<Дәстпебун 2

[1] Ә'рд у ә'зман т'әмамийа нәхшед хwәва ль сәр һәвда һатьн.

[2] У Хwәде бәри р'ожа һ'әфта шьхӧлед хwә хьлаз кьрьн у р'ожа һ'әфта жь wан һ'әму шьхӧлед хwәйә кьри р'ьһ'әт бу.

[3] У Хwәде дӧа р'ожа һ'әфта кьр у әw пироз кьр, чьмки wе р'ожеда Хwәде жь wан һ'әму кьрьнед хwә, к'ижан кӧ ә'фьрандьбун у кьрьбун р'ьһ'әт бу.

[4] Әвә сәрһатийа пешда һатьна ә'рд у ә'змен гава һатьнә ә'фьрандьне. Wе р'оже гава кӧ Хӧдан Хwәде ә'рд у ә'зман чекьрьн,

[5] т'ӧ к'оләкә чоле һе т'ӧнәбуйә, т'ӧ гиһаки чоле һе шин нәбуйә, чьмки Хӧдан Хwәде һәла һе баран ль сәр ә'рдеда нәбарандьбуйә у мәри жи т'ӧнәбуйә кӧ ә'рде бещәр кә,

[6] һьнге һӧлм-гӧлм жь ә'рде дәрк'әтийә т'әмамийа р'уйе ә'рде шьл кьрийә.

[7] Хӧдан Хwәде жь аха ә'рде qальбе мер чекьр, бина жийине һӧлми поза кьр у мер бу бинбәрәки сах.

[8] Хӧдан Хwәде ль алийе р'оһьлате Еденеда бахчәк дач'ьканд у мере кӧ чекьрьбу дани ль wьр.

[9] Хӧдан Хwәде жь ә'рде һәр дар шин кьрьн, дитьнер'а һ'әwаск'ар у хwарьнер'а хwәш, нава бахчәда жи дара жийине, ӧса жи дара qәнщи у хьраби наскьрьне.

[10] У бона авдана бахчә, жь Едене ч'әмәк дәрдьк'әт у паше бәлайи чар ч'ә'ва дьбә.

[11] Наве ч'әме ә'wльн Пишон ә, әва т'әмамийа ә'рде Һ'аwилайева дьк'ьшә, wьр кӧ зер'е wе һәйә.

[12] Зер'е wи ә'рди жи сафи йә, бьдолах у кәвьред qимәтә оникс һәнә.

[13] Наве ч'әме дӧда Гиһ'он ә, әва т'әмамийа ә'рде К'ушева дьк'ьшә.

[14] Наве ч'әме сьсийа Дищлә йә, әва р'оһьлата Ашурйайева дьк'ьшә у наве ч'әме чара жи Фьрат ә.

[15] Хӧдан Хwәде әw мер һьлда дани бахче Едене, wәки wе бещәр кә у хwәйитийе ле бькә.

[16] У Хӧдан Хwәде т'әми да мер у готе: «Жь һәр даред бахчәда, дьле тә дьк'ьшинә к'ижане бьхwә,

[17] ле жь дара qәнщи у хьраби наскьрьне нәхwә, чьмки wе р'ожа гава тӧ жь wе бьхwи, те ә'сә бьмьри».

[18] Хӧдан Хwәде гот: «Нә баш ә кӧ мер т'әне бьминә, к'омәкдарәк кӧ лайиqи wи бә чекьм».

[19] Һьнге Хӧдан Хwәде һ'әму тәрәwьлед чоле у һ'әму тәйрәдед ә'змен жь ахе чекьрьн у анинә щәм мер, wәки бьбинә к'а әwе чь нави ль wан кә у мер чь нав дани ль сәр һ'әйwане бинбәр, әw жи бу наве wан.

[20] Мер нав ль һ'әму һ'әйwанед к'әди, тәйрәдед ә'змен у тәрәwьлед чоле кьрьн, ле мерр'а к'омәкдарәк кӧ лайиqи wи буйа дәст нәк'әт.

[21] Һьнге Хӧдан Хwәде хәwәкә к'ур кьрә ч'ә'ве мер, гава әw хәwр'а чу, Хӧдан п'арханәкә wи һьлда у дәwсе гошт т'ьжи кьр.

[22] У Хӧдан Хwәде жь wе п'архана кӧ жь мер һьлдабу к'ӧлфәтәк чекьр, ани щәм мер.

[23] Һьнге мер гот: «Ньһа әва һәстуйе жь һәстуйе мьн ә у гоште жь гоште мьн ә, әвайе жьн бе готьне, чьмки жь мер һатә һьлдане».

[24] Ләма мере де у баве хwә бьһелә, хwә ль жьна хwә бьгьрә у бьбьнә бәдәнәк.

[25] Мер у жьна хwәва һәр дӧ жи тә'зи бун у шәрм нәдькьрьн.