<Дәстпебун 4

[1] Пәй ве йәкер'а мәрьв незики жьна хwә Һеwайе бу, әw һ'әмлә дәрк'әт у Qайин жер'а бу, һьнге wе гот: «Мьн мәри жь Хӧдан станд».

[2] Паше бьре wи Һабил бу. Һабил бу шьване пез, ле Qайин хwә дабу ә'рдбещәркьрьне.

[3] У хеләке шунда, Qайин жь бәред ә'рде Хӧданр'а һ'әди ани.

[4] Һабил хwәха жи чәнд һ'әб жь ньхӧрийед кәрийе пәзе хwә, бәзед wанва һ'әди анин. Хӧдан бәре хwә да Һабил у һ'әдийа wи,

[5] ле дина хwә нәда Qайин у һ'әдийа wи. Qайин гәләки һерс к'әт у мьр'узе хwә кьр.

[6] Һьнге Хӧдан Qайинр'а гот: «Тӧ чьма һерс к'әтийи? У тә чьма сәре хwә бәржер кьрийә?

[7] Һәгәр тӧ р'астийе бьки, гәло те сәре хwә бьльнд нәки? Ле wәки тӧ р'астийе нәки ва йә гӧнә ль бәр дери к'әтийә у хwәха жи һ'әйра тәда йә, ле бькә кӧ тӧ һ'ӧкӧми ль сәр бьки».

[8] Пәй ве йәкер'а Qайин бьре хwә Һабилр'а гот: «Әм һәр'ьнә к'әwшен» у гава әw гьһиштьнә к'әwшен, Qайин р'абу гьһиштә бьре хwә Һабил у әw кӧшт.

[9] Һьнге Хӧдан жь Qайин пьрси гот: «К'ане йә бьре тә Һабил?» Әwи гот: «Әз ньзаньм, чьма әз нобәдаре бьре хwә мә?»

[10] Хӧдан готе: «Тә чь кьрийә? Дәнге хуна бьре тә жь ә'рде шькийате хwә ль мьн дькә».

[11] Ньһа ньфьр' жь wи ә'рди ль тә бә, к'ижани кӧ дәве хwә вәкьр хуна бьре тә жь дәсте тә фьр' кьр.

[12] Гава тӧ ә'рде бещәр ки, әw иро шунда иди к'аре нәдә тә, тӧ ль сәр ә'рде р'ьһ'әтийе нәбини у дәро-дәр би.

[13] Һьнге Qайин готә Хӧдан: «Әв щәзайе мьн жь qәwата мьн дәр ә.

[14] Аwа иро кӧ тӧ жь р'уйе ә'рде бәри мьн дьди, әзе хwә жь тә вәшерьм кӧ р'уйе тә нәбиньм у ль сәр ә'рде жи кӧ зерийайи у дәро-дәр бьм, һьнге к'е кӧ мьн бьбинә wе мьн бькӧжә».

[15] Хӧдан готе: «К'е кӧ Qайин бькӧжә һ'әфт qәт һ'әйф же бе һьлдане». У Хӧдан нишанәк Qайинва дани, wәки к'и кӧ р'асти wи бе, wи нәкӧжә.

[16] Qайин жь бәр ч'ә'ве Хӧдан р'абу чу wәлате Ноде , ль алийе р'оһьлата Едене у ль wьр р'ьк'ьне хwә авите у ль wьр ма.

[17] Пәй ве йәкер'а Qайин незики жьна хwә бу у әw һ'әмлә дәрк'әт, Һәнох жер'а бу. Һьнге әwи бажарәк че дькьр у наве кӧр'е хwә Һәнох дани ль сәр бажер.

[18] Паше Һәнохр'а Ирад бу, Ирадр'а Мьһ'уйаел бу, Мьһ'уйаелр'а Мьтушайел бу, Мьтушайелр'а жи Ламәх бу.

[19] Ламәх дӧ жьн стандьн, наве йәке Ә'даһ бу у наве йа дьн жи Силаһ бу.

[20] Ә'даһе Йавал ани. Әва баве wан бу, йед конада дьман у шьван-гаванти дькьрьн.

[21] Наве бьре wи Йувал бу. Әва жи баве wан һ'әмуйа бу, йед кӧ чәнг у бьлуре дьхьстьн.

[22] Силаһе жи Тувал-Qайин ани, әва һ'әдаде һәр щур'ә һащәтед сьфьр у һ'әсьн бу. Хушка Тувал-Qайин жи Наһама бу.

[23] Ламәх жьнед хwәр'а гот: «Ә'даһ у Силаһ бьбьһен дәнге мьн! Жьнед Ламәх гӧһед хwә бьдьнә ве готьна мьн. Мәрьвәки әз бьриндар кьрьм, мьн лехьст кӧшт, бона ледана щаһьләки мьн һ'әйф һьлда.

[24] Һәгәр һ'әйфа Qайин һ'әфт qәт бе һьлдане, һ'әйфа Ламәх һ'әфте һ'әфт щара wе бе һьлдане».

[25] Адәм диса незики жьна хwә бу, әwе кӧр'әк ани у наве wи дани Сет' . Чьмки әwе гот: «Хwәде дәwса Һабил кӧ Qайин кӧшт, зӧр'әтәкә дьн да мьн».

[26] Сет'р'а жи кӧр'әк бу у наве wи дани Әнош. Һьнгеда дәстпебу кӧ гази наве Хӧдан кьн.