[1] Аqуб гази кӧр'ед хwә кьрьн у гот: «Т'оп бьн, әз wанр'а бежьм, кӧ р'оже бен wе чь бе сәре wә.
[2] Wәрьнә сәрһәв у гӧһдар бьн, гәли кӧр'ед Аqуб у гӧһдарийа баве хwә Исраел бькьн.
[3] Р'убено, ньхӧрийе мьно! Сьһ'әт у дәстпебуна qәwата мьн, хwәйе qәдьре мәзьн у хwәйе qәwата зор,
[4] мина ава сәр һәвр'а чуйи, ле те нәби йе пешьн. Чьмки һати щийе баве хwә, тә һ'әр'ьманд ньвина мьн . Әw к'әтә нава wе!
[5] Шьмһ'ун у Леwи бьра нә. Шуред wан ч'әкед нәһәqийа нә,
[6] бьра щанийа мьн нәк'әвә нав шеwьред wан, qәдьре мьн т'әви щьвата wан нибә, чьмки жь һерса хwә wан мәри кӧшт, жь тәмсьстийе хwә ч'иле бох бьр'ин.
[7] Бьра ньфьр' ль һерса wан бә, кӧ гәләки гьран бу, у к'ин-боха wан бә кӧ гәләки беисафи бу! Әзе wан нав Аqубда п'аравәкьм, у нав Исраелда бәла-бәлайи кьм.
[8] Щьһуда! Бьрайед тәйе пәсьне тә бьдьн. Дәсте тә сәр стӧкӧра дьжмьне тә бә, зар'ед баве тә ль бәр тә та бьн.
[9] Щьһуда щәwрьке шера йә. Кӧр'е мьн, тӧ жь неч'иркьрьне р'абуйи. Wи хwә авит у п'алда мина шера у макәшер, к'и дькарә wи р'акә.
[10] Сәрwертийе жь Щьһуда кем нәбә, нә жи шьва сә'витийе жь бәдәна wи, һ'әта һатьна хwәйе wе , у мьләте гӧһдарийа wи бькьн.
[11] Щә'шьке хwә wе к'ола тьрийева гьредә, щә'шьке к'әра хwә к'ола тьрийейә һәрә qәнщва, пе шәрабе кьрасе хwә wе бьшо, у пе хуна тьрийе к'ьнщед хwә,
[12] ч'ә'вед wи жь шәрабе сортьр у дьранед wи жь шир сьпитьр бьн.
[13] Зәбулоне дәве бә'ре бьминә, у гәмиwаргәһа гәмийа бә, синоре бьгьһижә һ'әта Сайдайе.
[14] Исахар, к'әрәки qәwат ә, бьн т'ер'ада дьмәр'ьхә,
[15] дит р'ьһ'әти кӧ р'ьнд ә, у wәлат жи п'ьр' хwәшә, мьл хwә тәwанд бьн барә, бу п'аләйе борщдарә.
[16] Дане диwана мьләте хwә бькә мина жь qәбиләкә Исраел,
[17] Дане мә'рәки сәре р'ийа бә, тирәмә'рәки шьвәр'ийа бә, кӧ ль сьма һәспе дьхә, сийаре wе сәрпьште дьчә.
[18] Йа Хӧдан әз һивийа хьлазкьрьна тә мә.
[19] Гад, мьхӧлqәтәке һ'ьщуми сәр wи кә, ле әwе п'е-п'е һ'ьщум кә.
[20] Ашере нанда т'ер-т'ьжи бә, тә'мә-тискед п'адше бьдә.
[21] Нәфтәли каре хәзалейи аза йә, хwәйе готьнед гӧл у нурә.
[22] Усьв ч'ьqьле хwәйибәрә, ч'ьqьле хwәйибәри сәр канийе йә, п'әнщ авитийә сәр диwарә.
[23] Әw тә'л кьрьн, гӧлә авитьне, тиркәвана к'ин ажотьне,
[24] ле кәване wи сәр зора хwә ма, зәндед дәста ч'ил гьртьнә, бь сайа дәсте Зоре Аqуб, Шьван у Qәйайе Исраеле.
[25] Жь бав Хwәде тәйи кӧ али тә дькә, жь Йе Һәри-Зори кӧ дӧа тә дькә, бь дӧайед жорә ә'змана, бь дӧайед бебьнийейә жер п'алдайи, дӧа сәр мәмьк у бәт'ьне тә.
[26] Дӧайед баве тә, жь дӧайед ч'ийайед бәре зортьр бун, жь хwәшийа гьред һ'әта-һ'әтайе бьльндтьр бун, бьра ль сәр сәре Усьв бьн, у сәр т'әпа сәре wи, кӧ сәр бьрайед хwәр'а йә.
[27] Бьнйамин гӧрәки дәвхун ә, сьбәһе зу неч'ире дьхwә, ле еваре т'ален бәла дькә».
[28] Әв бун һәр донздәһ qәбилед Исраел, әв бу чь кӧ баве wан wанр'а гот у дӧа wан кьр, анәгори дӧайе wан һәр кәси, дӧа ль wан кьр.
[29] Т'әми да wан у готә wан: «Әзе т'әви щьмә'та хwә бьм, мьн т'әви кал-бавед мьн, wе шкәфтеда дәфьн кьн, йа кӧ ль ә'рде Әфроне һ'итида йә.
[30] Wе шкәфта wәлате Кәнанеда, ә'рде Махпелайи пешбәри Мамреда, йа кӧ Бьраһим ә'рдева, чаwа мьлк' бона гор'ьстен жь Әфроне һ'ити к'ьр'и бу.
[31] Бьраһим у Сәрайа жьна wива ль wьр дәфьнкьри нә, Исһаq у Р'евека жьна wива ль wьр дәфьнкьри нә, у мьн Леа жи ль wьр дәфьнкьри йә.
[32] Әw ә'рд у шкәфта теда жь зар'ед һ'итийа һатьйә к'ьр'ине».
[33] Аqуб т'әмийед кӧ данә кӧр'ед хwә хьлаз кьрьн, ньгед хwә к'аши нава ньвине кьр, р'ӧһ'е хwә да у т'әви щьмә'та хwә бу.