[1] Пәй ван йәкар'а, Хwәде Бьраһим щер'ьбанд у гот: «Бьраһимо!» Бьраһим гот: «Ләбе, әзи ва мә».
[2] Хwәде готе: «Ньһа р'абә кӧр'е хwәйи тайе т'әнейи дәлал Исһаq һьлдә у һәр'ә wәлате Морийайе, ль wе дәре ль сәре ч'ийаки, к'ижани әзе тәр'а бежьм, бькә дийарийа т'әвайишәwате».
[3] Бьраһим сьбәһе зу р'абу, бона дийарийа т'әвайишәwате дар шкенандьн, т'ер'а к'әре хwә гьреда, т'әви хwә дӧ хӧлам у кӧр'е хwә Исһаq һьлдан, р'абу чу wи щийе кӧ Хwәде готьбуйе.
[4] Р'ожа сьсийа Бьраһим сәре хwә бьльнд кьр, дурва әw щи дит.
[5] У һьнге Бьраһим готә хӧламед хwә: «Һун к'әрева ль вьр бьминьн, әз у кӧр'ьква һ'әта дәра һан һәр'ьн, һ'әбандьна хwә бькьн у диса ль сәр wәда вәгәр'ьн».
[6] Бьраһим qьрше дийарийа т'әвайишәwате һьлда, да пьшта кӧр'е хwә Исһаq у хwәха жи агьр у к'ер гьртьнә дәсте хwә у һәр дӧ һәвр'а чун.
[7] Р'еда Исһаq баве хwә Бьраһимр'а гот: «Баво!» Әwи гот: «Ләбе, әзи ва мә, кӧр'е мьн». Исһаq гот: «Ва нә qьрш у агьр, ле бәрха бона дийарийа т'әвайишәwате к'ане йә?»
[8] Һьнге Бьраһим готе: «Хwәде wе хwәха бәрха дийарийа т'әвайишәwате бона хwә р'е тер'а бьбинә, кӧр'е мьн» У һәр дӧ һәвр'а р'ийа хwәда чун.
[9] Гава гьһиштьнә wи щийе кӧ Хwәде готьбуйе, Бьраһим ль wьр горигәһ чекьр, qьрш ль сәр wе щи кьрьн у кӧр'е хwә Исһаq гьреда, һьлда дани ль сәр qьршед горигәһе.
[10] У Бьраһим дәст авитә к'ере, кӧ кӧр'е хwә сәржекә
[11] ле мьлйак'әте Хӧдан жь ә'змен дәнг дайе у готе: «Бьраһим! Бьраһим!» Әwи гот: «Ләбе, әзи ва мә».
[12] Мьлйак'әт готе: «Дәст нәдә кӧр'ьк у тьштәки ль wи нәкә, ньһа әз заньм кӧ тӧ жь Хwәде дьтьрси, чьмки тә бона мьн кӧр'е хwәйи тайе т'әне на-на нәкьр».
[13] Бьраһим сәре хwә бьльнд кьр, дина хwә дайе wе пьшт wива, ва йә бәранәк стьруйед wи к'әтьбунә дьр'ийед сьх мабу. Бьраһим чу әw бәран ани у дәwса кӧр'е хwә горишәwьтанди кьр.
[14] Бьраһим наве wи щийи дани: «Хӧдане wе р'е тер'а бьбинә». Чаwа һ'әта ньһа те готьне: Ль сәре ч'ийайе Хӧдан, wе р'е тер'а бе дитьне.
[15] Мьлйак'әте Хӧдан щара дӧда жь ә'змен дәнг да Бьраһим
[16] у гот: «Әз бь нәфса хwә сонд дьхwьм, Хӧдан дьбежә, чьмки тә кӧ әв тьшт кьр у кӧр'е хwәйи тайе т'әне бона мьн на-на нәкьр,
[17] әзе жи дӧайе ль сәр дӧа ль тә бькьм, зӧр'әта тә мина стәйркед ә'змен у мина qума дәве бә'ре гәләки зедә кьм у зӧр'әта тәйе бажаред нәйаред хwә зәфти хwә кьн
[18] у бь зӧр'әта тә wе дӧа ль һ'әму мьләтед дьнйайе бьбә, чьмки тә гӧһдарийа мьн кьр».
[19] У Бьраһим вәгәр'ийа щәм хӧламед хwә у р'абун һәвр'а чунә Бир-Шевайе, Бьраһим Бир-Шевайеда ма.
[20] Пәй ван йәкар'а щаб данә Бьраһим у готьне: «Милк'айе бьре тә Нәһорр'а зар' анинә,
[21] Ньхӧрийе wи Ус у бьре wи Буз, Qьмуеле бавә'шире Арам,
[22] К'әсәд, Һ'азо, Пилдаш, Идлаф у Бәт'уел».
[23] Бәт'уелр'а Р'евека бу. Әв һәр һ'әйшт кӧр' Милк'айе Нәһоре бьре Бьраһимр'а анин.
[24] Щарийа wи Р'еумайе жи, Тәваһ', Гахам, Т'ахаш у Маһаха анин.