[1] У ӧса qәwьми, кӧ дӧ сала шунда Фьрәwьн хәwнәк дит, ва йә әw ль дәве ч'әме Ниле сәкьни бу
[2] у ва нә һ'әфт ногьнед бәдәwә к'ок жь Ниле дәрк'әтьн у нава qамишада ч'ерийан.
[3] Пәй wанр'а, дина хwә дайе, ва нә һ'әфт ногьнед дьн жи, һ'ьшколәкийә qав-qавки жь Ниле дәрк'әтьн, щәм wан ногьна ль дәве Ниле сәкьнин,
[4] у wан ногьнед һ'ьшколәкийә qав-qавки, әw һәр һ'әфт ногьнед бәдәwә к'ок хwарьн, һьнге Фьрәwьн һ'ьшйар бу.
[5] У ч'ә'ве wи диса чунә ль сәр һәв, әwи щара дӧда хәwн дит, ва йә ль сәр сапәке, һ'әфт сьмбьлед т'ьжи у р'ьнд дәрдьк'әтьн.
[6] Пәй wанр'а ва йә һ'әфт сьмбьлед валайә жь байе р'оһьлате шәwьти шин бун,
[7] у wан сьмбьлед вала, әw һәр һ'әфт сьмбьлед т'ьжийә р'ьнд һ'уфи хwә кьрьн. Фьрәwьн һ'ьшйар бу, ва йә хәwн бу.
[8] Wе сьбәһе дьле Фьрәwьн кӧ нә р'ьһ'әт бу, әwи шанд гази һ'әму к'оч'әка у занәйед Мьсьре кьрьн у хәwнед хwә wанр'а гьли кьрьн, ле кәсәк т'ӧнәбу кӧ әw хәwн Фьрәwьнр'а шьровәкьрана.
[9] Һьнге сәрwере шәравдара Фьрәwьнр'а хәбәрда у готе: «Иро гӧнәк'арийа мьн һатә бира мьн.
[10] Wе һьнге гава Фьрәwьн һерса хwә ль сәр хӧламед хwә р'акьр, әз авитьмә гьртихана мала сәрwере нобәдара, т'әви сәрwере нанпежа.
[11] Мьн у wи шәвәкеда хәwн дитьн, мә һәр йәки ль гора фә'мина хәwна хwә, хәwн дитьн.
[12] Ль wьр хортәки ибрани т'әви мә һәбу, әw хӧламе сәрwере нобәдара бу, мә хәwнед хwә wир'а гьли кьрьн, әwи мәр'а шьровәкьрьн, хәwнед мә һәр йәки әwи р'аст мәр'а шьровәкьрьн.
[13] Әwи чаwа мәр'а шьровәкьрьн, ӧса жи бу, әз вәгәр'ийамә ль сәр qӧльхе хwә, ле әwе дьн һатә дархьстьне».
[14] Һьнге Фьрәwьн шандә пәй Усьв. Әw бь ләз жь зьндане дәрхьстьн, р'уйе хwә кӧр' кьр, к'ьнщед хwә гӧһастьн у һатә щәм Фьрәwьн.
[15] Фьрәwьн готә Усьв: «Мьн хәwн дитийә, ле кәсәк т'ӧнә кӧ бькарьбә мьнр'а шьровәкә, мьн бьһистийә кӧ дьбежьн: тӧ хәwна дьбьһейи у шьровәдьки».
[16] Усьв ль Фьрәwьн вәгәр'анд у готе: «Әв һ'ӧньре мьн нинә, ле Хwәдейе щабәкә хер бьдә Фьрәwьн».
[17] Фьрәwьн Усьвр'а гот: «Мьн хәwн дит: ва йә әз ль дәве Ниле сәкьни бум,
[18] ва нә һ'әфт ногьнед бәдәwә к'ок жь Ниле дәрк'әтьн у нава qамишада ч'ерийан.
[19] Пәй wанр'а, мьн дина хwә дайе, ва нә һ'әфт ногьнед дьн жи, жар, һ'ьшколәки у qав-qавки, кӧ мьн т'әмамийа wәлате Мьсьреда йед мина wан ӧса һ'ьшколәки нәдитьнә,
[20] у wан ногьнед һ'ьшколәкийә qав-qавки, әw һәр һ'әфт ногьнед пешийейә к'ок хwарьн.
[21] Әw чунә зькед wан у qәт к'ьфш жи нәдьбу кӧ әw чунә зькед wан, әw ӧса жи һ'ьшколәки ман мина бәре. У әз һ'ьшйар бум.
[22] У диса хәwн дит, ва йә ль сәр сапәке һ'әфт сьмбьлед т'ьжи у р'ьнд дәрдьк'әтьн.
[23] Пәй wанр'а һ'әфт сьмбьлед һ'ьшк у валайә жь байе р'оһьлате шәwьти шин бун,
[24] у wан сьмбьлед вала, әw һәр һ'әфт сьмбьлед т'ьжийә р'ьнд һ'уфи хwә кьрьн. Мьн к'оч'әкар'а гьли кьр, ле кәсәки мьнр'а шьровәнәкьр».
[25] Һьнге Усьв готә Фьрәwьн: «Хәwнед Фьрәwьн йәк ьн. Тьште кӧ Хwәдейе бькә, әw ә'лами Фьрәwьн кьрийә.
[26] Әw һәр һ'әфт ногьнед р'ьнд, әw һ'әфт сал ьн, ӧса жи әw һәр һ'әфт сьмбьлед р'ьнд, һ'әфт сал ьн, әв хәwн йәк ьн.
[27] Әw һәр һ'әфт ногьнед һ'ьшколәкийә у qав-qавки, кӧ пәй wанр'а дәрк'әтьн, әw һ'әфт сал ьн у әw һәр һ'әфт сьмбьлед валайә жь байе р'оһьлате шәwьти, әw һәр һ'әфт салед хәлайе нә.
[28] Әз ве йәке дьбежьмә Фьрәwьн, wәки Хwәде тьште кӧ wе бькә, нишани Фьрәwьн кьрийә.
[29] Ва йә, һ'әфт сале бен, кӧ т'әмамийа wәлате Мьсьре wе т'ер у т'ьжи бә.
[30] Ле пәй wан салар'а, wе һ'әфт сала бьбә хәлайи у һ'әму т'ер у т'ьжибуна wәлате Мьсьре wе бе биркьрьне. Хәлайе wәлет даqӧртинә.
[31] У wе ӧса бә, кӧ жь дәст wе хәлайа кӧ wе пәйр'а бе, әw т'ер у т'ьжибуна wәлет иди нәйе биранине. Чьмки хәлайе гәләки гьран бә.
[32] Ле хәwна кӧ Фьрәwьнр'а дӧ щара һатийә wәк'ьландьне, те һ'әсабе, кӧ әв йәк алийе Хwәдеда ә'сәйикьри йә у Хwәде wе зутьрәке бькә.
[33] Бьра ньһа Фьрәwьн мәрьвәки билан у сәрwахт бьбинә у wи дайнә ль сәр т'әмамийа wәлате Мьсьре.
[34] Бьра Фьрәwьн ве йәке бькә, бәрпьрсийар дайнә ль сәр wәлет у нава ван һ'әфт салед т'ер у т'ьжида, жь һ'әму дәрәмәтед wәлате Мьсьре жь пенща йәки бьстиньнә.
[35] У бьра һ'әму хӧрәкед нава ван салед qәнщда кӧ wе бен т'оп кьн, у бьн дәсте Фьрәwьнда гәньм бьдьнә сәрһәв у бажарада хӧрәк хwәй кьн,
[36] wәки хӧрәк к'исе wәлетда һәбә, бона wан һ'әфт салед хәлайейә кӧ wе wәлате Мьсьреда бьбә, кӧ wәлат жь хәлайе qьр' нәбә».
[37] Әв йәк ль Фьрәwьн у һ'әму хӧламед wи хwәш һат.
[38] Фьрәwьн готә хӧламед хwә: «Һун дькарьн мәрьвәки мина ви бьбиньн, кӧ Р'ӧһ'е Хwәде теда бә?»
[39] Һьнге Фьрәwьн готә Усьв: «Хwәде кӧ әв йәк ль бәр тә вәкьрийә, билан у сәрwахте мина тә т'ӧнәнә.
[40] Тӧ ль сәр мала мьнр'а бә, т'әмамийа щьмә'та мьн жи гӧһдарийа готьнед дәве тә бькә, әз т'әне т'әхте хwәда жь тә мәстьр бьм».
[41] У Фьрәwьн сәрда зедә кьр у готә Усьв: «Ва әз тә датиньмә ль сәр т'әмамийа wәлате Мьсьре».
[42] Һьнге Фьрәwьн гӧстила мора хwә жь т'ьлийа хwә дәрхьст, кьрә т'ьлийа Усьв, к'ьнщед к'ьтани зьрав лекьрьн у зьнщирәкә зер'ин авитә стуйе wи.
[43] Әw ль ә'рәба хwәйә дӧда да сийаркьрьне у пешиа wи бь дәнге бьльнд дькьрьнә гази: «Чок бьдьн!» У әw дани ль сәр т'әмамийа wәлате Мьсьре.
[44] Фьрәwьн готә Усьв: «Әз Фьрәwьн ьм, бейи тә т'ӧ кәс, т'әмамийа wәлате Мьсьреда нькарьбә дәсте хwә йан ньге хwә бьльнд кә».
[45] Фьрәwьн наве Усьв дани Сафьнат'-Панеа у Аснат'а qиза Поти-Пәрайе т'әреqе бажаре Оне да wи. Усьв р'абу ль wәлате Мьсьре бьгәр'ә.
[46] Усьв си сали бу, гава әw ль бәр Фьрәwьн п'адше Мьсьре сәкьни. Усьв жь щәм Фьрәwьн дәрк'әт, ль т'әмамийа wәлате Мьсьре гәр'ийа.
[47] Wан һ'әфт салед т'ер у т'ьжитийеда, ә'рде гәләк дәрәмәт да.
[48] Әwи һ'әму хӧрәкед wан һ'әфт салед кӧ ә'рде Мьсьре дьда, да сәр һәв, у әw хӧрәк бажарада щи-wар кьрьн, һәр хӧрәкед жь ә'рде дор у бәред бажара, нава wанда щи-wар кьрьн.
[49] Усьв мина qума бә'ре, һаqаси гәләк гәньм лод кьр, ӧса кӧ иди һ'әсаб нәкьрьн, чьмки нәдьһатә һ'әсабе.
[50] Бәри һатьна салед хәлайе, Усьвр'а дӧ кӧр' бун. Әвана Аснат'а qиза Поти-Пәрайе т'әреqе бажаре Оне жер'а анин.
[51] Усьв наве кӧр'е хwәйи ньхӧри дани Мьнашә у гот: «Чьмки Хwәде һ'әму дәрд-кӧле мьн у мала баве мьн жь бира мьн дәрхьстьн».
[52] Наве йе дӧда дани Әфрайим у гот: «Чьмки Хwәде wи wәлате зәлулийа мьнда, бәдәна мьн шин кьр».
[53] Әw һәр һ'әфт салед wәлате Мьсьредайә т'ер у т'ьжийе дәрбаз бун,
[54] у әw һәр һ'әфт салед хәлайе дәстпекьрьн, чаwа кӧ Усьв готьбу. Һ'әму wәлатада бу хәлайи, ле т'әмамийа wәлате Мьсьреда нан һәбу.
[55] Гава бьр'чибун к'әтә т'әмамийа wәлате Мьсьре, щьмә'те бона нан һәwара хwә Фьрәwьн дани. Фьрәwьн готә һ'әму мьсьрийа: «Һәр'ьнә щәм Усьв, чь wәр'а бежә бькьн».
[56] Т'әмамийа р'уйе ә'рде бу хәлайи, Усьв һ'әму ә'мбар вәкьрьн у фьротә мьсьрийа. Хәлайи wәлате Мьсьреда гьран бу.
[57] У жь т'әмамийа т'опа дьне дьһатьнә Мьсьре, жь Усьв гәньм дьк'ьр'ин, чьмки ль сәр т'әмамийа р'уйе ә'рде хәлайи гьран бьбу.