[1] Аqуб бьһист кӧ ль Мьсьре гәньм һәйә у Аqуб готә кӧр'ед хwә: «Һун чь ч'ә'ве һәв дьньһер'ьн?»
[2] Готә wан: «Аwа мьн бьһистийә кӧ ль Мьсьре гәньм һәйә, бәржери ль wьр бьн у жь wьр мәр'а бьк'ьр'ьн, кӧ әм бьжин нәмьрьн».
[3] Дәһә бьрайед Усьв бәржер чунә Мьсьре, кӧ гәньм бьк'ьр'ьн.
[4] Ле Аqуб бьрайе Усьв Бьнйамин, т'әви бьрайед wи нә шанд, дьгот: «Бәлки qәзик бе сәре wи».
[5] Кӧр'ед Исраел һатьбун гәньм бьк'ьр'ьн, т'әви йед майинә һати, чьмки ль wәлате Кәнанеда хәлайи бу.
[6] Усьв хwәха сәрwере wи wәлати бу. Әwи хwәха жи хӧрәк дьфьротә т'әмамийа щьмә'та wәлет. Бьрайед Усьв һатьн у ль бәр wи дәвәр'уйа чунә ә'рде.
[7] Усьв бьрайед хwә кӧ дитьн әwи әw нас кьрьн. Ле хwә ӧса да к'ьфше йане әw wан нас накә, т'әви wан һерс хәбәрда у готә wан: «Һун жь к'ӧ һатьнә?» Wана гот: «Әм жь wәлате Кәнане бона хӧрәк к'ьр'ине һатьнә».
[8] Усьв бьрайед хwә нас кьрьн, ле wана әw нас нәкьрьн.
[9] Һьнге Усьв әw хәwнед кӧ ль сәр wан дитьбун бир анин у готә wан: «Һун щә'сус ьн, һун һатьнә кӧ щики сьстийа ви wәлати бьбиньн».
[10] Wана готә wи: «На хwәйе мә, хӧламед тә һатьнә кӧ хӧрәк бьк'ьр'ьн».
[11] Әм һ'әму кӧр'ед бавәки нә, әм мәрьвнә ширһ'әлал ьн, хӧламед тә нә щә'сус ьн.
[12] Әwи готә wан: «На, һун һатьнә кӧ щики сьстийа wәлет бьбиньн».
[13] Wана гот: «Әм хӧламед тә, донздәһ бьра нә, wәлате Кәнанеда кӧр'ед бавәки нә, йе бьч'ук ньһа ль щәм баве мә йә, ле йәк жи иди т'ӧнә».
[14] Усьв готә wан: «Һәма әв ә кӧ мьн готә wә: ‹Һун щә'сус ьн!›
[15] Һуне бь ве йәке бенә щер'ьбандьн: Әз сәре Фьрәwьн кьм, һун жь вьр дәрнак'әвьн һ'әта кӧ бьрайе wәйи бьч'ук нәйе ве дәре.
[16] Жь нав хwәда йәки бьшиньн, бьра һәр'ә бьрайе wә бинә, ле һуне гьрти бьн, кӧ аһа готьнед wә бенә щер'ьбандьне, wанда р'асти һәйә йан на. Ле һәгәр на. Әз сәре Фьрәwьн кьм: ‹Һун щә'сус ьн!›»
[17] Се р'ожа әw авитьнә гьртихана кәле.
[18] Р'ожа сьсийа Усьв готә wан: «Аһа бькьн кӧ һун сах бьминьн, чьмки әз жь Хwәде дьтьрсьм.
[19] Һәгәр һун мәрьвнә ширһ'әлал ьн, бьра жь бьрайед wә йәк ве мала кӧ һун теда гьрти нә, бьминә, ле йед майин гәньм хәлайа мала хwәр'а бьгьһиньн,
[20] бьрайе хwәйи бьч'ук жи мьнр'а биньн, wәки готьна wә р'аст дәре у һун нәмьрьн». Wана ӧса жи кьр.
[21] У һьнге һәвр'а готьн: «Бь р'асти әм һьндава бьрайе хwәда гӧнәк'ар ьн, чьмки мә тә'ли-тәнгийа wи дит, гава ль бәр мә лава-диләк дькьр, ле мә гӧһ нәдайе, ләма жи әв тә'ли-тәнги те сәре мә».
[22] Р'убен ль wан вәгәр'анд у гот: «Мьн wәр'а нәдьгот: ‹Һьндава кӧр'ькда гӧна нәкьн?› Ле wә гӧр'а мьн нәкьр, ньһа хуна wи жь мә те хwәстьне».
[23] Wана ньзанәбун, кӧ Усьв wан фә'м дькә, чьмки пе т'әрщьмәкьр wанр'а хәбәр дьда.
[24] Усьв жь wан дур к'әт, гьрийа. Диса ль сәр wанда вәгәр'ийа, т'әви wан хәбәрда у жь нава wанда Шьмһ'ун гьрт, ль бәр ч'ә'ве wан әw гьреда.
[25] Усьв фәрман кьр, кӧ баред wан гәньм дагьрьн, у п'әре wан һәр кәси текьнә т'ер'ед wан, нане р'е жи wанр'а дайньн. Ӧса жи һатә кьрьне.
[26] Wана гәньме хwә ль к'әред хwә бар кьрьн у жь wьр чун.
[27] К'арвансәреда йәки жь wан т'ер'а хwә вәкьр, кӧ кайе бьдә к'әре хwә, дина хwә дайе ва йә п'әре wи ль сәр дәве т'ер'е йә.
[28] У әwи готә бьрайед хwә: «П'әре мьн ль мьн вәгәр'андьнә, ва йә әw вьр т'ер'а мьн дайә». Һьнге дьле wан нава wанда р'ьщьфи у бь тьрс һәвр'а готьн: «Хwәде әв чь ани ль сәре мә?»
[29] Әw һатьнә wәлате Кәнане, щәм баве хwә Аqуб у һәр тьште кӧ һатьбу ль сәре wан, т'әв гьликьрьн у готьне:
[30] «Мәрьв кӧ хwәйе wи wәлати йә мәр'а һ'ьшк хәбәрда, әм данинә дәwса щә'сусед wәлет.
[31] Мә wир'а гот: ‹Әм мәрьвнә ширһ'әлал ьн, әм нә щә'сус ьн.
[32] Әм донздәһ бьранә, кӧр'ед бавәки нә, ле йәк жи иди т'ӧнә, ле йе бьч'ук ньһа ль wәлате Кәнане щәм баве мә йә›.
[33] Wи мәрьве хwәйе wи wәлати мәр'а гот: ‹Әзе бь ве йәке бьзаньбьм кӧ һун мәрьвнә ширһ'әлал ьн, бьраки хwә щәм мьн бьһельн, ле һун бона хәлайа мала хwә, хӧрәк һьлдьн һәр'ьн.
[34] Ле бьрайе хwәйи бьч'ук мьнр'а биньн, wәки әз бьзаньбьм, кӧ һун нә щә'сус ьн, ле мәрьвнә ширһ'әлал ьн, әзе бьрайе wә бьдьмә wә, һуне жи бькарьбьн ви wәлатида т'ӧщарәтийе бькьн›».
[35] Гава wана т'ер'ед хwә вала дькьрьн, дина хwә дане wе к'иське п'әре wан һәр кәси жи т'ер'ед wанда нә. Wан у бавед хwәва, гава әw к'иськед п'әред хwә дитьн, тьрсийан.
[36] Һьнге баве wан, Аqуб готә wан: «Wә дәсте мьн жь кӧр'ед мьн кьрьн, Усьв т'ӧнә, Шьмһ'ун т'ӧнә у Бьнйамин жи дьхwазьн жь мьн бьстиньн, әв һ'әму те сәре мьн!»
[37] Р'убен баве хwәр'а хәбәрда у гот: «Һәгәр әз wи нәйньм нәдьмә тә, тӧ ван һәр дӧ кӧр'ед мьн бькӧжә, к'а әwи бьдә дәсте мьн у әзе wи пашда биньм бьдьмә тә».
[38] Ле Аqуб гот: «Кӧр'е мьне т'әви wә бәржер найе, чьмки бьрайе wи мьрийә у әw т'әне майә, һәгәр wе р'ийа кӧ һун теда дьчьн qәзик бе сәре wи, һьнге һуне п'ор'е мьни сьпи, бь к'әдәр бькьнә Дийаре Мьрийа».