[1] У ӧса qәwьми, кӧ пәй ван йәкар'а, шәравдар у нанпеже п'адше Мьсьре, һьндава хwәйе хwә, п'адше Мьсьреда нәһәqи кьрьн.
[2] Һерса Фьрәwьн ль сәр дӧ wәзиред wи, аwа готи ль сәрwере шәравдар у сәрwере нанпеже wи р'абу
[3] у әw авитьнә гьртихана кәла мала сәрwере нобәдара, wи щийе кӧ Усьв теда гьрти бу.
[4] Сәрwере нобәдара Усьв кьрә wәк'иле wан у әwи хьзмәтк'арийа wан дькьр. У әвана һьнәк wәхт гьртиханеда ман.
[5] У шәвәкеда ван һәр дӧйа, шәравдар у нанпеже п'адше Мьсьре, йед кӧ кәледа гьрти бун, һәр йәки льгора фә'мина хәwна, хәwне хwә дитьн.
[6] Сьбәһе зу Усьв һатә щәм wан, дина хwә дайе кӧ әwә ва мә'дәкьри нә.
[7] У әwи жь wан wәзиред Фьрәwьн, йед кӧ мала хwәйе wида т'әви wи гьртиханеда бун пьрси: «Һун чьма иро мьр'уз кьри нә?»
[8] Wана готә wи: «Мә хәwн дитьнә у кәсәк т'ӧнә кӧ шьровәкә». Усьв wанр'а гот: «Шьровәкьрьн жь Хwәде йә! К'әрәм кьн, мьнр'а бежьн».
[9] Сәрwере шәравдара хәwна хwә Усьвр'а гьли кьр у гот: «Хәwна мьнда ва йә к'оләкә тьрийе бәр мьн бу,
[10] ль сәр wе к'оле се ч'ьqьл һәбун, әwе гӧпьк да, гӧлед wе вәбун у гушийед тьрийа гьһиштьн.
[11] К'аса Фьрәwьн жи дәсте мьнда бу, мьн тьри һьлдан, к'аса Фьрәwьнда гӧһаштьн у к'ас да дәсте Фьрәwьн».
[12] Усьв готә wи: «Шьровәкьрьна wе әв ә: се ч'ьqьл, әw се р'ож ьн.
[13] Се р'ожа шунда Фьрәwьне тә бьльнд кә у диса wе тә дайнә ль сәр qӧльха тә у чаwа тӧ щәм wи шәравдар буйи, те диса мина ә'дәте бәре, к'аса Фьрәwьн бьди дәсте wи.
[14] Ле гава дәргәһәки хере ль сәр тә вәбә, мьн бини бира хwә, qәнщике жи мьнр'а бьки у ль бәр Фьрәwьн мьн бир бини, мьн жь ве мале дәрхи.
[15] Чьмки р'аст әз жь wәлате ибранийа һатьмә дьзине, ӧса жи вьра мьн тьштәки ӧса нәкьрьбу, кӧ бьк'әтама ве зьндане».
[16] Сәрwере нанпежа дит, кӧ шьровәкьрьна wи ль wи хwәш һат, готә Усьв: «Хәwна мьнда ва нә се сәлә нане сьпи ль сәр сәре мьн бун,
[17] сәла лапә жорьнда һәр щур'ә хwарьнед Фьрәwьн һәбун, йед кӧ нанпеж чедькә у тәйрәда жь сәла ль сәр сәре мьн нькӧл дькьрьн дьхwарьн».
[18] Усьв ле вәгәр'анд у готе: «Шьровәкьрьна wе әв ә: се сәлә, әw се р'ож ьн.
[19] Се р'ожа шунда Фьрәwьне тә бьльнд кә у тә дар хә, тәйрәдәйе жи тә нькӧл кьн гоште тә бьхwьн».
[20] Р'ожа сьсийа, кӧ р'ожа буйина Фьрәwьн бу, әwи мәсрәфәк бона һ'әму хӧламед хwә дани у жь нава хӧламед хwә, сәрwере шәравдара у сәрwере нанпежа бьльнд кьрьн .
[21] Сәрwере шәравдара дани ль сәр qӧльха wи у әwи к'ас да дәсте Фьрәwьн,
[22] ле сәрwере нанпежа дар хьст, чаwа Усьв шьровәкьрьбу.
[23] Иди Усьв нә к'әтә бира сәрwере шәравдара у әwи әw бир кьр.