[1] Аqуб сәре хwә бьльнд кьр, дина хwә дайе wе Әсаw те, чарсьд мер жи пер'а. Һьнге әwи зар' бәлайи ль сәр Леайе, Р'аһеле у һәр дӧ щарийа кьрьн.
[2] Щари зар'ед wанва авитьнә пешийе, Леа зар'ед wева авитьнә пәй wан, Р'аһел у Усьв жи авитьнә пашийе.
[3] Аqуб да пешийа wан у һ'әта гьһиштә бьре хwә, һ'әфт щара һ'әта ә'рде дәвәр'уйа чу.
[4] Һьнге Әсаw бәзи чу пешийа wи, әw һ'әмез кьр, дәсте хwә стӧкӧра wир'а бьр, әw р'амуса у ль сәр һәвда гьрийан.
[5] Әсаw сәре хwә кӧ бьльнд кьр, ч'ә'в к'ӧлфәта у зар'а к'әт, гот: «Әв чи тә нә?» Аqуб гот: «Әвана зар'ед кӧ Хwәде бь р'ә'ма хwә данә хӧламе тә әw ьн».
[6] Һьнге щари зар'ед хwәва незик буне у дәвәр'уйа чун.
[7] Леа зар'ед хwәва жи незик буне у дәвәр'уйа чун. Паше жи Р'аһел у Усьв незик буне у дәвәр'уйа чун.
[8] Әсаw пьрси: «Мәрәме wан к'омед кӧ әз р'ева р'асти wан һатьм чи йә?» Аqуб гот: «Бона ль бәр ч'ә'ве хwәйе хwә к'әрәм дитьнейә».
[9] Әсаw гот: «Һәбука мьн гәләкә бьре мьн, йа тә бьра тәр'а бә».
[10] Аqуб гот: «На, һиви дькьм, һәгәр мьн ль бәр ч'ә'ве тә к'әрәм дитийә, п'ешк'еша мьн жь дәсте мьн бьгьрә. Чьмки мьн р'уйе тә ӧса дит, те бежи йәк р'уйе Хwәде бьбинә у тӧ жь мьн р'ази йи.
[11] Һиви дькьм, ве бьмбарәкийе, йа кӧ мьн тәр'а анийә qәбул кә, әва дайина жь р'ә'ма Хwәде йә, һәр тьште мьн һәнә». У зор ле кьр әwи жи һьлда.
[12] Әсаw гот: «Әм р'абьн р'ек'әвьн, әзе ль пешийа тә һәр'ьм».
[13] Аqуб готә wи: «Хwәйе мьнва ә'йан ә, кӧ зар'ок назьк ьн у пәз дәwар жи зайи йә, һәгәр р'ожәке зу-зу бажон, һ'әму кәрийе qьр' бьн.
[14] Һиви дькьм, бьра хwәйе мьн пешийа хӧламе хwә һәр'ә, әзе хwәр'а һеди-һеди ньге һ'әйwанед ль бәр хwә у ньге зар'ар'а бем, һ'әта бьгьһижьмә Сеһире щәм хwәйе хwә».
[15] Әсаw гот: «Wәки ӧса йә, әз чәнд мәрьвед т'әви хwә, ль щәм тә бьһельм». Аqуб гот: «Бона чь? Т'әне бьра әз бәр ч'ә'ве хwәйе хwә к'әрәме бьбиньм».
[16] Wе р'оже Әсаw р'ийа хwәда вәгәр'ийа Сеһире.
[17] Аqуб к'оч' кьр чу Сукоте у хwәр'а мал чекьр, һ'әйwанед хwәр'а һ'ольк чекьрьн. Бона ве йәке наве wи щийи дани Сукот .
[18] Гава Аqуб жь Паддан-Араме һат у сах-сьламәт гьһиштә wәлате Кәнане, бажаре Шьхәме, ль бәр бажер кон вәгьртьн.
[19] Әw ә'рде кӧ кон ле вәгьртьбу, әw жь дәсте зар'ед Һаморе баве Шьхәм, бь сәд нале п'әра к'ьр'и.
[20] Ль wьр горигәһәк чекьр у наве wе дани Ел-Әлоһе-Исраел .