[1] Бьраһим жьнәк жи станд, наве wе Qьтура.
[2] Әве әв кӧр' Зимран, Йоqшан, Мьдан, Мьдйан, Ишбаq у Шуах жер'а анин.
[3] Йоqшанр'а Шьба у Дедан бун. Деданр'а ашури, льтуши у льуми бун.
[4] Мьдйанр'а Әйфа, Әфәр, Һәнох, Абида у Әлдаһа бун. Әв һ'әму жи зар'ед Qьтурайе бун.
[5] Бьраһим һ'әму һәбука хwә да Исһаq.
[6] Ле п'ешк'еш данә кӧр'ед щарийайә жь wи у сахийа хwәда әw жь кӧр'е хwә Исһаq дур хьстьн, бәре wанда р'оһьлате, әw шандьнә алийе wәлатед р'оһьлате.
[7] Р'ожед ә'мьре Бьраһимә кӧ wи дәрбаз кьрьн, сәд һ'әфте пенщ сал бун.
[8] Бьраһим бу каләки әхтйар, жь ә'мьре хwә т'ербуйи, р'ӧһ'е хwә да у мьр, чу гьһиштә щьмә'та хwә.
[9] Кӧр'ед wи Исһаq у Исмайил, баве хwә, шкәфта Махпелайейә ә'рде Әфроне кӧр'е Сохаре һ'итида дәфьн кьрьн, йа кӧ пешбәри Мамре бу,
[10] wи ә'рдида, к'ижан кӧ Бьраһим жь зар'ед һ'итийа к'ьр'и бу. Ль wьр Бьраһим у жьна wи Сәрайи һатьнә дәфьн кьрьне.
[11] Ль пәй мьрьна Бьраһимр'а, Хwәде дӧа кӧр'е wи Исһаq кьр. Исһаq незики Бир-Лаһай-Роийе щи-wар бу, ма.
[12] Әв ә сәрәщәма р'ьк'ьнйата Исмайиле кӧр'е Бьраһим, кӧ щарийа Сәрайийә Һащәра мьсьри Бьраһимр'а ани.
[13] Наве кӧр'ед Исмайил әв ьн, бь навед хwә у р'ьк'ьнйата хwәва. Ньхӧрийе Исмайил Небайот бу, пәйр'а Qедар, Адбел, Мибсам,
[14] Мишма, Дума, Масса,
[15] Хадад, Тема, Йәтур, Нафиш у Qедьма бун.
[16] Әв ьн кӧр'ед Исмайил у навед wан, щи-wаред хwә у конед хwәва. Әвана ль гора ел-ә'ширед хwәва донздәһ мир бун.
[17] Салед ә'мьре Исмайил сәд си у һ'әфт сал бун у р'ӧһ'е хwә да мьр, т'әви щьмә'та хwә бу.
[18] Исмайилийа жь Һ'аwилайе гьрти һ'әта Шуре щи-wар бун, кӧ пешбәри Мьсьре, ль сәр р'ийа кӧ дьчә Ашурйа. Әвана ль бәр ч'ә'ве һ'әму бьрайед хwә щи-wар бун, әw ащьз кьрьн.
[19] Әв ә сәрһатийа р'ьк'ьнйата кӧ пәй Исһаqе Бьраһим к'әт. Бьраһимр'а Исһаq бу.
[20] Исһаq кӧ бу чьл сали, qиза Бәт'уеле арами, жь Паддан-Араме Р'евека станд, хушка Лабане арами.
[21] Исһаq бона жьна хwә лава-диләк жь Хӧдан кьрьн, чьмки әwе зар' нәданин. Хӧдан дәнге wи бьһист, жьна wи Р'евека һ'әмлә дәрк'әт.
[22] Кӧр'ә һе бәт'ьне wеда бун һәвдӧр'а шәр' дькьрьн, һьнге әwе гот: «Әв чь һатә сәре мьн?» У чу кӧ жь Хӧдан бьпьрсә.
[23] Хӧдан готә wе: «Бәт'ьне тәда дӧ мьләт һәнә, у жь бәдәна тә, дӧ щьмә'те жь һәв щьһе бьн, щьмә'тәке жь щьмә'та дьн qәwаттьр бә. У йе мәзьн wе хӧламтийе йе бьч'ук бькә».
[24] У гава р'ожа буйина wан пер'а гьһишт, ва йә әw щеwи бун бәт'ьне wеда.
[25] Йе пешьн кӧ бу, йәки сори пьр'ч' бу мина к'ӧрк, наве wи Әсаw данин.
[26] Пәй wир'а, бьре wи бу, дәст авити пә'нийа Әсаw гьрти, у наве wи данин Аqуб . Һьнге Исһаq шест сали бу, гава Р'евека әw анин.
[27] Әw зар' мәзьн бун, Әсаw бу мәрьвәки чоле, неч'ирванийеда йәки жири сәрхwә. Ле Аqуб мәрьвәки дурәшәр' у жь кона qәт дәрнәдьк'әт.
[28] Исһаq Әсаw һ'ьз дькьр, чьмки әwи неч'иред wи дьхwарьн, ле Р'евекайе Аqуб һ'ьз дькьр.
[29] Щарәке Аqуб шорбә чедькьр, Әсаw жь чоле к'әсьри һат.
[30] Әwи готә Аqуб: «Бькә qәнщи, жь wе шорба бәрк'әлейә сор, мьнр'а дагьрә әз бьхwьм, дьле мьн хава дьчә». Ләма жи wир'а готьн: «Әдом ».
[31] Ле Аqуб готә wи: «К'а ньһа ньхӧртийа хwә бьфьрошә мьн».
[32] Һьнге Әсаw гот: «Әз ва дьмьрьм, к'ара мьн чь ньхӧртийеда һәйә?»
[33] Аqуб готе: «Дә ньһа дәсте мьнда сонд бьхwә». Әwи дәсте wида сонд хwар у ньхӧртийа хwә фьротә Аqуб.
[34] Һьнге Аqуб нан у шорба ниська да Әсаw, әwи хwар у вәхwар, р'абу чу. Бь ви аwайи Әсаw ньхӧртийа хwә беһӧрмәт кьр.