнйайе бьбә.
[15] Аwа әз т'әви тә мә, тӧ к'ӧда жи һәр'и әзе тә хwәйи кьм у тә диса вәгәр'иньмә ви wәлати. Чьмки әз жь тә дур нак'әвьм, һ'әта кӧ әw тьште мьн тәр'а готийә нәйньмә сери».
[16] Аqуб жь хәwа хwә һ'ьшйар бу у гот: «Р'асти Хӧдан ль вьр ә, ле мьн ньзаньбу!»
[17] Һьнге әw тьрсийа у гот: «Әв дәр чьqаси саw ә! Әв тьштәки дьн нинә, ле мала Хwәде йә у дәргәһе ә'змана йә».
[18] Аqуб сьбәһе зу р'абу, әw кәвьре бәр сәре хwә һьлда һ'әйкәл да сәкьнандьне бь р'ун кельк р'ун кьр.
[19] Наве wи щийи дани «Бет'-Ел », ле бәре наве wи бажари Луз бу.
[20] Һьнге Аqуб ад-qьрар кьр у гот: «Һәгәр Хwәде т'әви мьн бә у ве р'ейеда мьн хwәй кә, йа кӧ әз теда дьчьм, ӧса жи нане хwарьна мьн у к'ьнща ль хwәкьрьна мьн бьдә,
[21] у сах-сьламәт вәгәр'ьмә мала баве хwә, бьра Хӧдан бьбә Хwәде мьн,
[22] у әв кәвьре кӧ мьн чаwа һ'әйкәл да сәкьнандьне жи бьбә мала Хwәде. У жь һәр тьштед кӧ тӧ бьди мьн, әзе р'аст жь дәһа йәки бьдьм тә».