<Дәстпебун 6

[1] Гава дәстпебу мәрьв ль сәр дьне зедә бун у qиз wанр'а бун,

[2] зар'ед Хwәде дитьн кӧ qизед мәрьвайе бәдәw ьн, жь wан к'е к'ижан бәгәм дькьр хwәр'а жьн дьстандьн.

[3] Һьнге Хӧдан гот: «Гәрәке р'ӧһ'е мьн һ'әта-һ'әтайе ль сәр мерьв нәминә, чьмки әw хун у гошт ә, ле р'оже ә'мьре wан сәд бист сал бьн».

[4] Wе һьнге ль сәр ә'рде ә'савә һәбун, ӧса жи wи чахи гава зар'ед Хwәде дәст давитьнә qизед мәрьвайе, әwана wанр'а зар' данин. Әвана әw мерхас бун, кӧ бәреда бь нав у дәнг бун.

[5] Хӧдан дит кӧ хьрабийа мәрьва ль сәр ә'рде зедә дьбә у нет у фькьред дьле wан жи һәр р'ож хьраби йә.

[6] Һьнге Хӧдан бәр хwә к'әт кӧ ль сәр ә'рде мәри хӧльqандийә у гәләки дьлтәнг бу.

[7] У Хӧдан гот: «Әз жь сәр р'уйе ә'рде мәрьвед кӧ мьн хӧльqандьнә бьдьмә һьлдане, жь мәрьвада гьрти һ'әта һ'әйwен, жь шулькийа һ'әта тәйрәдед ә'змен, чьмки әз п'ошман ьм ль хӧльqандьна wан».

[8] Ле Нӧһ бәр ч'ә'ве Хӧдан к'әрәм дит.

[9] Әв ә сәрһатийа р'ьк'ьнйата Нӧһ. Нӧһ нава мәрьвед wи зәманида мәрьвәки р'аст у к'амьл бу. Нӧһ р'ийа Хwәдеда дьчу.

[10] Нӧһр'а се кӧр' бун Сам, Һам, Йәфәт.

[11] Ә'рд ль бәр ч'ә'ве Хwәде һ'әр'ьми wеран бьбу у хьрабийава ә'рд т'ьжи бьбу.

[12] Хwәде дина хwә да дьнйайе, кӧ ва йә әw һ'әр'ьмийә wеран буйә, чьмки һәр бәдәнәкә ль сәр дьне р'ийа хwә һ'әр'ьмандийә.

[13] Һьнге Хwәде готә Нӧһ: «Qьр'а һ'әмуйед хwәйибәдән һатийә ль бәр ч'ә'ве мьн, чьмки р'уйе ванда ә'рд хьрабийава т'ьжи буйә у ва әзе wан т'әви ә'рде wеран кьм».

[14] Ле тӧ хwәр'а жь даре гофер гәмике чекә, һьндӧр'е гәмийе бь гоза чеки у дәр у һьндӧр'ва тӧ wе qир ки.

[15] Тӧ гәрәке wе аһа чеки. Дьрежайа гәмийе сесьд зәнд, бәрайи пенщи зәнд у бьльндайи жи си зәнд бә.

[16] У жорва wәкә зәндәке к'ӧләке гәмийер'а чеки, дәре гәмийе жи к'еләкева вәки у qате жор жер у бьни чеки.

[17] Ва әзе ава тофане ль сәр дьне р'акьм, wәки һәр бәдәна кӧ бин ль бәр һәйә бьн п'әр'е ә'зменда qьр' бә у ль сәр р'уйе ә'рде жи чь кӧ һәйә ӧнда бә.

[18] Ле әзе пәймана хwә т'әви тә гьредьм, тӧ т'әви кӧр'ед хwә у т'әви жьна хwә у букед хwә бьк'әви гәмийе.

[19] Ӧса жи жь һәр бинбәри, жь һәр бәдәне щот-щот нер у ме бьки гәмийе, кӧ т'әви тә сах бьминьн.

[20] Жь һәр щур'ә тәйрәдә, жь һәр щур'ә һ'әйwан, жь һәр щур'ә шульки wе щот-щот бенә ль щәм тә кӧ сах бьминьн.

[21] Тӧ жи жь һ'әму хӧрәке кӧ те хwарьне т'әви хwә һьлди, ль щәм хwә бьди сәр һәв, кӧ бьбә хӧрәке тә у wан.

[22] У Нӧһ һәр тьшт кьр, Хwәде чаwа т'әми дабу wи, әwи ӧса жи кьр.