[1] Бьраһим жь wе дәре к'оч' кьр чу бәр бь Нәщәфе, ль навбәра Qадеше у Шуреда ма у Герареда фьрари дәрбаз кьр
[2] Ль wе дәре Бьраһим бона жьна хwә Сәрайе гот: «Әва хушка мьн ә». П'адше Гераре Абимәләх шанд Сәрайи жь хwәр'а ани.
[3] Ле Хwәде шәв һатә хәwна Абимәләх у готе: «Ва те бона wе к'ӧлфәта кӧ тә ани, те бьмьри, чьмки мере wе һәйә».
[4] Абимәләх һе дәст нәдабуйе у гот: «Йа Хwәйе мьн, гәло те к'ока мьләте бесущ бини?
[5] Әви нә гот: ‹Әва хушка мьн ә?› У әве жи гот: ‹Әва бьрайе мьн ә›. Әв йәк мьн бь дьле сах у дәсте паqьж кьр».
[6] У Хwәде хәwнеда wир'а гот: «Мьнва ә'йан ә, кӧ тә әв йәк бь дьле хwәйи сах кьр, ләма жи мьн тӧ жь wи гӧнәйе кӧ тәйе ль бәр ч'ә'ве мьн бькьра хwәйи кьри у нәһьшт кӧ тӧ дәст бьди wе.
[7] Ньһа жьне вәгәр'инә бьдә мере wе, чьмки әw п'ехәмбәр ә у әwе бона тә дӧа бькә, те бьжийи. Ле һәгәр тӧ wе вәнәгәр'ини, заньбә кӧ тӧ у һ'әмуйед тәйе ә'сә бьмьрьн».
[8] Абимәләх сьбәһе зу р'абу, гази һ'әму бәрдәстийед хwә кьрьн у һәр тьшт wанр'а гьли кьр, әв мәрьвана гәләки тьрсийан.
[9] Һьнге Абимәләх гази Бьраһим кьр у готе: «Әв тә чь ани ль сәре мә? Мьн һьндава тәда чь нәһәqи кьрьбу, кӧ тә гӧнәки мәзьн ль сәр мьн у п'адшатийа мьнда ани? Тә һьндава мьнда тьште нәбуйи кьр».
[10] У Абимәләх готә Бьраһим: «Тә чь р'е тер'а дит, кӧ тә әв тьшт кьр?»
[11] Бьраһим гот: «Чь р'аст ә, әз фькьрим мьн гот: ‹Ль ве дәре хофа Хwәде т'ӧнә, wе р'уйе жьна мьнда мьн бькӧжьн›.
[12] Йа дӧда жи әва р'асти хушка мьн ә, әм жь баве нә ле нә жь денә, мьн әw стандийә.
[13] Чахе Хwәде әз жь мала баве хwә дәрхьстьмә хәрибийе, мьн готә wе: ‹Ве qәнщийе мьнр'а бькә, һәр щийе кӧ әме һәр'ьне, бона мьн бежә, кӧ әва бьрайе мьн ә›».
[14] Һьнге Абимәләх р'абу, пәз у дәwар, хӧлам у щари анин данә Бьраһим у жьна wи Сәрайи жи ле вәгәр'анд.
[15] Ӧса жи Абимәләх готә Бьраһим: «Ва йә wәлате мьн ль бәр тә йә, к'идәре дьхwази ль wьр жи бьминә».
[16] Сәрайер'а жи гот: «Ва әз һ'әзар зиви дьдьмә бьрайе тә, кӧ әв йәк ль бәр ч'ә'ве һ'әмуйед т'әви тә бьбә хелийа нав-намусийе у р'успитийа ль бәр һ'әмуйа».
[17] Һьнге Бьраһим ль бәр Хwәде дӧа кьр у Хwәде Абимәләх, жьна wи у щарийед wи qәнщ кьрьн у зар'ок анин.
[18] Чьмки Хӧдан р'уйе жьна Бьраһим Сәрайеда, бәт'ьне һ'әму к'ӧлфәтед мала Абимәләхда дада бу.