[1] Һьнге Усьв нькарьбу хwә зәфт кьра, ль бәр һ'әмуйед кӧ щәм wи сәкьнибун кьрә qир'ин: «Һ'әму мәрьва жь щәм мьн дәрхьн!» Кәсәки хәриб щәм wи нәма, гава Усьв хwә бьрайед хwәва да наскьрьне.
[2] Кур'ин к'әте гьрийа, мьсьрийа бьһист, әв дәнг гьһиштә мала Фьрәwьн жи.
[3] Усьв готә бьрайед хwә: «Әз Усьв ьм. Баве мьн һе сах ә?» Ле бьрайед wи нькарьбун щаба wи бьдана, чьмки ль бәр wи бьбунә кәвьр мабун.
[4] Усьв готә бьрайед хwә: «К'әрәм кьн, wәрьнә незик», әw жи чунә щәм у wи гот: «Әз бьрайе wә Усьв ьм, йе кӧ wә фьротә Мьсьре.
[5] Ле ньһа бәр хwә нәк'әвьн у ль wә чәтьн нәйе, кӧ wә әз фьротьмә вьра, чьмки Хwәде әз бәри wә шандьмә вьра, бона хwәйкьрьна жийина wә.
[6] Чьмки әва дӧ салед хәлайинә ль сәр дьне, ле һе пенщ сал жи һәнә, кӧ wе вәдан у дьруне нәбә.
[7] Хwәде әз бәри wә шандьм, wәки ль сәр дьне к'ока wә бьһелә у жийина wә бь азайикә мәзьн хwәй кә.
[8] Аwа, йе кӧ әз шандьмә вьра һун нибун, ле Хwәде бу, әwи әз кьрьмә баве Фьрәwьн у хwәйе т'әмамийа мала wи, ӧса жи сәрwере т'әмамийа wәлате Мьсьре.
[9] Ньһа р'абьн зу һәвраз һәр'ьнә щәм баве мьн у жер'а бежьн: ‹Кӧр'е тә Усьв аһа дьбежә: «Хwәде әз кьрьмә хwәйе т'әмамийа Мьсьре, нәсәкьнә зу бәржер wәрә щәм мьн.
[10] Те т'опрахе Гошәнеда незики мьн бьмини, т'әви кӧр'ед хwә, кӧр'ед кӧр'ед хwә, пәз у дәwаред хwә у һ'әму һәбука хwәва»›.
[11] Әзе wьр тә т'ер кьм, чьмки һе пенщ салед хәлайе һәнә, wәки тӧ, мала хwә у һәбука хwәва т'ӧнәбуне нәбини.
[12] Ва йә, ч'ә'ве wә у ч'ә'ве бьрайе мьн Бьнйамин дьбиньн, кӧ дәве мьн ван тьшта wәр'а дьбежьн.
[13] Дәрһәqа т'әмамийа р'умәта мьнә Мьсьреда у һәр тьште кӧ wә дит баве мьнр'а гьликьн у зу баве мьн бәржер биньнә вьр».
[14] Хwә авитә стӧкӧра Бьнйамин у гьрийа. Бьнйамин жи сәр стӧкӧра wида гьрийа.
[15] Чу р'уйе һ'әму бьрайед хwә у сәр wанда дьгьрийа. Пәй ве йәкер'а бьрайед wи пер'а хәбәрдан.
[16] Дәнг гьһиштә мала Фьрәwьн, кӧ бьрайед Усьв һатьнә. Әв йәка ль Фьрәwьн у хӧламед wи хwәш һат.
[17] Фьрәwьн готә Усьв: «Бежә бьрайед хwә: ‹Бьра аһа бькьн: Һ'әйwанед хwә бар кьн у һәр'ьнә wәлате Кәнане,
[18] у баве хwә, нәфәред хwә һьлдьн у wәрьнә щәм мьн. Әзе wәлате Мьсьреда щийе һәри qәнщ бьдьмә wә у һуне жь хер-бәрәк'әта wәлет бьхwьн›.
[19] Әз ә'мьр ль тә дькьм кӧ wанр'а бе готьне: ‹Бьра аһа бькьн: Жь wәлате Мьсьре бона зар'окед хwә у жьнед хwә ә'рәба хwәр'а һьлдьн у һәр'ьн баве хwә һьлдьн у бен.
[20] Бьра ч'ә'ве wә һур-муред wәда нәминә, чьмки һ'әму хер-хьзна wәлате Мьсьре йа wәйә›».
[21] Кӧр'ед Исраел ӧса жи кьрьн. Усьв ль гора ә'мьре Фьрәwьн ә'рәбә данә wан у нане р'ийа wан да wан.
[22] Һәр йәки жь wан дәстә к'ьнщ да wан, ле сесьд зив у пенщ дәст к'ьнщ данә Бьнйамин.
[23] Баве хwәр'а жи, дәһә к'әред хер-хьзна Мьсьрева баркьри у дәһә к'әред ме жи гәньм, нан у хӧрәква баркьри бона р'ийа баве хwә шанд.
[24] Гава бьрайед хwә шандьн, әw р'ек'әтьн, әwи гот: «Р'ева шәр' нәкьн».
[25] Әw жь Мьсьре һәвраз чун у һатьнә wәлате Кәнане, щәм баве хwә Аqуб.
[26] У wир'а гьли кьрьн готьн: «Усьви һе сах ә! Бәле! Әw сәрwере т'әмамийа wәлате Мьсьре йә». Дәст у п'ийед wи ле сар бун, чьмки әwи нькарьбу готьна wан баwәр бькьра.
[27] Гава әw һ'әму готьнед Усьв кӧ wанр'а готьбу wир'а гьли кьрьн у ә'рәбед Усьв бона wи шандьбун кӧ әw пе һәр'ә дитьн, р'ӧһ' ль бәр бина баве wан Аqубда һат.
[28] Исраел гот: «Бәс ә! Кӧр'е мьн Усьв һе сахә! Әз һәр'ьм кӧ бәри мьрьна хwә wи бьбиньм».