[1] Абрам, т'әви жьна хwә у т'әмамийа һәбука хwәва, Лут жи пер'а, жь Мьсьре һәвраз чу бәрбь Нәщәфе.
[2] Абрам һ'әйwен, зер' у зивава гәләки дәwләти бу.
[3] У әw бь фьрарийе жь Нәщәфе чу һ'әта Бет'-Еле, wи щийе кӧ бәре wи коне хwә ль навбәра Бет'-Еле у Ә'йеда ле дани бу.
[4] К'идәре кӧ пешда горигәһ чекьрьбу, Абрам ль wьр гази наве Хӧдан кьр.
[5] Луте кӧ т'әви Абрам чубу, пәз, дәwар у конед wи жи һәбун.
[6] Ле wи ә'рди т'ера wан нәдькьр, кӧ т'әви һәв бьмана, чьмки һәбука wан ӧса гәләк бу, кӧ нькарьбун т'әви һәв бьмана.
[7] Wә һьнге шьванед һ'әйwанед Абрам у шьванед һ'әйwанед Лут qьр'ка һәв гьртьн (wе һьнге кәнани у пьриззи wи wәлатида дьман).
[8] Абрам готә Лут: «Т'әwаqа мьн ль тә һәйә, бьра ль нава мьн у тәда у ль нава шьванед мьн у шьванед тәда дьлмайин нәк'әве, чьмки әм бьра нә.
[9] Ва йә, т'әмамийа wәлат ль бәр тә йә. Әз һиви дькьм жь мьн бьqәтә. Һәгәр тӧ һәр'и алийе ч'әпе, әзе һәр'ьмә алийе р'асте, һәгәр тӧ һәр'и алийе р'асте, әзе һәр'ьмә алийе ч'әпе».
[10] Лут сәре хwә бьльнд кьр у дина хwә дайе т'әмамийа дәшта Урдӧне кӧ дьһатә авдане, wе һьнге һе Хӧдан Содом у Гомора wеран нә кьрьбу, һ'әта Соһаре әw мина бахче Хӧдан бу у мина wәлате Мьсьре.
[11] Лут т'әмамийа дәшта Урдӧне хwәр'а бьжарт у к'оч' кьр чу алийе р'оһьлате. Әw аһа жь һәвдӧ qәтийан.
[12] Абрам wәлате Кәнанеда ма, ле Лут ль бажаред дәштеда щи-wар бу у конед хwә һ'әта Содоме лехьстьн.
[13] Ле бьнәлийед Содоме гәләки хьраб у гӧнәк'ар бун ль бәр Хӧдан.
[14] Гава Лут жь Абрам qәтийа, Хӧдан Абрамр'а гот: «Ньһа сәре хwә бьльнд кә у жь ви щийе кӧ тӧ ле сәкьнийи, ль бакӧр, башуре у ль р'оһьлат, р'оавайе бьньһер'ә,
[15] чьмки wи wәлате кӧ тӧ дьбини, әзе һ'әта-һ'әтайе бьдьмә тә у зӧр'әта тә.
[16] Әзе зӧр'әта тә бькьмә wәкә т'оза ә'рде. Һәгәр йәк бькарьбә кӧ т'оза ә'рде бьжмьрә, wе зӧр'әта тә жи бькарьбә бьжмьрә.
[17] Р'абә ль сәр у бьне wи wәлати ль һәв дә. Чьмки әзе wи бьдьмә тә».
[18] Һьнге Абрам коне хwә һьлда чу Һеброне, нава мә'зед Мамреда щи-wар бу у ль wьр Хӧданр'а горигәһәк чекьр.