[1] Һена Амрафәл п'адше Шинаре, Арйок' п'адше Әласаре, К'ьдорлаһомәр п'адше Әламе у Т'идә'л п'адше Гоиме,
[2] чунә ль бәр пенщ п'адша, Бәра п'адше Содоме, Бирша п'адше Гоморайе, Шинав п'адше Адмайе, Шәмевәр п'адше Сьбойиме у п'адше Бәлайе, аwа готи Соһарер'а кьрьнә шәр'.
[3] Әв һәр пенщ п'адша ль дәшта Сиддимеда щьвийан, wи щийе ньһа Бә'ра Мьри ле йә.
[4] Әвана донздәһ сала бьндәсте К'ьдорлаһомәрда бун, ле сала сездәһада сәри һьлдан.
[5] Сала чардәһада К'ьдорлаһомәр у һ'әму п'адшайед кӧ т'әви wи һатьн Ә'штәрот'-Qарнайимеда ль р'ьфайийа, Хамеда ль зузийа, Шаве-Qирйатайимеда ль емийа хьстьн,
[6] у ль сәре ч'ийайе wан Сеһире ль һ'орийа хьстьн, һ'әта Ел-Парана дәве бәр'ийе хьстьн.
[7] Паше әвана вәгәр'ийан һатьнә Ә'йн-Мишпате, аwа готи Qадеше, ль т'әмамийа qәза амалекийа хьстьн, ӧса жи ль әморийед Һ'ассон-Т'амареда дьман хьстьн.
[8] Һьнге п'адше Содоме, п'адше Гоморайе, п'адше Адмайе, п'адше Сьбойиме у п'адше Бәлайе, аwа готи Соһаре ль дәшта Сиддимеда жь ван һәр чар п'адшар'а дәрк'әтьнә шер',
[9] аwа готи К'ьдорлаһомәре п'адше Әламер'а, Т'идә'л п'адше Гоимер'а, Амрафәле п'адше Шинарер'а у Арйок'е п'адше Әласарер'а, чар п'адшати мьqабьли пенща.
[10] Дәшта Сиддиме бь ч'ә'лед qирева т'ьжи бун. Һьнге гава р'әв к'әтә п'адшед Содоме у Гоморайе әw к'әтьнә wан ч'ә'ла, ле йед майин р'әвинә ч'ийа.
[11] Ван һәр чар п'адша һ'әму һәбук у хӧрәке Содом у Гоморайе т'алан кьрьн бьрьн.
[12] Ӧса жи Луте бьразийе Бьраһим, кӧ Содомеда дьма, һәбукева һьлдан бьрьн.
[13] Һьнге йәки р'әвийи хьлазбуйи һат у әв щаw да Бьраһиме ибрани. Бьраһим нава мә'зед Мамрейе әморида дьма (Мамрейе бьрайе Әшк'ол у Ә'нер). Һәләqәтийа ван у Бьраһим һәвр'а һәбу.
[14] Гава Бьраһим бьһист кӧ бьразийе wи дил һатьйә бьрьне, р'абу сесьд һ'иждәһ хӧламед хwәйә һинкьри, кӧ мала wида ль һәв зедә бьбун, ч'әк кьрьн у һ'әта Дане п'е-п'е пәй wан к'әтьн,
[15] әw у хӧламед хwәва к'ом-к'ом бәла бун, шәв һ'ьщуми ль сәр wан кьрьн, ль wан хьстьн у һ'әта Һ'обайе ль бак'ура Шаме әw р'аqәтандьн
[16] у һ'әму т'алане бьри, бьразийе хwә Лут, һәбука wива т'әви жьн у щьмә'те, пашда анин.
[17] Гава Абрам ль К'ьдорлаһомәр у п'адшед пер'а хьстьн у вәгәр'ийа, п'адше Содоме ль дәшта Шаве, аwа готи Дәшта П'адшеда, пешийа wида чу.
[18] Һьнге п'адше Шәлиме Мәлк'и-Садьq, нан у шәраб дьреж кьре, әw к'аһине Хwәдейе Жорьн бу.
[19] Әwи дӧа ль Абрам кьр у гот: «Бьра бьмбарәк бә Абрам жь алийе Хwәдейе Жорьн, хwәйе ә'рд у ә'зменда,
[20] у шькьр жь Хwәдейе Жорьнр'а, кӧ дьжмьнед тә данә дәсте тә». У Абрам жь һәр тьшти дәһәк да Мәлк'и-Садьq.
[21] П'адше Содоме готә Абрам: «Мәрьва бьдә мьн, ле т'алане пашда ани жь хwәр'а бьбә».
[22] Абрам готә п'адше Содоме: «Әз дәсте хwә бәр бь Хӧдан Хwәдейе Жорьн, хwәйе ә'рд у ә'змен бьльнд дькьм,
[23] кӧ әз жь мале тә, жь т'ел һ'әта бәне чарьхәке жи дәст навежьме һьлнадьм, кӧ паше тӧ нәбежи: ‹Мьн Абрам дәwләмәнд кьр›
[24] пештьри жь хwарьна щаһьла у п'ара wан мәрьвед кӧ т'әви мьн һатьбун, аwа готи п'ара Ә'нер, Әшк'ол у Мамре, бьра әw п'ара хwә же һьлдьн».