[1] Хӧдан нава даред Мамрейә мә'зеда wива хӧйа бу, гава әw гәрмайа р'ожеда ль бәр дәре кон р'уньштьбу.
[2] Әwи сәре хwә бьльнд кьр, дина хwә дайе, ва йә се мер пешбәри wи сәкьнинә. Гава әw дитьн, жь бәр дәре кон бь р'әв чу пешийа wан у һ'әта ә'рде ль бәр wан дәвәр'уйа чу,
[3] у гот: «Хwәйе мьн! Һәгәр мьн ль бәр ч'ә'вед тә к'әрәм дит, һиви дькьм ль сәр мала хӧламе хwәр'а дәрбаз нәбә,
[4] бьра һьнәк ав биньн, ньгед хwә бьшон у бьн дареда р'ьһ'әт бьн,
[5] әз пә'ри нан биньм һун qьнйатәке бькьн, паше р'ийа хwәда һәр'ьн, чьмки һун кӧ һатьнә щәм хӧламе хwә». Һьнге wан гот: «Тә чаwа гот, ӧса жи бькә».
[6] Бьраһим ләзандә бәрбь кон, хwә Сәрайер'а гиһанд у готе: «Зу бькә се wарбеж аре хас бьстьре, нан лехә».
[7] Бьраһим хwәха жи ләз бәрбь һ'әйwен чу, голькәкә һ'ьлийә р'ьнд гьрт да хӧламәки, әwи жи әw зу һазьр кьр.
[8] У Бьраһим р'уне ньвишки, шир у гоште голька һ'ьлийә һазьркьри да бәр wан у wан хwар, әw хwәха жи бьн дареда щәм wан ма.
[9] Һьнге готьнә Бьраһим: «К'анейә Сәрайа жьна тә?» Әwи гот: «Әw ва йә конда йә».
[10] У йәки жь wан гот: «Саләкә дьн ви чахи әзе диса ль сәр тәда бем у кӧр'әки Сәрайа жьна тә wе һәбә». Ле Сәрайе ль бәр дәре кон, пьшт wива дьбьһист.
[11] Бьраһим у Сәрайи кал пир бьбун у р'ожед хwә дәрбаз кьрьбун, Сәрайи жи иди жь кьраса һатьбу бьр'ине.
[12] Һьнге Сәрайи ль бәр хwәда к'әнийа у гот: «Ве мәзьнайа хwәда әзе чи хwә ша бьм, кӧ хwәйе мьн жи иди йәки кал ә?»
[13] Хӧдан готә Бьраһим: «Чьма Сәрайи к'әнийа у гот: ‹Гәло р'асти әзе ве мәзьнайа хwәда зар'а биньм, кӧ әз иди пир бумә?›
[14] Гәло тьштәки чәтьн бона Хӧдан һәйә? Ви wә'дәйе к'ьфшкьрида, саләкә дьн ви чахи әзе ль сәр тәда бем у кӧр'әки Сәрайе wе һәбә».
[15] Һьнге Сәрайе жь тьрса инк'ар кьр у гот: «На, әз нә к'әнийамә». Ле Хӧдан готе: «На, тӧ к'әнийайи».
[16] Әw мәри жь wьр р'абун, wана бәре хwә да Содоме, Бьраһим жи т'әви wан р'ек'әт, кӧ wан вәр'екә.
[17] Һьнге Хӧдан гот: «Гәло әзе wи тьште кӧ әзе бькьм жь Бьраһим вәшерьм?
[18] Нә бәле Бьраһиме ә'сә бьбә мьләтәки мәзьн у зор. У бь wи дӧа wе т'әмамийа мьләте ль сәр дьнйайе бьбә.
[19] Чьмки мьн әw бона wе йәке бьжарт, wәки әw т'әмийе бьдә кӧр'ед хwә у пәй хwәр'а жи мала хwә, кӧ әw р'ийа Хӧданда һәр'ьн, р'астийе у һәqийе бькьн, wәки Хӧдан чь кӧ Бьраһимр'а соз дайә бинә сери».
[20] Хӧдан гот: «Чьмки qар'ә-qар'а Содом у Гоморайе зедә бунә у гӧнед wан гәләки гьран бунә,
[21] әзе ньһа пәйа бьм дина хwә бьдьме, к'а әw р'аст wәкә wе qар'ә-qар'а хьрабийед wанә кӧ гьһиштьнә мьн дькьн, һәгәр на, кӧ әз заньбьм».
[22] Әw мәрьвана жь wьр вәгәр'ийан, чунә бәрбь Содоме. Ле Бьраһим һе ль бәр Хӧдан сәкьни мабу.
[23] Паше Бьраһим незик бу у гот: «Гәло т'әви нәqәнща те р'аста жи ӧнда ки?
[24] Бәлки wи бажарида пенщи кәсед р'аст һәбьн? Гәло те wи щийи ӧнда ки у нәди хатьре wан пенщи кәсед р'астә кӧ wе дәре нә?
[25] Һаша жь тә кӧ тӧ ве йәке бьки, wәки тӧ р'аста т'әви нәqәнща ӧнда ки, йан жи ӧса бини сәре р'аста, чаwа сәре нәqәнща, һаша жь тә! Әв йәк набә кӧ һ'акьме т'әмамийа дьнйайе диwана р'аст нәкә?»
[26] Хӧдан готе: «Һәгәр әз Содомеда пенщи кәсед р'аст бьбиньм, әзе т'әмамийа wи щийи бьдьмә хатьре wан».
[27] Бьраһим ле вәгәр'анд у гот: «Әз кӧ т'оз у к'ози мә, мьн тӧрӧш кьр Хwәйир'а хәбәрда:
[28] Бәлки жь пенщи кәсед р'аст пенщ кем бьн, һьнге те т'әмамийа бажер wеран ки, бона пенща?» Хӧдан гот: «Һәгәр ль wе дәре чьл пенщ кәс һәбьн, әз wеран нәкьм».
[29] Бьраһим щарәкә дьн пьрси у гот: «Бәлки ль wе дәре чьл кәс һәбьн?» Хӧдан гот: «Бона чьли жи әз wе йәке нәкьм».
[30] Бьраһим гот: «Ле бәле бьра Хwәйе мьн ль сәр хәбәрдана мьн һерс нәк'әвә: Бәлки ль wе дәре си кәс һәбьн?» Хӧдан готе: «Һәгәр ль wе дәре си кәс һәбьн, әз wе йәке нәкьм».
[31] Бьраһим гот: «Ва йә мьн тӧрӧш кьр Хwәйир'а хәбәрда: Бәлки ль wе дәре бист кәс һәбьн?» Хӧдан готе: «Бона хатьре бист кәси жи әз wеран нәкьм».
[32] Һьнге Бьраһим диса гот: «Ле бәле бьра Хwәйе мьн һерс нәк'әвә әзе ве щаре жи бьпьрсьм: Бәлки ль wе дәре дәһә кәс һәбьн?» Хӧдан готе: «Бона хатьре дәһә кәси жи әзе wеран нәкьм».
[33] У Хӧдан ль пәй хәбәрдана т'әви Бьраһимр'а чу, Бьраһим жи вәгәр'ийа щийе хwә.