[1] Усьв ә'мьр ль wәк'иле мала хwә кьр у гот: «Т'ер'ед ван мәрьва чьqаси кӧ әw дькарьн бьбьн хӧрәква дагьрә у п'әре һәр кәси жи дайнә ль сәр дәве т'ер'ед wан,
[2] ле к'аса мьн, к'аса зивин, т'әви п'әре хӧрәк дайнә ль сәр дәве т'ер'а йе һәри бьч'ук». Әwи wәкә готьна Усьв кьр.
[3] Сьбәһ кӧ зәлал бу, әw мәрьвана һатьнә вәр'екьрьне, әw у к'әред wан.
[4] Әwана жь бажер чун, ле һе дур нәк'әтьбун, гава Усьв готә wәк'иле мала хwә: «Р'абә пар'а пәй wан мәрьва к'әвә, хwә wанр'а бьгьһинә у wанр'а бежә: ‹Wә чьма жь бәр qәнщийева хьраби кьр?
[5] Чьма к'аса мьнә зивин дьзи ? Әва нә әw ә, йа кӧ хwәйе мьн пе вәдьхwә у пе wе жи дьньһер'и? Wә әв йәк кьрә хьраби›».
[6] Wәк'ил хwә ль wанр'а гиһанд у әв хәбәред Усьв wанр'а готьн.
[7] Wана wир'а гот: «Чьма хwәйе мьн тьштед һа дьбежә? Һаша жь хӧламед тә, кӧ әw тьште ӧса бькьн!
[8] Аwа мә кӧ әw п'әред ль сәр дәве т'ер'ед хwә дитьн, жь wәлате Кәнан анин данә тә, иди wе чаwа бә, кӧ әм жь мала хwәйе тә зив йан зер' бьдьзьн?
[9] Щәм к'ижан хӧламед тә әw дәрк'әвә, бьра әw бе кӧштьне у әм жи бьбьнә хӧламед хwәйе хwә».
[10] Әwи гот: «П'ак, wә чаwа гот бьра ӧса бә, щәм к'ижани әw дәре бьра әw мьнр'а бьбә хӧлам, ле һун бесущ бьн».
[11] Аwа һәр йәки зу-зу т'ер'а хwә дани ә'рде у һәр йәки т'ер'а хwә вәкьр.
[12] Wәк'ил жь т'ер'а йе мәзьнда дәстпекьр гәр'ийа һ'әта йе бьч'укда хьлаз кьр, к'ас т'ер'а Бьнйаминда дит.
[13] Һьнге wана к'ьнще хwә qәлаштьн, һәр йәки к'әре хwә бар кьр у вәгәр'ийанә бажер.
[14] Щьһуда бьрайед хwәва һатьнә мала Усьв, әwи һе ль wьр бу у дәвәр'уйа ль бәр wи чунә ә'рде.
[15] Усьв готә wан: «Wә әв чь кьр? Wә ньзаньбу кӧ мәрьвәки мина мьн р'ә'мьлдарийе wе бькә?»
[16] Щьһуда гот: «Әм чь бежьнә хwәйе хwә? Әм чь бежьн? Йан әм чаwа хwә р'успи кьн? Хwәде нәһәqийа хӧламед тә ә'йан кьр, ва йә әм хӧламед хwәйе хwә нә, һьн әм, һьн жи әwи кӧ к'ас жь щәм wи дәрк'әт».
[17] Усьв гот: «Һаша жь мьн кӧ әз ве йәке бькьм! Әwи кӧ к'ас жь щәм wи дәрк'әт, бьра әw т'әне мьнр'а бьбә хӧлам, ле һун бь хер у сьламәт һәвраз сәр баве хwәда һәр'ьн».
[18] Һьнге Щьһуда чу незик у готе: «Хwәйе мьн, изьна тә һәбә, бьра хӧламе тә гьлики бежә хәбәрәке бьгьһинә гӧһе хwәйе хwә у һерса тә ль сәр хӧламе тә р'анәбә, чьмки тӧ йәки мина Фьрәwьн и.
[19] Хwәйе мьн жь хӧламед хwә пьрсибу готьбу: ‹Бав йан бьре wә һәнә?›
[20] Һьнге мә хwәйе хwәр'а гот: ‹Бавәки мәйи каләмер һәйә у кӧр'әки wийи бьч'уки калтийа wида буйи һәйә, бьре wийи деда мьрийә, т'әне әw жь дийа хwә майә у баве wи, wи һ'ьз дькә›.
[21] Тә хӧламед хwәр'а гот: ‹Әwи бәржер биньнә щәм мьн, кӧ әз wи бь ч'ә'ва бьбиньм›.
[22] Мә һьнге хwәйе хwәр'а гот: ‹Әw кӧр'ьк нькарә жь баве хwә бьqәтә, гава әw жь баве хwә бьqәтә, баве щандә›.
[23] Ле тә хӧламед хwәр'а гот: ‹Һәгәр һун бьрайе хwәйи бьч'ук т'әви хwә бәржер нәйньн, щарәкә дьн р'уйе wә р'уйе мьн нәк'әвә›.
[24] У гава әм һәвраз чунә щәм хӧламе тә, баве мьн, әw готьнед хwәйе хwә, мә wир'а гьли кьрьн.
[25] Гава баве мә гот: ‹Р'абьн диса вәгәр'ьн бона мә һьнәк хӧрәк бьк'ьр'ьн›.
[26] Һьнге мә гот: ‹Әм нькарьн бәржер һәр'ьн. Ле һәгәр бьрайе мәйи бьч'ук т'әви мә бе, әме һьнге бәржер һәр'ьн, чьмки әм нькарьн р'уйе wи мәрьви бьбиньн, һ'әта бьрайе мәйи бьч'ук т'әви мә нәйе›.
[27] Хӧламе тә, баве мьн готә мә: ‹Һун заньн жьна мьн дӧ кӧр' мьнр'а анин,
[28] йәк жь дәсте мьн чу у мьн гот: «Р'асти әw һатийә дьр'андьне» у һ'әта ньһа мьн әw нәдитийә.
[29] Ле wәки һун әви жи, жь бәр ч'ә'ве мьн дәрхьн бьбьн у qәзик бе сәре wи, һуне п'ор'е мьни сьпи, дәрд-кӧлава бькьнә Дийаре Мьрийа›.
[30] Һәгәр ньһа әз һәр'ьмә щәм хӧламе тә, баве хwә, кӧр'ьке wи нә т'әви мә бә, ә'мьре wи кӧ ә'мьре wива гьредайи йә,
[31] гава бьбинә кӧ кӧр'ьке wи т'ӧнә, wе щандә у хӧламед тә, wе баве хwәйи хӧламе тә, wи п'ор'ед сьпи бь к'әдәр бькьнә Дийаре Мьрийа.
[32] Чьмки әз, хӧламе тә щәм баве хwә бумә щабдаре кӧр'ьке wи у мьн готийе: ‹Һәгәр әз wи нәйньм нәдьмә тә, әз т'әмамийа ә'мьре хwәда ль бәр баве хwә гӧнәк'ар бьм›.
[33] Аwа әз ньһа т'әwаqә жь тә дькьм, бьра әз, хӧламе тә дәwса wи кӧр'ьки хwәйе хwәр'а бьбә хӧлам, кӧр'ьк бьра т'әви бьрайед хwә һәвраз һәр'ә.
[34] Чьмки, әзе чаwа р'абьм һәвраз һәр'ьмә щәм баве хwә, һәгәр кӧр'ьк нә т'әви мә бә? Нәбә кӧ әз wе qәзийа кӧ бе сәре баве мьн бьбиньм».