[1] Гава Исһаq кал бу у р'онайа ч'ә'вада мә'рьм бу, әwи гази кӧр'е хwәйи мәзьн Әсаw кьр у готе: «Лаwо!» Әwи гот: «Әз ва мә, баво!»
[2] Исһаq готе: «Әзи ва кал бумә, ньзаньм к'ижан р'оже әзе бьмьрьм.
[3] Ньһа ч'әке хwә, тир у кәване хwә һьлдә дәре чоле, неч'ирәке бона мьн бькә у
[4] хwарьна хwәшә кӧ әз же һ'ьз дькьм, бона мьн чекә бинә әз бьхwьм, кӧ бәри мьрьна хwә әз дӧа ль тә бькьм».
[5] Р'евекайе дьбьһист, гава Исһаq әв йәк кӧр'е хwә Әсаwр'а дьгот. Гава Әсаw чу чоле неч'ире бькә бинә,
[6] Р'евекайе готә кӧр'е хwә Аqуб: «Мьн һежа бьһист, кӧ баве тә чаwа т'әви бьре тә Әсаw хәбәрда у гот:
[7] ‹Неч'ирәке мьнр'а бинә, пе хwарьнәкә хwәш чекә, кӧ әз бьхwьм у бәри мьрьна хwә, ль бәр Хӧдан дӧа ль тә бькьм›,
[8] Ньһа бьбьһе лаwо, гӧһе хwә бьдә сәр мьн, әз чь тәр'а дьбежьм бькә.
[9] Р'абә һәр'ә нава кери, мьнр'а дӧ каред бьзьнайә р'ьнд бинә у әз пе wан баве тәр'а wе хwарьна хwәшә кӧ әw же һ'ьз дькә чекьм,
[10] тӧ жи бьбә бьдә баве хwә, кӧ әw бьхwә у бәри мьрьна хwә дӧа ль тә бькә».
[11] Аqуб готә дийа хwә Р'евекайе: «Әсаwе бьре мьн йәки пьр'ч' ә, әзи р'ути нәпьр'ч' ьм,
[12] бәлки баве мьн бь дәста мьн бьп'әлинә, әз бәр ч'ә'ве wи дәрәw дәрем, һьнге әзе ль сәр хwәда ньфьр'е биньм нә кӧ дӧайе».
[13] Де готе: «Лаwо! Әw ньфьр'а бьра ль сәр мьнда бе, т'әне тӧ гӧр'а мьн бькә, һәр'ә кара бинә».
[14] Аqуб чу кар анин данә дийа хwә. Де пе wан әw хwарьна хwәшә кӧ баве wи же һ'ьз дькьр чекьр.
[15] Р'евекайе к'ьнща Әсаwе р'ьнд, йа кӧр'е хwәйи мәзьн, кӧ малда ль щәм wе бу, һьлда ль кӧр'е хwәйи бьч'ук Аqуб кьр,
[16] у п'осте кара жи авитә ль сәр дәста у стӧкӧра wийә р'утә нәпьр'ч',
[17] хwарьна хwәшә чекьри, нане кӧ лехьстьбу да дәсте кӧр'е хwә Аqуб.
[18] Аqуб чу щәм баве хwә у гот: «Баво!». Әwи гот: «Әз ва мә, тӧ к'и йи лаwо?»
[19] Аqуб готә баве хwә: «Әз ньхӧрийе тә Әсаw ьм, тә чаwа мьнр'а гот, мьн ӧса жи кьр, к'әрәм кә, р'абә р'уни неч'ира мьн бьхwә у дӧа ль мьн бькә».
[20] Исһаq готә кӧр'е хwә: «Тә чаwа ӧса зу неч'ир дит, лаwо?» Аqуб готе: «Хӧдан, Хwәдейе тә неч'ир р'асти мьн ани».
[21] Исһаq готә Аqуб: «Незик wәрә, әз бь дәста тә бьп'әлиньм, лаwо, һәла к'а тӧ кӧр'е мьн Әсаw и, йан на?»
[22] Аqуб незики баве хwә бу, баве бь дәста әw п'әланд у готе: «Дәнг дәнге Аqуб ә, ле дәст дәстед Әсаw ьн».
[23] Әwи те дәрнәхьст к'ижан ә, чьмки дәстед wи жи мина дәстед бьре wи Әсаw пьр'ч' бун, һьнге дӧа ль wи кьр
[24] у готе: «Тӧ р'аст кӧр'е мьн Әсаw и?» әwи гот: «Әз ьм».
[25] Баве готе: «К'а бьдә неч'ира кӧр'е хwә әз бьхwьм, wәки дӧа ль тә бькьм». Аqуб дайе, әwи хwар, шәраб жи ани дайе әwи вәхwар.
[26] Баве wи Исһаq готе: «Ньһа wәрә незик у мьн р'амусә, лаwо».
[27] Аqуб чу незик, бав р'амуса. Исһаq к'ьнще wи бин кьр, дӧа ль wи кьр у гот: «Ва йә бина кӧр'е мьн, мина бина мерга Хӧдан дӧа ле кьри йә.
[28] Бьра Хwәде жь qьр'авийа ә'змен, у жь qьнйата ә'рде, гәньм у шәрабеда тә хьне кә.
[29] Бьра мьләт тәр'а хӧламтийе бькьн, щьмә'т жи ль бәр тә дәвәр'уйа һәр'ьн. Тӧ бьби ахе бьратийа хwә, зар'ед дийа тә жи ль бәр тә дәвәр'уйа һәр'ьн. Йе ньфьр'а ль тә бькә, ньфьр' ль wи бә, йе дӧа ль тә бькә, дӧа ль wи бә».
[30] Гава Исһаq дӧа Аqуб кьр хьлаз кьр у әw гавәк бу кӧ әw жь баве хwә Исһаq дур к'әтьбу, бьре wи Әсаw жь неч'ире һат.
[31] Әwи жи хwарьна хwәш чекьр, ани да баве хwә у гот: «Дә бьра баве мьн р'абә у жь неч'ира кӧр'е хwә бьхwә, wәки дӧа ль мьн бькә».
[32] Баве wи Исһаq готә wи: «Тӧ к'и йи?» Әwи гот: «Әз кӧр'е тә, ньхӧрийе тә, Әсаw ьм».
[33] Исһаq бь хофәкә мәзьн ль сәр һәвда ләрьзи у гот: «Әwе кӧ неч'ир кьр у ани да мьн әw к'и бу? Мьн бәри һатьна тә, жь wан һ'әмуйа хwар у дӧа ль wи кьр. Әwе жи дӧакьри бә».
[34] Гава Әсаw әв готьнед баве хwә бьһистьн, кур'ин к'әте, к'әсәр-к'әсәр гьрийа у готә баве хwә: «Мьн жи баво! Дӧа ль мьн жи бькә!»
[35] Баве готе: «Бьре тә һат бь һ'ьләк'арийе дӧайе п'ара тә һьлданә ль сәр хwә».
[36] Әсаw гот: «Ләма наве wи данәнинә Аqуб! Әва дӧ щарә әw ньг дьдә бәр мьн һәqе ньхӧртийа мьн жь мьн станд у ньһа жи дӧайе п'ара мьн жь мьн станд». У дьгот: «Тә qәт бона мьн дӧа нәһьштийә?»
[37] Һьнге Исһаq ль Әсаw вәгәр'анд у готе: «Ва йә мьн әw кьрә ахайе тә, у һ'әму бьратийа wи жи wир'а кьрьнә хӧлам, гәньм у шәрабева жи әw хьне кьрьн. Иди ньһа әз тә чаwа бькьм лаwо».
[38] Әсаw готә баве хwә: «Баво! Гәло һәма дӧаки тә т'әне һәбу? Мьн жи баво! Дӧа ль мьн жи бькә!» Әсаw кур'ә-кур' дани гьрийа.
[39] Һьнге Исһаqе баве wи ль wи вәгәр'анд у готе: «Аwа те идара хwә жь qьнйата ә'рде у qьр'авийа ә'змен бьки.
[40] Идара тә бь шуре тә бә, хӧламтийе бьре хwәр'а бьки, у wәхт жи кӧ бе, гава тӧ жь ве йәкеда сәри һьлди, нире wи жь стуйе хwә бавежи».
[41] У бона ви дӧайе кӧ баве дӧа бьре wи кьрьбу, Аqуб жь бәр ч'ә'ве Әсаw к'әтьбу у дьле хwәда дьгот: «Р'ожед шина баве мьн незик бунә, әзе пәйр'а бьре хwә Аqуб бькӧжьм».
[42] Әв готьнед Әсаwә кӧр'е Р'евекайейи мәзьн, гиһандьнә wе. Әве жи шанд гази кӧр'е хwәйи бьч'ук Аqуб кьр у готе: «Ва йә Әсаwе бьре тә, гәф ль тә хwарийә, wәки тә бькӧжә.
[43] Ньһа бьбьһе лаwо әз чь тәр'а дьбежьм, р'абә бьр'әвә һәр'ә Һ'аране, бьгьһижә бьре мьн Лабан,
[44] wә'дәки ль щәм wи бьминә, һ'әта һерса бьре тә датинә.
[45] Гава һерса бьре тә дайнә у әw кьрьна кӧ тә ль сәре wи кьрийә бир бькә, паше әзе һьнге бьшиньмә пәй тә, тә жь wьр биньм, чьма нава р'ожәкеда әз wә һәр дӧйа ӧнда кьм?»
[46] Паше Р'евекайе готә Исһаq: «Р'уйе ван qизед һ'итиада, әз жь ә'мьре хwә т'ер бумә, һәгәр Аqуб жи qизед һ'итийайә мина ванә ви wәлати бьстинә, иди әз чьма дьжим?»