[1] Аqуб р'абу чу wәлате щьмә'тед ль р'оһьлате.
[2] Дәштеда әw р'асти бирәке һат, дина хwә дайе ва йә се кәри пәз доре мәхәл ьн, чьмки жь wе бире пәз дьһатә авдане. Кәвьрәки мәзьн жи ль сәр дәве бире бу.
[3] Чахе һәр кәрийед пез ль wьр т'оп дьбун, һьнге кәвьре дәве бире һол дькьрьн, пәзе хwә ав дьдан, кәвьр диса дьданә ль сәр дәве бире.
[4] Аqуб готә wан: «Гәли бьра һун жь к'ӧ нә?» Wана ле вәгәр'анд: «Әм жь Һ'аране нә».
[5] Әwи диса готә wан: «Һун Лабане кӧр'е Нәһор нас дькьн?» Әwана гот: «Әм нас дькьн».
[6] Әwи готә wан: «Әw сах-сьламәт ә?» У wана гот: «Сахи-сьламәт ә, ва йә Р'аһела qиза wи т'әви пез те».
[7] Һьнге wи гот: «Һе р'ож гәләк майә, нә wәхт ә кӧ кәри т'оп бьн, пәзе хwә авдьн, бьбьн бьч'ериньн».
[8] Ле wана гот: «Әм нькарьн, һ'әта һ'әму кәрийед пез т'оп нәбьн, әм һьнге бь һәвр'а кәвьре ль сәр дәве бире һол дькьн, пез ав дьдьн».
[9] Әwи һе т'әви wан хәбәр дьда, Р'аһел бь т'әви пәзе баве хwә һат, чьмки әwе шьванти дькьр.
[10] Гава Аqуб ч'ә'в Р'аһела qизхал у пәзе хале хwә Лабан к'әт, чу кәвьр жь дәве бире һол кьр у пәзе хале хwә Лабан авда.
[11] Һьнге Аqуб чу р'уйе Р'аһеле, кур'ин к'әте гьрийа.
[12] Паше Аqуб готә Р'аһеле кӧ әw пьсмаме баве wе йә, кӧр'е Р'евекайе йә. Әwа жи р'әви чу баве хwәр'а гьли кьр.
[13] Гава Лабан әв мьзгинийа һатьна кӧр'е хушка хwә Аqуб бьһист, р'әви чу пешийа wи. Әw һ'әмез кьр, чу р'уйе wи у әw бьрә мала хwә. Аqуб жи әв йәк гьшк Лабанр'а гьли кьр.
[14] Лабан готә wи: «Тӧ р'аст жь хун у qьнета мьн и!» Аqуб т'әмамийа мәһәке щәм wи ма.
[15] Пәй ван йәкара, Лабан готә Аqуб: «Зә'ф жи тӧ пьсмаме мьн и, гәрәке беһәq мьнр'а хӧламтийе бьки? Мьнр'а бежә, һәqе тә чи йә?»
[16] Дӧ qизед Лабан һәбун. Наве йа мәзьн Леа у наве йа бьч'ук Р'аһел бу.
[17] Леа ч'ә'вада назьк бу, ле Р'аһел бәжьн-бале у сьфәтда хас у бәдәw бу.
[18] Дьле Аqуб к'әтә Р'аһеле у гот: «Әз бона qиза тәйә бьч'ук Р'аһеле һ'әфт сала тәр'а хӧламтийе бькьм».
[19] Лабан гот: «Йа п'акә әз wе бьдьмә тә, нә кӧ бьдьмә мәрьвәки дьн. Щәм мьн бьминә».
[20] Аqуб һ'әфт сала бона Р'аһеле хӧламти кьр. Бәр ч'ә'ве wи мина чәнд р'ожа дәрбаз бун, һаqаси же һ'ьз дькьр.
[21] Һьнге Аqуб готә Лабан: «К'а дәргистийа мьн бьдә мьн, чьмки р'ожед мьн т'әмам бунә, кӧ әз һәр'ьмә щәм wе».
[22] Лабан мәсрәфәк дани, һ'әму мәрьвед wе дәре щьвандьн.
[23] Ле гава бу евар qиза хwә Леа бьр да Аqуб, әwи сәре хwә wер'а дани.
[24] Лабан щарийа хwә Зилпа жи чаwа щари да qиза хwә Леайе.
[25] Сьбәһе зу, ва йә: әва Леа йә. Һьнге Аqуб готә Лабан: «Тә әв чь сәре мьн кьр? Мьн бона Р'аһеле тәр'а хӧламти нәкьр? Тә чьма әз хапандьм?»
[26] Лабан гот: «Ль щәм мә әв нә ә'дәт ә, кӧ йа бьч'ук бәри йа мәзьн бьдьнә мер.
[27] Һ'әфтийе т'әмам кә, әзе йа дьн жи бьдьмә тә, ль бәр һ'әфт салед дьнва кӧ тӧ мьнр'а хӧламтийе бьки».
[28] Аqуб ӧса жи кьр, әwи һ'әфте т'әмам кьр, Лабан qиза хwә Р'аһел жи чаwа жьн да wи.
[29] Лабан щарийа хwә Билһа жи чаwа щари да qиза хwә Р'аһеле.
[30] Аqуб сәре хwә Р'аһелер'а дани у Р'аһел жь Леайе зә'фтьр һ'ьз кьр. У Аqуб һ'әфт салед дьн жи хӧламти Лабанр'а кьр.
[31] Хӧдан дит кӧ Леа бәр ч'ә'ва р'әш ә, бәт'ьне wе вәкьр. Ле Р'аһел бебәр бу.
[32] Леа пе ма кӧр'әк ани у наве wи дани Р'убен , чьмки wе гот: «Хӧдан зәлулийа мьн дит, иди ньһа мере мьне мьн һ'ьз кә».
[33] Диса пе ма, кӧр'әки дьн ани у гот: «Чьмки Хӧдан бьһист кӧ әз найемә һ'ьзкьрьне, ләма әв кӧр' жи да мьн». У наве wи дани Шьмһ'ун .
[34] Диса пе ма кӧр'әки дьн жи ани у wе гот: «Ньһа иди мере мьне т'әви мьн йәк бә, чьмки мьн се кӧр' жер'а анин» бона ве йәке наве Леwи һатә данин.
[35] Диса пе ма кӧр'әки дьн ани у гот: «Ньһа әзе пәсьне Хӧдан бьдьм». Ләма наве wи дани Щьһуда . У жь зар'анине һатә бьр'ине.