[1] Хәлайе зор ль wәлет кьр.
[2] Гава гәньме жь Мьсьре анибун, хwарьн хьлаз кьрьн, баве wан готә wан: «Диса вәгәр'ьн бона мә һьнәк хӧрәк бьк'ьр'ьн».
[3] Ле Щьһуда ле вәгәр'анд у готе: «Әwи мәрьви гьлийе т'ам да дәсте мә у гот: ‹Һәгәр бьрайе wә т'әви wә нибә, р'уйе wә ль р'уйе мьн нәк'әвә›.
[4] Һәгәр те бьрайе мә т'әви мә бьшини, әме бәржер бьн тәр'а хӧрәк бьк'ьр'ьн,
[5] ле һәгәр тӧ нәшини, әм бәржер начьн. Чьмки әwи мәрьви мәр'а гот: ‹Һәгәр бьрайе wә т'әви wә нибә, р'уйе wә ль р'уйе мьн нәк'әвә›».
[6] Исраел гот: «Чьма wә әв нәһәqи мьнр'а кьр: готә wи мәрьви кӧ бьраки wәйи дьн жи һәйә?»
[7] Wана гот: «Әwи мәрьви һ'але мә, һ'але пьсмамед мә бь һур-гьли пьрси гот: ‹Баве wә һе сах ә? Бьрайе wә диса һәнә?› Мә жи щаба ван пьрса да wи. Мә чь заньбу кӧ әwе бежә: ‹Бьрайе хwә бәржер биньн›?»
[8] Щьһуда баве хwә Исраелр'а гот: «Кӧр'ьк т'әви мьн бьшинә, әм р'абьн һәр'ьн, wәки әм сах бьминьн, нә әм бьмьрьн нә тӧ, нә жи зар'окед мә.
[9] Әз щабдарийа бона wи һьлдьдьмә ль сәр хwә, тӧ wи жь дәсте мьн бьхwазә, һәгәр әз wи нәйньм нәдьмә тә у ль бәр тә нәдьмә сәкьнандьне, т'әмамийа ә'мьре хwәда әз ль бәр тә гӧнәк'ар бьм.
[10] Һәгәр мә дәрәнги нәхьста, әм ньһа щара дӧда ле вәгәр'ийа бун».
[11] Баве wан Исраел wанр'а гот: «Һәгәр ӧса йә, ньһа аһа бькьн, т'әви хwә р'әзед башә ви wәлати хwәр'а һьлдьн у wи мәрьвир'а п'ешк'еш бәржер бьбьн, һьнәк мәлһ'әм, һьнгьв, бьһарәт, зьмьр, фьстәq у бәһив.
[12] Т'әви хwә жи дӧбарә п'әра һьлдьн, wан п'әред кӧ ль сәр дәвед т'ер'ед wә дани пашда һатьнә, бь дәстед хwә пашда бьбьн, дьбә кӧ шаш кьрьбьн,
[13] р'абьн бьре хwә һьлдьн у диса вәгәр'ьн щәм wи мәрьви.
[14] Бьра Хwәдейе Һәри Зор, бьдә wә кӧ һун ль бәр wи к'әрәме бьбиньн, wәки әw бьре wәйи дьн у Бьнйамин ль wә вәгәр'инә. Ле һәгәр әз дәсте хwә жь wан кӧр'ед хwә бькьм жи, бьра бекӧр' бьм».
[15] У вана әв п'ешк'еш у дәсте хwәда жи дӧбарә п'әрә, ӧса жи Бьнйамин һьлдан р'абун бәржери Мьсьре бун у ль бәр Усьв сәкьнин.
[16] Гава Усьв Бьнйамин т'әви wан дит, готә wәк'иле мала хwә: «Ван мәрьва бьбә мале, гошти сәржекә у һазьр кә, чьмки әwе фьравине т'әви мьн бьхwьн».
[17] У wи мәрьви, Усьв чаwа готьбуйе, ӧса жи кьр, әw мәрьв бьрьнә мала Усьв.
[18] Әв мәрьвана тьрсийан, кӧ әw бьрьнә мала Усьв һьнге готьн: «Бәре пешьн әм бона wан п'әред т'ер'ед хwәда тенә бьрьне, кӧ һ'ьщуми ль сәр мә бькә, ль сәр мәда бьгьрә мә бькә хӧлам, ӧса жи к'әред мә».
[19] Һьнге әw незики wи мәрьве wәк'иле мала Усьв бун у бәр дәре мале wир'а хәбәрдан,
[20] у готьне: « Хwәйе мә, щара пешьн әм бәржер һатьн кӧ хӧрәк бьк'ьр'ьн,
[21] гава әм гьһиштьнә к'арвансәрәке, мә т'ер'ед хwә вәкьрьн, мә дина хwә дайе, ва йә п'әре мә һәр кәси, wәкә к'ашед хwә, ль сәр дәве т'ер'ед мә бун. Мә бь дәсте хwә әw пашда анинә.
[22] У сәрда жи мә т'әви хwә диса п'әрә бәржер анинә, бона хӧрәк бьк'ьр'ьн. Әм ньзаньн к'е п'әред мә кьрьбунә т'ер'ед мә».
[23] Әwи гот: «Ә'дьл бьн, нәтьрсьн, Хwәдейе wә у Хwәдейе баве wә хьзнә т'ер'ед wәда да wә, wә п'әред хwә данә мьн» һьнге Шьмһ'ун дәрхьст ани щәм wан.
[24] Wәк'ил әw мәрьвана бьрьнә мала Усьв у ав да wан ньгед хwә шуштьн, к'әред wан альфкьрьн.
[25] Wана жи п'ешк'ешед хwә бона һатьна Усьвә нивро һазьр кьрьн, чьмки әw пе һ'әсийа бун, кӧ әwе ль wьр нен бьхwьн.
[26] Гава Усьв һатә мале, wана п'ешк'ешед дәсте хwәда анинә мале данә wи у һ'әта ә'рде ль бәр wи дәвәр'уйа чун.
[27] Усьв һ'ал-wәхте wан пьрси у гот: «Сьһ'әта каләмере баве wә, бона әwи кӧ wә мьнр'а гьли кьр, чаwа йә? Әwи һе сах ә?»
[28] Wана гот: «Хӧламе тә, баве мә һе сах ә, әwи һе ль сәр сьһ'әт у qәwата хwә йә». У ль бәр wи дәвәр'уйа чун, qәдьр кьрьн.
[29] Һьнге Усьв сәре хwә бьльнд кьр, кӧр'е дийа хwә, бьре хwә Бьнйамин дит у гот: «Әв ә бьре wәйи бьч'ук, бона к'ижани wә мьнр'а гьли кьр?» У гот: «Бьра Хwәде тә хwәй кә, лаwо!»
[30] Усьв бь ләз дәрк'әтә дәрва, чьмки бона бьре агьр дьла к'әтьбу у к'әтә ода һьндӧр' у ль wьр гьрийа.
[31] Р'уйе хwә шушт у дәрк'әтә дәрва, хwә гьрт у гот: «Нан дайньн».
[32] Wир'а башqә, wанр'а башqә у wан мьсьрийар'а жи, йед кӧ т'әви wан дьхwарьн башqә данин. мьсьрийа т'әви ибранийа нан нә дьхwар, чьмки бона мьсьрийа әв йәк һ'әрами бу.
[33] У бьра бәр wи р'уньштьн, йе ньхӧри льгора ньхӧртийа хwә, йе бьч'ук ль гора бьч'уктийа хwә, ван мәрьва һәвдӧ дьньһер'ин у ә'щебмайи мабун.
[34] Усьв жь хwарьна ль бәр хwә дьшанд дькьрә ль бәр wан, ле п'ара Бьнйамин жь п'ара йед дьн пенщ щара зедәтьр бу. Вана готьна тә вәхwарьн у т'әви Усьв к'ефхwәш бун.