[1] Ле к'ӧлфәта Абрам, Сарайе, wир'а зар' нә данин. У щарийәкә Сарайе мьсьри һәбу, наве wе Һащәр бу.
[2] Сарайе готә Абрам: «Ва йә Хӧдан зар'анин п'ара мьн нәдайә, аwа р'абә һәр'ә щәм щарийа мьн, бәлки жь wе зар'е п'ара мьн бьк'әвьн». Абрам гӧр'а Сәрайийе кьр.
[3] К'ӧлфәта Абрам Сарайе, пәй дәһә салар'а кӧ Абрам ә'мьре хwә ль wәлате Кәнанеда дәрбаз кьр, щарийа хwәйә мьсьри, Һащәр ани кьрә жьна мере хwә Абрам.
[4] Абрам сәре хwә Һащәрер'а дани у әw пе ма. Әwе кӧ дит әw пе майә, ханьма wе ль бәр ч'ә'ва р'әш бу.
[5] Һьнге Сарайе готә Абрам: «Әв qара мьн гӧнәк'арийа тә йә, мьн щарийа хwә кьрә п'ашьла тә, ле әwе дит кӧ әw пе майә, әз ль бәр ч'ә'ве wе р'әш бум, бьра Хӧдан ль сәр мьн у тәда бьньһер'ә».
[6] Һьнге Абрам готә Сарайе: «Ва йә щарийа тә дәсте тәда йә, дьле тә чаwа дьхwазә ӧса жи бькә». Һьнге Сарайе иди р'у нәда wе у әw жь Сарайе р'әви чу.
[7] Мьлйак'әте Хӧдан әw чоле ль сәр канике дит. Канийа ль сәр р'ийа Шуре.
[8] У готе: «Һащәр! Щарийа Сарайе, тӧ жь к'ӧ тейи! Те к'ӧда һәр'и?» Әwе гот: «Жь ханьма хwә Сарайе әз дьр'әвьм».
[9] Һьнге Мьлйак'әте Хӧдан готә wе: «Вәгәр'ә щәм ханьма хwә у хwә ль бәр wе бьшкенә».
[10] У Мьлйак'әте Хӧдан диса готе: «Әзе зӧр'әта тә ӧса гәләки зедә кьм, кӧ жь дәст гәләкбуне wе нәйе жьмаре».
[11] Мьлйак'әте Хӧдан готе: «Ва йә тӧ дӧһ'ала йи, те кӧр'әки бини, те наве wи Исмайил дайни, чьмки Хӧдан зәлулийа тә бьһист.
[12] Әwе бьбә мәрьвәки ави. Дәсте wийе ль бәр һ'әмуйа р'абә у дәсте һ'әмуйа жи ль бәр wи р'абә. У әwе ль бәр ч'ә'ве һ'әму бьрайед хwә бьжи wан ащьз кә».
[13] Һьнге Һащәре наве wи Хӧдани, к'ижани кӧ т'әви wе хәбәр дабу дани: «Тӧ йи Хwәдейе кӧ мьн дьбини», чьмки әwе гот: «Мьн р'аст әw ль вьр дит у әз диса сах мамә?»
[14] Ләма жи wе бирер'а Бир-Лаһай-Рои те готьне. Әw бир навбәра Qадеше у Бәрәдда йә.
[15] Пәй ве йәкер'а Һащәре Абрамр'а кӧр'әк ани у Абрам наве wи кӧр'е кӧ жь Һащәре wир'а бьбу дани Исмайил.
[16] Wи чахи кӧ Һащәре Абрамр'а Исмайил ани, Абрам һ'әйште шәш сали бу.