[1] Дина, qиза Леайе бу, кӧ Аqубр'а ани бу, әw дәрк'әт кӧ qизед wи wәлати бьбинә.
[2] Шьхәме кӧр'е Һаморе һ'иwи, ахе wи wәлати әw дит, дәст авитә wе у бь дәсте зоре әw р'ур'әш кьр.
[3] Дьле wи к'әтә qиза Аqуб Динайе, бь дьл у щан әw бәгәм кьр у дьле wер'а хәбәрда.
[4] Шьхәм готә Һаморе баве хwә: «Ве qизьке мьнр'а бьхwазә».
[5] Аqуб бьһист кӧ әwи qиза wи Дина р'ур'әш кьрийә, ле чьмки кӧр'ед wи чоле ль бәр кәрийа бун, qәт дәнг нәкьр һ'әта кӧ әw һатьн.
[6] Һаморе баве Шьхәм, чу Аqубр'а кӧ хәбәр дә.
[7] Кӧр'ед Аqуб гава бьһистьн әw жи жь чоле һатьн, бина хwә тәнг кьрьн у гәләки һерс к'әтьн. Чьмки әви намуса Исраелер'а лист, wәки дәст авитә qиза Аqуб. Әwи тьштәки нәбуйи кьр.
[8] Һамор wанар'а к'әтә хәбәрдане у гот: «Дьле кӧр'е мьн Шьхәм к'әтийә qиза wә, һиви дькьм, әwе бьдьнә wи.
[9] Бьбьнә хьзьме мә. Qизед хwә бьдьнә мә, qизед мә жи хwәр'а бьбьн.
[10] Т'әви мә бьминьн, әв wәлате бәр wә бә, навда бьминьн, т'ӧщарәтийе бькьн, навда хwәр'а хьзне qазьнщ кьн».
[11] Шьхәм готә бав у бьрайед кәч'ьке: «Бьра әз ль бәр ч'ә'ве wә к'әрәме бьбиньм, һун чь жь мьн бьхwазьн, әзе бьдьм.
[12] Qәлән у хәлатед гьран бькьнә сәр стуйе мьн, дәве wә чь бьхwазә жи әзе бьдьм, т'әне wе qизе бьдьнә мьн».
[13] Әwи кӧ хушка wан Дина р'ур'әш кьрьбу, кӧр'ед Аqуб бь һ'ьләк'ари щаба Шьхәм у баве wи Һамор дан
[14] у готьнә wан: «Әм нькарьн ве йәке бькьн, кӧ хушка хwә бьдьнә йәки нәсьнәт. Әва мәр'а qарәкә гьран ә.
[15] Ле бәле әме т'әне бь ви шәрти т'әви wә qайл бьн, һәгәр һун бьбьнә мина мә, жь wә һәр qьсьме мер бе сьнәткьрьне,
[16] һьнге әме qизед хwә бьдьнә wә у qизед wә жи хwәр'а биньн, әме т'әви wә бьминьн у бьбьнә щьмә'тәк.
[17] Ле һәгәр һун гӧһдарийа мә нәкьн, нәйенә сьнәткьрьне, әме qиза хwә һьлдьн у һәр'ьн».
[18] Әв готьна wан ль Һамор у кӧр'е wи Шьхәм хwәш һат.
[19] Әwи хорти әв йәк дәрәнги нәехьст, чьмки әwи гәләки qиза Аqуб бәгәм кьрьбу. Әw мала баве хwәда, йе һәри хwәйиqәдьр бу.
[20] Һамор, кӧр'е хwә Шьхәмва һатьнә ль бәр дәргәһе бажаре хwә, т'әви меред бажер хәбәрдан у готьн:
[21] «Әв мәрьвана мәр'а достийе дькьн, аwа бьра wәлетда бьминьн, т'ӧщарәтийе теда бькьн, ва йә wәлати ль бәр wан мәзьн ә. Wәрьн әм qизед wан хwәр'а биньн, qизед хwә жи бьдьнә wан.
[22] Ле т'әне әw ви шәртида т'әви мә qайл ьн бьминьн у бьбьнә щьмә'тәк, һәгәр жь мә һәр qьсьме мер бе сьнәткьрьне, чаwа кӧ әw тенә сьнәткьрьне.
[23] Гәло кәрийед wан, һәбука wан, һ'әму һ'әйwанед wан wе нәбьнә йед мә? Т'әне дьминә кӧ әм wанр'а qайл бьн, әwе т'әви мә бьминьн».
[24] Һ'әмуйед кӧ жь дәргәһе бажаре wива дәрдьк'әтьн, гӧһдарийа Һамор у кӧр'е wи Шьхәм кьрьн у һ'әму зар'ед нерин кӧ жь дәргәһе бажаре wива дәрдьк'әтьн, һатьнә сьнәткьрьне.
[25] Р'ожа сьсийа, гава әwә һе ешеда бун, дӧ кӧр'ед Аqуб, бьред Динайе, Шьмһ'ун у Леwи, һәр йәки шуре хwә һьлда у к'әтьнә бажер, т'ӧ кәс дәрнәк'әтә пешийа wан, һ'әму зар'ед нерин кӧштьн.
[26] Һамор у кӧр'е wи Шьхәм авитьнә ль бәр дәве шура кӧштьн, жь мала Шьхәм Дина һьлдан у дәрк'әтьн.
[27] Кӧр'ед Аqуб сәр кӧштийада вәгәр'ийан, бажар т'алан кьрьн, бона кӧ хушка wан р'ур'әш кьрьбун.
[28] Р'аһьштьнә пәз у дәwаред wан, к'әр у һәр тьштед wанә кӧ ль бажер у зәвийада һәбу бьрьн.
[29] Һ'әму һәбука wан, зар' у жьнед wан һесир һьлдан у һәр тьштед малада т'алан кьрьн.
[30] Аqуб Шьмһ'ун у Леwир'а гот: «Wә әз ль бәр ч'ә'ве бьнәлийед кәнанийа у пьриззи йа авитьм, әв бәла ани сәре мьн. Мәрьвед мьн һьндьк ьн, wе т'опи сәр мьн бьн у мьн хьн, әзе мала хwәва дәст у п'ийа һәр'ьм».
[31] Wана гот: «Ле щайиз бу кӧ мина qавәке анинә сәре хушка мә?»