<Дәстпебун 3

[1] Жь нава wан һ'әму тәрәwьлед чолейә кӧ Хӧдан Хwәде ә'фьрандьбун, йе һәри һ'ьләк'ар мә'р бу. Әwи готә жьне: «Р'асти Хwәде готийә wәки жь һ'әму даред бахчә гәрәке нәхwьн?»

[2] К'ӧлфәте готә мә'р: «Жь бәред даред бахчә әм дькарьн бьхwьн.

[3] Ле жь бәре wе дара кӧ нава бахчәда йә, Хwәде гот нәхwьн у дәст нәдьне, wәки һун нәмьрьн».

[4] Мә'р готә к'ӧлфәте: «На, һун т'ӧ щар намьрьн,

[5] ле Хwәде занә, wе р'ожа гава һун жь wе бьхwьн, ч'ә'вед wәйе вәбьн у бьбьнә мина Хwәде, qәнщи у хьрабийе жь һәв дәрхьн».

[6] У к'ӧлфәте дина хwә дайе wәки бәре даре баш бу бона хwарьне, бәрбьч'ә'вә һ'әwаск'ар у дьлһавьжи бу бона занәбуне, дәст авитә бәре wе хwар у да мере т'әви хwә, әwи жи хwар.

[7] Һьнге ч'ә'вед wан вәбун, хwә дәрхьстьн кӧ әwә тә'зи нә, бәлгед һежире дьрутьн у пе хwә сьт'ар кьрьн.

[8] Һенькайа р'ожеда, гава wан дәнге Хӧдан Хwәде бахчәда кӧ дьгәр'ийа бьһистьн, мер у жьнева хwә жь бәр ч'ә'ве Хӧдан Хwәде, нава даред бахчәда вәшартьн.

[9] Хӧдан Хwәде дәнг да мер у гот: «Тӧ к'ӧ йи?»

[10] Әwи гот: «Мьн дәнге тә бахчәда бьһист тьрсийам у хwә вәшарт, чьмки әз тә'зи бум».

[11] Һьнге Хwәде готе: «К'е дәрһәqа тә'зибуна тәда тәр'а гот? Гәло тә жь wе даре хwар, йа кӧ мьн т'әми дабу тә кӧ нәхwи?»

[12] Мер гот: «Әw жьна кӧ тә да мьн, әwе жь wе даре да мьн, мьн жи хwар».

[13] Хӧдан Хwәде готә к'ӧлфәте: «Тә чьма әв йәк кьрийә?» К'ӧлфәте гот: «Мә'р әз хапандьм у мьн хwар».

[14] Һьнге Хӧдан Хwәде готә мә'р: «Бона ве кьрьна кӧ тә кьр, жь нава һ'әму һ'әйwанед к'әди у һ'әму тәрәwьлед чоле ньфьр' ль сәр тә бә, ль сәр зьке хwә бьк'ьши у т'әмамийа ә'мьре хwәда хӧре тә ах-хwәли бә.

[15] Әзе нава тә у к'ӧлфәте, нава зӧр'әта тә у зӧр'әта wеда дьжмьнатийе дайньм, әwе сәре тә бьһ'ьнщьр'инә у те жи пә'нийа wе бьгәзи».

[16] К'ӧлфәтер'а жи гот: «Әзе еша һ'әмләбуна тә гәләки ль тә зедә кьм, бь еше зар'а бини, ч'ә'ве тә ль дәсте мере тә бә у әw жи һ'ӧкӧме ль сәр тә бькә».

[17] Паше Хwәде готә мер: «Тә кӧ гӧр'а жьна хwә кьр, жь wе дара кӧ мьн т'әми дабу, кӧ тә нәхwи, хwар, р'уйе тәда ньфьр' ль ә'рде бьqәбьлә, т'әмамийа р'ожед ә'мьре хwәда бь тә'ли-тәнгийе нане хwә бьхwи».

[18] Ә'рд жи тәр'а стьрийа у дьр'ийа бьгьһинә у п'ьнщар'а чоле бьхwи,

[19] бь худана ә'нийа хwә нане хwә бьхwи, һ'әта кӧ тӧ вәгәр'и ль wи ә'рди жь к'ӧ һати һьлдане, чьмки тӧ ах и у те диса бьби ах.

[20] Мер, аwа готи Адәм , наве жьна хwә дани Һеwа , чьмки әwа бу дийа һ'әму бинбәри.

[21] У Хӧдан Хwәде Адәм у жьнер'а к'ьнщед ч'әрмин чекьрьн у ль wан кьрьн.

[22] Һьнге Хӧдан Хwәде гот: «Ва йә, мәрьв бу мина жь мә йәки, qәнщи у хьрабийе жь һәв дәрдьхә. Ле ньһа нәбә кӧ әw дәсте хwә дьрежи дара жийине кә жи у һ'әта-һ'әтайе бьжи».

[23] Пәй ве йәкер'а Хӧдан Хwәде әw жь бахче Едене дәрхьст, wәки wи ә'рди бещәр кә, жь к'ижани кӧ һатьбу һьлдане.

[24] Бәри мәрьв да дәрхьст у жь алийе р'оһьлата бахче Еденева, херуб у шуре агьрийи кӧ һәр алийава дьвьр'вьр'и данин, wәки р'ийа дара жийине хwәй кьн.