[1] Зьмане т'әмамийа дьнйайе йәк бу у хәбәрдан жи йәк бу.
[2] Гава кӧ к'оч' дькьрьн жь р'оһьлате дьчун, ә'рде Шинареда дәштәк дитьн у ль wьр щи-wар бун.
[3] Паше һәвдӧр'а готьн: «Wәрьн, әм к'әлпич'а чекьн у әм wан агьрда бьqәлиньн». У бона wан к'әлпич' дәwса кәвьра бун у qир жи дәwса һ'әр'ийе бу.
[4] Һьнге готьн: «Wәрьн әм бона хwә бажарәки у бьльндщике чекьн, кӧ сәри бьгьһижә ә'змен у әм хwәр'а навәки qазьнщ кьн, кӧ нәбә әм ль сәр т'әмамийа т'опа дьне бәла бьн».
[5] У Хӧдан пәйа бу, кӧ дина хwә бьдә wи бажари у бьльндщийе, к'ижан кӧ зар'ед мәрьвайе чедькьрьн.
[6] Һьнге Хӧдан гот: «Ва йә, әвана мьләтәк ьн у зьмане һ'әмуйа жи йәк ә. Әвана дәстпекьрьнә чедькьн у бона ван нәчәтьн ә чь кӧ шеwьринә бькьн.
[7] Wәрьн әм пәйа бьн у зьмане wан ль wьр т'әвиһәв кьн, кӧ йәк зьмане йәки фә'м нәкә».
[8] У Хӧдан әw жь wьр ль сәр т'әмамийа т'опа дьне бәла кьрьн. Wана дәст жь бажер чекьрьне к'ьшандьн.
[9] Ләма жи wи щийир'а готьн «Бабилон » чьмки ль wьр Хӧдан зьмане т'әмамийа т'опа дьне т'әвиһәв кьр. У Хӧдан әw жь wьр ль сәр т'әмамийа т'опа дьне бәла кьрьн.
[10] Әв ә сәрәщәма р'ьк'ьнйата Сам. Дӧ сала пәй тофанер'а, Сам сәдсали бу, кӧ Арпәхшад жер'а бу.
[11] Сам пәй буйина Арпәхшадр'а, пенсьд сали жи ә'мьр кьр у гәләк кӧр' у qиз жер'а бун.
[12] Арпәхшад бу си пенщ сали Шәлаһ жер'а бу.
[13] Арпәхшад пәй буйина Шәлаһр'а, чарсьд се сали жи ә'мьр кьр у гәләк кӧр' у qиз жер'а бун.
[14] Шәлаһ бу си сали, Әбәр жер'а бу.
[15] Шәлаһ пәй буйина Әбәрр'а, чарсьд се сали жи ә'мьр кьр у гәләк кӧр' у qиз жер'а бун.
[16] Әбәр бу си у чар сали, Пелег жер'а бу.
[17] Әбәр Пәй буйина Пелегр'а, чарсьд си сали жи ә'мьр кьр у гәләк кӧр' у qиз жер'а бун.
[18] Пелег бу си сали, Р'еwо жер'а бу.
[19] Пелег пәй буйина Р'еwор'а, дӧсьд нәһә сали жи ә'мьр кьр у гәләк кӧр' у qиз жер'а бун.
[20] Р'еwо бу си у дӧ сали, Сәрух жер'а бу.
[21] Р'еwо пәй буйина Сәрухр'а, дӧсьд һ'әфте сали жи ә'мьр кьр у гәләк кӧр' у qиз жер'а бун.
[22] Сәрух бу си сали, Нәһор жер'а бу.
[23] Сәрух пәй буйина Нәһорр'а, дӧсьд сали жи ә'мьр кьр у гәләк кӧр' у qиз жер'а бун.
[24] Нәһор бу бист нәһә сали, Тераһ жер'а бу.
[25] Нәһор пәй буйина Тераһр'а, сәд ноздәһ сали жи ә'мьр кьр у гәләк кӧр' у qиз жер'а бун.
[26] Тераһ бу һ'әфте сали, Абрам, Нәһор у Һаран жер'а бун.
[27] Әв ә сәрәщәма р'ьк'ьнйата Тераһ. Тераһр'а Абрам, Нәһор у Һаран бун. Һаранр'а жи Лут бу.
[28] Һаран ль wәлате кӧ жь дийа хwә бьбу, бажаре Ура к'ьлданийада, бәри баве хwә Тераһ мьр.
[29] Абрам у Нәһор зәwьщин жьн стандьн. Наве жьна Абрам Сарайи бу у наве жьна Нәһор Милк'а бу. Милка у Иск'а qизед Һаран бун.
[30] Сарайи бебәр бу у зар' нәданин.
[31] Тераһ кӧр'е хwә Абрам, нәвийе хwә Луте кӧр'е Һаран у бука хwә Сарайийа жьна кӧр'е хwә Абрам һьлдан, р'абун жь бажаре Ура к'ьлданийа чунә бәрбь wәлате кәнанийа, әw гьһиштьнә Һ'аране у ль wьр щи-wар бун.
[32] Тераһ дӧсьд пенщ сали ә'мьр кьр у Тераһ Һ'аранеда мьр.