[1] Сәрайе сәд бист һ'әфт сали ә'мьр кьр, ә'мьре Сәрайе һаqас сал бун.
[2] Сәра ль wәлате Кәнане, Qирйат-Арбайеда, аwа готи ль Һеброне, мьр. Бьраһим һат сәр Сәрайе гьрийа у шина wе кьр.
[3] Бьраһим жь мьрийа хwә дур к'әт, т'әви зар'ед һ'итийа хәбәрда у гот:
[4] «Әз нава wәда йәки р'еwи у хәриб ьм, ньһа мьлк'әки бона мәхбәр бьдьнә мьн, wәки әз мьрийа хwә жь бәр ч'ә'ве хwә дәфьн кьм».
[5] Һьнге зар'ед һ'итийа ль Бьраһим вәгәр'андьн у готьне:
[6] «Хwәйе мә, гӧһ бьдә мә, тӧ мирәки Хwәдейи нава мәда, тӧ дькари мьрийа хwә нава мәхбәред мәда, щийе һәри qәнщда дәфьн ки. Бона дәфьнкьрьна мьрийа хwә, жь мә т'ӧ кәсе мәхбәре хwә на-на накә».
[7] Бьраһим р'абу хwә ль бәр щьмә'та wи wәлати, зар'ед һ'итийа та кьр
[8] у wанр'а гот: «Һәгәр һун дьхwазьн, кӧ әз мьрийа хwә жь бәр ч'ә'ве хwә дәфьн кьм, кӧ ӧса йә бьбьһен у бона мьн Әфроне кӧр'е Сохарр'а хәбәрдьн бежьне,
[9] wәки әw шкәфта Махпелайейә сәре ә'рде хwә, чаwа мьлк' ль бәр wә чь һежа бә, бона мәхбәр бьфьрошә мьн».
[10] Әфрон жи кӧ нава зар'ед һ'итийа р'уньштьбу. Һьнге Әфроне һ'ити бь дәнг ль бәр зар'ед һ'итийа, аwа готи ль бәр һ'әмуйед кӧ дәргәһва дьк'әтьнә һьндӧр', ль Бьраһим вәгәр'анд у гот:
[11] «На, хwәйе мьн, бьбьһе әз чь дьбежьм: Әзе ә'рде жи бьдьмә тә, шкәфта феза wеда жи. Әзе ль бәр ч'ә'ве зар'ед мьләте хwә бьдьмә тә, мьрийа хwә ль wе дәре дәфьн кә».
[12] Диса Бьраһим хwә ль бәр щьмә'та wи wәлати та кьр
[13] у бь дәнг ль бәр щьмә'та wи wәлати, Әфронр'а хәбәрда у готе: «Һәгәр те т'әви мьн qайл би, әз һәqе ә'рде тә бьдьмә тә, тӧ жь дәсте мьн бьгьрә, кӧ әз мьрийа хwә ль wьр дәфьн кьм».
[14] Әфрон ль Бьраһим вәгәр'анд у гот:
[15] «Хwәйе мьн! К'әрәма хwә бьбьһе: Әw ә'рд бь хwә һежайи чарсьд шекьл зиви йә, нава мьн у тәда мәт'а wе чи йә? Мьрийа хwә дәфьн кә».
[16] Бьраһим готьна Әфрон qәбул кьр у Бьраһим һаqас зив к'ьшанд да Әфрон, чьqас кӧ wи ль бәр зар'ед һ'итийа готьбу, чарсьд шекьл зив, кӧ әв бу qимәте нава т'ӧщарәтийеда.
[17] Бь ви аwайи ә'рде Әфрони, Махпелада, пешбәри Мамре, әw ә'рд, шкәфта теда у һ'әму даред нава wи ә'рдида,
[18] ль бәр ч'ә'ве зар'ед һ'итийа у ль бәр һ'әмуйед кӧ дәргәһва дьк'әтьнә һьндӧр'е бажер, бу мьлк'е Бьраһим.
[19] Пәй ве йәкер'а Бьраһим жьна хwә Сәрайи шкәфта ә'рде Махпелайеда дәфьн кьр. Әва ә'рда ль wәлате Кәнанеда пешбәри Мамре бу (аwа готи ль Һеброне).
[20] Жь зар'ед һ'итийа әв ә'рд у шкәфта теда, чаwа мьлк'е бона гор'ьстан, аһа гьһиштә Бьраһим.